भांगरभूंय | प्रतिनिधी
सद्याक गोंयकार आयआयटीची दशा काडटात म्हणचें पडटलें. काणकोणा सुरू जाल्लो आयआयटीचो प्रवास अजुनूय सोपून सोंपना. कोणूय इल्लो जागो दितात व्हय म्हणत ती हेवटेन तेवटेन भोंवत आसा. आनी जाग्यां बाबतींत इल्लो जागृत जाल्लो गोंयकार आपणाली जमीन दिवंक कसोच तयार जायना. हांगा थंय पेणे करीत आयआयटी सद्याक सांग्यार पावल्या आनी थंय कितें चललां तें आमी पळेतात. आयआयटी हांगाच करतले म्हणून कांय राजकारणी हट्टाक पेटल्यात तर शेतां पुरोवंक दिवचे ना म्हणत गांवचे कांय उबे जाल्यात. सामकें रगत व्हांवोवपाची भास आयकूंक येवंक लागल्या. आनी अशे वेळार एक प्रश्न पडटा, आमकां आयआयटी खर्यांनीच जाय?
सद्याचें गोंय शिक्षणाचे बाबतींत बरेंच मुखार आसा म्हणचें पडटलें. एक काळ आसलो जेन्ना शिकपा खातीर गोंयकारांक गोंया भायर वच्चें पडटालें. आयज गोंयांत पांच इंजिनीयरींग कॉलेजी, एक बिट्स पिलानी आनी एक एनआयटी आसा. अशा वेळार गोंयांत आयआयटीची खर्यांनीच गरज आसा? आयआयटी नासली म्हणून गोंयचें कितें लुकसाण जातलें? आनी आयआयटी कितें फायदो करून दितली? हांगा आयआयटी जाली जाल्यार हातूंत कितल्या गोंयकारांक जागे मेळटले? गोंयांत आयआयटी नासतनाय कितलेशेच गोंयकार आयआयटीयन जाल्यात. जे शिकूंक लायक आसात आनी जांकां इत्सा आसा ते शिकतलेच, मागीर गोंयांत आयआयटी आसूं वा नासूं! बरें, गोंयांतले आयआयटीन गोंयकारांक शिकूंक मेळ्ळें म्हणून मागीर तांकां शिर्विसोय हांगाच मेळटल्यो व्हय? काय तांकां गोंय सोडून वच्चेंच पडटलें? हाचेरूय विचार जावप गरजेचें दिसना?
तशी सद्याक गोंयांत आयआयटी सुरू जाल्या. फर्मागुडयेर आशिल्ल्या गोवा इंजिनियरींगच्या सुवातेंत फाटलीं कांय वर्सां आयआयटीचें शिकप चलता. हांगा शिकपी भुरग्यांक डिग्रीय मेळटा. इतले सुवातेंत जर आयआयटी चलूंक शकता जाल्यार आयआयटी खातीर वेगळी सुवात सोदपाची गरज कितें? खंयतरी आशिल्ली शेत जमीन पुरोवपाची गरज कितें? सरकार म्हणटा आमी सरकारी जमनीचेर हो प्रकल्प हाडटात. मान्य. जमीन सरकारीच गा, पूण सद्याक कोणतरी ती कसता न्ही? आपलें पोट कोणतरी ते जमनीर भरता. तुमी तांकां नुकसान भरपाय दितले गा, पूण कितले दिसांक पावतली ती? जमीन कसतल्यांक केन्नाच उपाशीं उडोवची ना. पिळग्यान पिळग्यो तांचें पोट भरतलें. आनी नुकसान भरपायेच्या नांवांन जें कितें मेळटा तें खिणांत काबार जातलें.
