भांगरभूंय | प्रतिनिधी
आयआयटी म्हणल्यार इंडियन इन्स्टिट्यूट आॅफ टेक्नोलाॅजी. तंत्रज्ञान संस्था. खडगपूर (अस्तंत बंगाल) हांगां मे 1950 त पयली आयआयटी सुरू जाली. अधिकृत उक्तावण जालें 18 आॅगस्ट 1951 क. तेवीसां मदली पयल्या क्रमांकाचेर आसा ती मद्रास आयआयटी. ह्या संस्थांनी अर्थांत हुशार भुरगे शिक्षण घेतात. वैजकी शिक्षणाक प्रवेश घेवपाक भरपूर गुण जाय. आयआयटीचेंय तशेंच. आसूं. आमच्या गोंयांत फाटलीं कांय वर्सां आयआयटीचो मुद्दो गाजता. विमान वयर घिरट्यो घालता, पूण तें देंवोवंचें खंय हो प्रस्न सरकाराक पडला. काणकोण, शेळ – मेळावली, आतां सांगें…. मदीं आनीकूय खंय तरी आयआयटीचे जागे सोदपाचो यत्न जाला आसतलो. मात, सगले कडेन खर विरोध जालो. सत्तरींतल्या शेळ- मेळावली गांवांत तर झूजच पेटिल्लें. लाठीमारांत कांय आंदोलक जखमी जाल्ले. तांचेर केशीय जाल्ल्यो. ह्या वाठाराचे लोकप्रतिनिधी पेजाद आसूनय सरकाराक फाटीं सरचें पडिल्लें. आतां सांग्यारुय ताची पुनरावृत्ती जावं येता, अशीं चिन्नां दिसपाक लागल्यांत. कालूच थंय 144 कलम लायलां. कितेंय जालें तरी हें आंदोलन हिंसक जावचें न्हय, हाची समर्थक आनी विरोधक, दोगांयनी खबरदारी घेवची. कारण, आंदोलनाक लागून कोडसाण वाडटा आनी मागीर ती बरींच वर्सां उरता. मनशांच्या प्रत्येक
कृतींत ती झिरपत रावता. तेन्ना ह्या आयआयटी मुद्द्याचेर संबंदितांनी जाता तितले बेगीन सुवर्णमध्य सादून मार्ग काडल्यार बरो.
आयआयटीक सगले कडेन विरोध जाला तो जमनी वयल्यान. शेळ- मेळावली शेतां वतलीं, घरां सोडचीं पडटली, ही भिरांत आशिल्ली. सांग्यारुय शेतांचो प्रस्न आसा खंय. दोनूय कडले आंदोलक शेतकार. मुखेलपणान बायलो. दोनूय कडल्या आंदोलनाची पद्दत एक सारकी आशिल्ल्यान आयआयटी समर्थकांक भायले लोक हें आंदोलन करतात, मेळटा ताका विरोध करतात, अशें दिसता. कांय जाणांनी तशे आरोपूय केल्यात. पूण, आतां मेरेन नियोजित आंदोलन थळाचेर दिसल्यात ते थळावेच शेतकार. आमचीं शेतां, दोंगर काबार करून आमकां आयआयटी जाल्ली नाका. कोणे कितलीय बळजबरी करुं, आमी रस्त्यार देवन विरोध करतले, अश्यो प्रतिक्रिया आंदोलकांनी उक्तायल्यात. ‘एकल्याय शेतकाराचें हांव लुकसाण जावपाक दिवचो ना. गरज पडल्यार स्वताची जमीन दिवन मतदारसंघाची उदरगत करपी हो प्रकल्प हांगा उबारतलो’, अशी प्रतिक्रिया थळाव्या लोकप्रतिनिधींन एके बसकेंत उक्तायिल्ली. आतांय ते म्हणटात, ‘हांगा शेत ना, एक मिटर जाग्यार पसून कोण भात रोयता जाल्यार दाखोवन दिवचें. ही सगली जमीन सरकारी मालकेची. एकल्याचीय खाजगी जमीन ना.’ ताचे भायर तांणी एक गंभीर आरोप केला, तो म्हणल्यार एक धर्मीक संस्था ह्या आंदोलना फाटल्यान आसूं येता. आतां लोकप्रतिनिधीच्या ह्या आरोपांत आनी वयल्या दाव्यांत कितलें तथ्य आसा, तें विरोधकूच सांगपाक शकतात.
थळाव्या लोकप्रतिनिधीच्या म्हणण्या प्रमाण, आयआयटीक 15 लाख चौ. मिटर जागो लागता. सरकारान फक्त साडेसात लाख चौ. मिटर जागो दिला. जाणकारांचें मत वेगळें. नव्या धोरणा प्रमाण खंय, आयआयटींक 250 एकर जमीन लागता तर आयआयएमाक शारांत 10 एकर मेरेन आनी गांवांनी 60 एकर. (10 एकर म्हणल्यार 40,468 चौ. मिटर) जमनीचो व्हडलो कुडको मेळना म्हूण स वर्सां पयलीं कांय राज्य सरकारांनी हे जमनींत कपात केल्ली. फुडारी म्हणटात, सांग्यार जावपी आयआयटी मुखार चार बागो जातल्यो. थंय शेंकड्यांनी लोकांक नोकऱ्यो मेळटल्यो. माॅल जातलें तातूंत कामां मेळटलीं. सगली गजाल खरी, पूण ह्या शिक्षणीक संस्थांक इतली व्हडली जमीन जायच कित्याक? मुंबय 20-20 माळयांच्यो व्हडल्यो इमारती आसात, तसल्यो पांच इमारती बांदल्यार तातूंत आयआयटीक गरज त्यो सुविधा उबारपाक मेळनात? चडांत चड 25 हजार चौ. मिटर जागेंत आयआयटी प्रकल्प जावंक शकना? कमी जागो घेतल्यार कायद्यान तो गुन्यांव थारतलो? आतां आयआयटी फर्मागुडयेर हाडपाचें आमंत्रण वीजमंत्र्यान दिलां. हाका लागून वाद पेटूं येता. सोशल मिडियाचेर सध्या आयआयटीय गाजता. कांय जाणांच्या मतान झुआरीची सरकारान फुकट दिल्ली जमीन प्लाॅट करून विकचे परस थंय आयआयटी उबारूं येता.
दोन कडल्यान आयआयटीक विरोध जाल्ल्यान आतां हो प्रतिश्ठेचो प्रस्न जाला. खंयचेय परिस्थितींत ती सांग्यारूच जावपाक जाय, अशें समर्थकांक दिसता. तर काणकोण, सत्तरींतल्यान तिका धांवडायली, म्हणटकच आमीय येशस्वी जातले, अशें विरोधकांक दिसता. ह्या झुजांत भलत्यांचेरूच काळ येवचो न्हय. आयआयटी सारकी संस्था आसप, हें राज्या खातीर भूशण. म्हणटकच मनां दुखयनासतना उपाय सोदचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
