भांगरभूंय | प्रतिनिधी
भारत आनी इंग्लंड ह्या पंगडां मदीं पांच टॅस्टींचे माळेची सुरवात हेडिंग्ले हांगा लिड्स टॅस्ट मॅची वरवीं जाता. ही दोनूय पंगडां खातीर नवीन संवसारीक टॅस्ट वस्तादपण (डब्ल्यूटीसी) चक्राची लेगीत सुरवात आसा.
भारत पयल्या दोनूय टॅस्ट वस्तादपण चक्राचे फायनलींत पाविल्लो, पूण पोरूं घरच्या मैदानाचेर न्युझिलॅण्डा आडचे माळेंत आनी उपरांत बॉर्डर-गावस्कर ट्रॉफींत निर्शेणी हाडपी कामगिरी केल्या उपरांत सेगीत तिसरे खेपे फायनलींत खेळपाक अपेशी थारिल्लो. आतां भारताचें लक्ष नवीन डब्ल्यूटीसी चक्राचे सकारात्मक सुरवातीचेर आसा.
भारता खातीर ही फकत नवीन डब्ल्यूटीसी चक्राची सुरवात ना जाल्यार नवीन टॅस्ट युगाची लेगीत सुरवात आसा. विराट कोहली, आर. अश्विन आनी रोहित शर्मा ह्या अणभवी टॅस्ट त्रिकुटाचे निवृत्ती उपरांत ही भारताची पयलीच पूर्ण टॅस्ट माळ आसा. हाचे खेरीत, ह्या पंगडांत फाटल्या कांय इंग्लंड भोंवड्यांनी उत्कृश्ट कामगिरी करपी अणभवी फास्ट बॉलर मोहम्मद शमी लेगीत ना.
रवींद्र जडेजा हो 19 वांगड्यांच्या घटमूट पंगडांतलो एकोडो खेळगडो आसा जाच्या नांवार 60 परस अदीक टॅस्टी खेळपाचो अणभव आसा. भारताचें फुडारपण शुभमन गिल करतलो. पंगडाचो बॅटींग क्रम पूर्णपणान नवीन आसा आनी ओपनर म्हणून सुरवात उपरांत तिसरे बॅटींग करपी गिल आतां कोहलीचे सुवातेर चवथे सुवातेर खेळपाक सज्ज आसा. हाचो अर्थ असोय जाता की करुण नायर सुमार आठ वर्सांनी टॅस्ट पंगडांत पुनरागमन करतलो, जाल्यार साई सुदर्शनाक लेगीत पदार्पणाची संद मेळुये. बॉर्डर-गावस्कर ट्रॉफींत पांचांतल्या चार टॅस्टींनी डावाची सुरवात करपी लोकेश राहुल आनी यशस्वी जयस्वाल आतां भारताचे नवे कायम स्वरुपी टॅस्ट ओपनर आसतले.
इग्लंड विशीं सांगचें जाल्यार, फाटले डब्ल्यूटीसी चक्र इंग्लंडा खातीर खूब निर्शेणी हाडपी थारिल्लें. 22तल्यो 10 मॅची हारून तो पांचवे सुवातेर उरिल्लो.
‘बॅझबॉल’ रणनिती तांचे खातीर फाटल्या चक्रांत मातूय उपेगी थारूंक नाशिल्ली. ताणें भारतांत तशेंच पाकिस्तानांत टॅस्ट माळो व्हगडायिल्ल्यो, जाल्यार अॅशेस माळेंत ताका घरच्या मैदानाचेर 2-2 अशें बरोबरींत समाधान मानचें पडिल्लें.
तांचो बॅटींग क्रम अणभवी आसा आनी जेकब बेथेलचे सुवातेर ऑली पोपाक निमाण्या इकरांत सुवात दिवन, आमी अणभवाक प्राधान्य दितले हें तांणी दाखोवन दिलां. पूण, जो रुटाक सोडलो जाल्यार ताच्या चडश्या बॅट्समनां मदीं सातत्य आनी फॉर्माचो उणाव आसा.
दुसरे वटेन, इंग्लंडाची बॉलींग तांचे बॅटींग क्रमा इतकी अणभवी ना. मार्क वूड आनी जोफ्रा आर्चर दुखापतीक लागून पंगडांतल्यान भायर आसात, पंगडाक सगल्यात अणभवी बॉलर क्रिस वोक्सा कडल्यान खूब आस्त आसतली, भारत फाटले खेपे इंग्लंडाचे भोंवडेर गेल्लो, त्या वेळार ताका फकत एकूच मॅच खेळपाक मेळिल्ली.पूण, ताणें सात विकेटी घेतिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
