भांगरभूंय | प्रतिनिधी
शेतकाराचो विरोध कायम, सर्वेक्षणाचें काम करपाक दिवचें नात
भांगरभूंय I प्रतिनिधी
सागेंः सांग्यार जावपी नियोजीत आयआयटी प्रकल्पाच्या जमनीचें सर्वेक्षण करपाक अायिल्ल्या कर्मचाऱ्यांक शेतकारांनी काल अाडायिल्ले. ह्या वेळार शेतकार आनी पुलिसां मदीं धक्काबुक्की जावन हातूंत कांय शेतकार बायलां जखमी जाल्ली. काल ज्या शेतकारांनी सर्वेक्षणाचें काम अाडायलें तातूंतल्या कांय जाणांक सरकारान समन्स धाडल्यात, जाल्यार जोजेफ फर्नांडीस ह्या शेतकाराक पुलिसांनी अटक केल्या. ताका लागून शेतकार अदीकूच आक्रमक जाल्यात. आमी आमच्यो जमनी कशोच दिवचे नात, ह्या निर्णयाचेर शेतकार ठाम आसात.
आमची अामच्या हक्का खातीर झगडटात. आपल्या हक्का खातीर झगडपी जोजेफ फर्नांडीस हाका पुलिसांनी काल सकाळीं भादंसं us /186, 506 (ii) r/w 34 कलमा खाला अटक केल्या. तशेंच आयआयटीक विरोधी करपी फिलीप वाझ, स्वेजल क्रुज, मारिया वाझ हांकां समन्स धाडल्यात. तांकांय बेगोबेग अटक करतले अशें पुलीस सांगतात.
ह्या एकंदर प्रकरणा वयल्यान शेतकार आक्रमक जाल्यात. काल जे सुवातेर धक्काबुक्की जाल्ली तेच सुवातेर परतून शेतकार बायलां एकठांय जाल्ली. आमकां न्याय जाय, न्याया खातीर आमी झगडटात.
हांगा लोकशाय सोंपल्या, हुकूमशायेन सरकार लोकांच्यो जमनी ताब्यांत घेवपाक पळयता. सांगेंकारांक आयआयटीचो कसलोच फायदो जावचो ना. आयआयटी प्रकल्प जाल्यार आमकां पियेवपाक उदक मेळचे ना. दोंगर कातरल्यार वादळ येवन लुकसाण सोंसचें पडटलें. दोंगरा वयल्या सात फांट्याच्या उदकान गांवांत बुडटी येतली. रानवटी जनावरां गांवांत पावतलीं अश्यो जायत्यो समस्या शेतकारां मुखार आसात. झगडी मारामारी जाय मेरेन खरेच हो प्रकल्प इतलो गरजेचो आसा? हाचेर भासाभास जावप गरजेचें, अशें शेतकारांचें म्हणणें आसा.
ज्या शेतकारांनी शेतां, काजू, भाटां केल्यात, ते आपल्या हक्का खातीर झगडटलेच. न्याय मागपाचो आमचो हक्क आसा. पूण न्याया खातीर झगडल्यार पुलिसां कडल्यान धक्काबुक्की जाता, समन्स धाडून अटक करतात, हो खंयचो कायदो? मुख्यमंत्री डॉ. प्रमोद सावंत हातूंत गांभीर्यान लक्ष घालपाची गरज आसा. आमकां भितर उडयले, बडयले तरी आमची जमीन आमी ह्या प्रकल्पा खातीर दिवचे नात, अशी शिटकावणी शेतकारांनी दिल्या.
फर्मागुडयेर आयआयटी खातीर फुडाकार घेवपाक तयारः ढवळीकार
सांगेंत आयआयटीक विरोध जाता जाल्यार फर्मागुडयेर इंजिनिअरींग कॉलेज आवारांत आयआयटी खातीर फुडाकार घेवपाक आपूण तयार आसा, अशें वीज मंत्री सुदिन ढवळीकार हांणी सांगलें. जीईसींत सुमार तीन लाख चौखण मिटर जमीन उपलब्ध आसा. 3 ते 4 एफएसआयक मान्यताय दिल्यार फर्मागुडयेर सर्वोत्तम आयआयटी प्रकल्प शक्य आसा, अशेंय तांणी सांगलें.
नियोजीत आयआयटी वाठारांत जमावबंदी;
144 कलम लागू
दक्षीण गोंय जिल्हा न्यायदंडाधिकाऱ्यान फौजदारी कायदो 1973 च्या कलम 144 (1) खाला कोर्टाली- सांगें हांगाच्या नियोजीत आयआयटी प्रकल्पाच्या वाठारांत जमावबंदीचो आदेश लागू केला. सांगें म्हालांतल्या कोर्टाली गांवच्या सर्वे नं. 21/1 तल्या मेरावणी केल्ल्या जमनी सावन 200 मिटर परिमिती वाठारांत नियोजीत आयआयटी प्रकल्पाच्या जमनीचें सर्वेक्षण आनी मेरावणीच्या कामाक आडखळ वा विलंब करपाच्या हेतान पांच वा चड लोक जमा जावपाक वा एकठाय येवपाक बंदी लागू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