आयआयटीक तेंको दिवपी म्हणटात, जे कोण जमीन कसतात ताणीं जमनीचेर अतिक्रमण केलां. आसतूय बी. पूण इतलो तेंप सरकाराक हें खबर नासलें? मागीर सरकार इतलो तेंप कितें करतालें? आज आयआयटीक जागो जाय म्हणून सरकाराक आपणाल्या जाग्याची याद जाली? आनी जर तें अतिक्रमण, जाल्यार जांकां सरकारा कडसून लुकसाण भरपाय मेळची ना, तांकां आपूण आपणाली जमीन दितलों म्हणपाचें थंयचो आमदार कशें सांगता तर? अतिक्रमणाक प्रोत्साहन दिल्ले भशेन जालें ना हें? सत्तरींतूय सरकाराक आपले जमनीची याद जाल्ली आनी आतां सांग्यार.
आतां गोंयाक आयआयटीची आनी आयआयटीक भरपूर जमनीची खर्यांनीच गरज आसा? काय सरकारी जमनींचेर अतिक्रमण करून कोणतरी पोट भरता म्हणून हे प्रकल्प हाडून जमनी तांचे सुवादीन करचेल्यो! हांव हांगा आयआयटीक विरोधूय करिना वा तेंकोय दिना. हे जमनीचेर हेर कसलोय प्रदुशण करपी प्रकल्प येवचे परस आयआयटी येवप बरें. पूण ताची खर्यांनीच गरज आसूंक जाय. गोंयकारांक ताचे पासून लाव जावंक जाय. आनी एक मतींत दवरूंक जाय तें म्हणल्यार सगळें कितें तयार करूं येता, पूण जमीन निर्माण करप कोणाकूच शक्य जावपाचें ना. एकदां जमीन हातांतल्यान गेली म्हणजे ती परत मेळप कठीण.
सद्याक झुवारी एग्रोक सार्या कारखानो घालूंक दिल्ले जमनीचेंच उदाहरण घेवंया. जमीन बर्या कामाकूच दिल्ली. पूण, आज ती परत मेळटा? थंय कितें जालां तें आमी उगत्या दोळ्यांनी पळेतात न्ही. तरीय आमी उरिल्ल्यो जमनी काबार करूंक तयार. कोणतरी सरकारी जमनीचेर अतिक्रमण करता ह्या भंयान जमनी दिवन उडोवप म्हणल्यार हुंदरा जाळान घराक उजो लावप. सरकारान जमनीचेर जावपी अतिक्रमण आडावपाचे उपाय सोदूंक जाय आनी जमनी फुडले पिळगे खातीर सांबाळून दवरूंक जाय.
पूण, आयआयटीची जर खर्यांनीच गोंयाक गरज आसत तर ताका प्राधान्य दिवचेंच पडटलें. पूण ही गरज वेवस्थीत पटोवन दिवची पडटली. आयआयटी सारकेल्या प्रकल्पाक आमचो सदांच तेंको आसतलो. पूण ताची खर्यांनीच गरज आसत तर.
सद्याक आयआयटी बरे तरेन चलता. मागीर लाखांनी मिटर जाग्याचेर उदक कित्याक सोडूंक जाय? सद्याक तर आयआयटीचो फुडार कितें हाचेरूच प्रश्नचिन्ह उबें जाता. आयआयटी दिल्लीचो आदलो संचालक जेन्ना सांगता, आयआयटींत सद्याक विद्यार्थी येवंक पळेनात म्हणून तेन्ना आयआयटीक फुडार आसा काय कितें हाचेर प्रश्न उबो जातलोच न्ही? तो म्हणटा, ते प्रमाण कंप्युटर सायन्स आनी आयटी सोडले जाल्यार बाकीच्या फाट्यांचे एक तृतियांश लेगीत जागे भरप कठीण जाता. इलेक्ट्रोनिक्स लेगीत कोणाक नाका जालां. सिव्हील, मेकानिकल हांचेर तर उलय नाशिल्लेंच बरें. जर दिल्ली आयआयटीची ही गत जाल्यार हेर कडेन कितें गत आसतली काय? आनी तातूंत नव्यो आयआयटी उबारप शाणपणाचें जातलें? गोंय सरकारान हट्टाक पेट नासतना हाचेर खोलायेन विचार करचो आनी आयआयटी आसा थंयच बरे तरेन चलोवंक पळोवची. मेळावलेची पुनरावृत्ती जावंक दिवची न्हय इतलेंच.-
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
