भांगरभूंय | प्रतिनिधी
रिवणां १० लाख ४९ हजार चौ. मि. जाग्याची पळोवणी
पणजी, प्रतिनिधी : सांगेंच्या मळेवाडो- रिवणांत आयआयटी खातीर १० लाख ४९ हजार चौरस मिटर जमनीची पळोवणी केंद्रीय शिक्षण मंत्रालयान केल्या. जमनीचीं कागदपत्रां तशेंच मालकी हक्कांची तपासणी चालू आसा. जमीन संपादनाची प्रक्रिया अजूनय सुरू जावंक ना, अशी लेखी जाप मुख्यमंत्री डॉ. प्रमोद सावंत हांणी दिल्या. आमदार आलेक्स रेजिनाल्ड हांणी हो प्रस्न विचारिल्लो.
आयआयटीत अभ्यासक्रम, प्रवेश मेळपी विद्यार्थ्यांचो आंकडो हाचेर अजून निर्णय जावपाचो आसा. गोंय सरकार जागा संपादीत करून ती आयआयटीच्या ताब्यांत दितली. कन्सल्टंट, वास्तु शिल्पकार नेमपाची प्रक्रीया आयआयटी वतीन जातली. कॅम्पस उबारपाची प्रक्रिया केंद सरकार करतलें, अशें जापेंत स्पश्ट केलां.
मळेवाडो-रिवणा सर्वे नंबर १६८/१, १६९/१, १६९/२ आनी १६९/३ हातूंत वट्ट १० लाख ४९ हजार चौखण मीटर जाग्याची पळोवणी जाल्या.
आयआयटी कॅम्पस जाल्या उपरांत गोंयांत तांत्रीक शिक्षणाक उर्बा मेळपी वातावरण तयार जातलें. प्रत्यक्ष तशेंच अप्रत्यक्ष स्वरूपाचे रोजगार तयार जातले. आयआयटी ही संवसारांत नामना जोडिल्ली मान्यताप्राप्त संस्था. हाका लागून राज्यांत अभियांत्रिकी वाठारांतल्या तज्ज्ञ लोकांचें यो- वच सुरू जातलें. थळाव्या लोकांक रोजगार संदी उपलब्ध करपा सयत पर्यावरणाचो सांबाळ करपाचे येत्न जातले, अशें जापेंत म्हणलां.
फर्मागुडयेर ३० जुलय २०१६ वर्सा आयआयटी गोंय कॅम्पस सुरू जालो. थंय बी. टेक. एम. टेक. पीएच.डी. मेळून १६ अभ्यासक्रम शिकयतात. तातूंतत ७१३ विद्यार्थी आसात, अशें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
