भांगरभूंय | प्रतिनिधी
पणजीः गोंयकारांच्या आवडीचे चवथी निमतान अंदूं गोंयांतल्या बाराय म्हालांनी स्वयंपूर्ण चवथीचो बाजार भरतलो, अशें मुख्यमंत्री डॉ. प्रमोद सावंत हांणी जाहीर केल्लें. ते प्रमाण 20 ऑगस्ट सावन गोंयभर ह्या बाजाराक सुरवात जातली.
11 दीस चलपी ह्या बाजारांत तयार परंपरीक फराळ, मोदक धरून माटोळीचें साहित्य लेगीत मेळटलें, अशी म्हायती मुख्यमंत्री डॉ. सावंत हांणी दिल्ली. सगळ्या म्हालांनी एका परस अदीक सुवातांचेर ह्या बाजाराचें आयोजन करतले. सकाळीं 9 ते रातच्या 8 वरां मेरेन हो बाजार भरतलो.
ग्रामविकास खात्या वतीन बाराय म्हालांनी इत्सुकांक फुकट स्टॉलांचें वितरण केलां. सगळ्या म्हालांतल्यान स्टॉलांक बरो प्रतिसाद मेळ्ळा. चवथीक लागपी विवीध तयार उत्पादनांची विक्री करचे खातीर खळाव्यांक संद दिवन तांकां अर्थीक लाव मेळोवन दिवपाच्या उद्देशान सरकारान ह्या बाजाराचें आयोजन केलां, अशें मुख्यमंत्री डॉ. सावंत हांणी सांगलें.
स्वंयपूर्ण चवथीच्या बाजाराच्यो सुवातो फुडें दिल्ले प्रमाण. उत्तर गोंयांत बार्देसांत म्हापश्यां नव्या बसस्टॅण्डाचेर आनी पार्कींग वाठार, म्हापशेंचें सरकारी संकुल, आसगांवां गणेश मंदिरा कडेन आनी अस्नोड्यां कदंब बसस्टॅण्डाचेर, दिवचल म्हालांत सांखळे कदंब बसस्टॅण्डार, रमाकांत शेट्ये प्रदर्शन वास्तू, दिवचले शिरोडकार सभाघरा फाटल्यान, पेडणें म्हालांत पेडण्यां कदंब बसस्टॅण्डार, सत्तरी म्हालांत होंडाच्या कदंब बसस्टॅण्डाचेर आनी वाळपय बसस्टॅण्डाचेर, तिसवाडी म्हालांत मालवार, आगशी, ताळगांवां चर्ची लागसारच्या पोरण्या पंचायत सभाघरांत, फोंडें म्हालांत विमानतळ रस्तो, पालिका कपिलेश्वरी आनी कदंबा बसस्टॅण्डाचेर, वळपे शिरोड्यां चवथीचो बाजार भरतलो. दक्षीण गोंयांत काणकोण म्हालांत काणकोण कदंब बसस्टॅण्डाचेर आनी पेंगीणचे श्रद्धानंद शाळेचे पोरणे इमारतींत, मुरगांव म्हालांत वास्को कदंब बसस्टॅण्डाचेर, साश्टींत मडगांवच्या कदंब बसस्टॅण्डाचेर आनी कुंकळ्ळे कुंकळ्ळीच्या कदंब बसस्टॅण्डाचेर, सांगें म्हालांत सांगें नगरपालिका संकूल, केपें म्हालांत गोंय राज्य नागरी विकास संस्थे लागसार, उक्तें मैदान, कुडचडें बाजार आनी धारबांदोडें म्हालांत धारबांदोडेंच्या खेळां मैदानाचेर चवथीचो बाजार भरतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
