आयआयटी विरोधकांक नोटिसो धाडून मानसीक खच्चीकरण करपाचे यत्न सुरू

सांगें उपजिल्होधिकारी कार्यालया सामकार जमिल्ले आयआयटी विरोधक (संदीप मापारी)

भांगरभूंय | प्रतिनिधी

भांगरभूंय । प्रतिनिधी
सांगेः सांग्यार जावपाक घातिल्ल्या आयआयटीक विरोध करून फाटल्या 28 दिसां सावन धरणे आंदोलन सुरू केल्ल्यांक 107 कलमा खाला नोटिसो धाडून तांचें मानसिक खच्चीकरण करपाचे यत्न सरकारान सुरू केल्यात. मात आमी ताका बदचे नात अशें सांतान रॉड्रिग्ज हांणी सांगलां. जोसेफ फर्नांडीस, स्विजल क्रूझ, नंदा मापारी, फिलोमिना डिकॉस्ता, शांतू गांवकार, सांतान रॉड्रिग्ज, कोस्तांव मस्कारेन्हास आनी सुकोरिना डायस हांकां ह्या कलमा खाला सांगेच्या उपजिल्होधिकाऱ्यान नोटीस धाडून मंगळारा 11 वरांचेर हजर रावपाक सांगिल्लें. मात उपिजिल्होधिकारी कार्यालयांत आयलेच ना. कितलेंय चेंपण हाडले तरी  आयआयटी आमकां नाक हे मागणे कडेन आमी ठाम आसतले अशें कोस्तांव मस्कारेन्हास हाणे सांगलें.
सांगे आनी उगें पंचायत वाठारांत जमाव बंदीचें 144 कलम लागू आसतना दसऱ्याच्या दिसा राष्ट्रीय स्वयंसेवक संघान सांगे बाजारांत रॅली काडली. पायकदेवाच्या देवळाचो मुख्यमंत्र्यांनी बुन्यादी फातोर बसयलो तेन्ना सुमार 500 लोक एकठांय आयिल्ले.   तांचेर कित्याक कारवाय करनात, काय सरकारान 144 कलम फकत आयआयटीक विरोध करतल्यां खातीरूच लायलां, असो प्रश्न तांणी केला. 144 कलम लागू आसतना सांग्यार सप्तकी बाजार भरता, रॅली काडटात, हेर कार्यावळी जातात. पुलीस तांचे आड कांय करनात. आयआयटी हाडून सैमाचो इबाड करतल्यांक आमी विरोध करतात म्हणून आमची सतावणूक चल्ल्या अशें तांणी सांगलें.
आयआयटीक लागून केंल्लें जमनीचें सर्वेक्षण कायद्याक धरून ना. सेक्सन 4 खाला तें केलें ना. मुख्य म्हणल्यार ते खातीर शेतकारांक कांयच कळयलें ना असो दावो सांतान रॉड्रिग्ज हाणे केला. शेतांत वचपाक पुलीस आमका आडायतात मात सुभाष फळदेसाय पुलिसांक घेवन शेतांनी वतात. फळदेसाय हांका पुलिसांनी कलम लावपाक जाय अशें तांणी सांगलें. नोटिसो धाडल्यो. भितर वडयलें तरी आमी फाटीं सरचे नात. आयआयटी प्रकल्प बोर जाल्यार काणकोणकारांनी आनी मेळावलीच्या लोकांनी ताका कित्याक थारो दिलो ना, असो प्रश्न मिल्टन फर्नांडीस हांणी फळदेसाय हांका विचारला.