भांगरभूंय | प्रतिनिधी
कार्दिनाल फिलीप नेरी फेर्रांवः राज्यपालां हस्तुकीं कार्दिनाल फेर्रांव हांचो भोवमान
पणजी : आमी पयली भारतीय आसात उपरांत गोंयकार आसात. म्हज्या नांवा मुखार हांव गोंयकार बदला भारतीय लायतलों अशें कार्दिनाल फिलीप नेरी फेर्रांव हांणी सांगलें. कार्दिनाल पदाचेर बडटी मेळ्ळे उपरांत फिलीप नेरी फेर्रांव हांचो राजभवनांत राज्यपालां हस्तुकीं भोवमान जालो. मुख्यमंत्री डॉ. प्रमोद सावंत, खासदार विनय तेंडुलकार, येरादारी खात्याचे मंत्री मॉवीन गुदिन्हो, भाऊ महाराज, हेर मंत्री आनी आमदार कार्यावळीक हाजीर आशिल्ले.
देशांत इंग्रजांची राजवट आशिल्ली जाल्यार गोंयांत पुर्तुगेजांची राजवट आशिल्ली. देश स्वतंत्र जाले उपरांत गोंय पुर्तुगेज राजवटींतल्यान मुक्त जालें. गोंय उसरां मुक्त जाल्लें आसलें तरी तो देशाचो भाग आसा. म्हज्या नांवा मुखार हांव पयलीं भारतीय लायतलों. आमच्या देशांत तरेकवार भाशा आसल्यो, तरेकवार धर्म आसले तरी आमचो देश एक आसा. भारताच्या विविधतायेंत एकचार आसा अशें कार्दिनाल फेर्रांव हांणी सांगलें.
भारतांत तरेकवार धर्माचे लोक रावतात. देशाची संस्कृताय, तरेकवार धर्म, भास हातूंतल्यान निर्माण जाल्या. हें खाशेलेपण सांबाळपाची जापसालदारकी सगल्यांचेर आसा. युगोस्लाव्हियाचें आतां विघटन जालां. सर्बिया, झेकोस्लाेव्हिया अशें देश तयार जाल्यात. अशें आसून लेगीत काय लोक नांवा मुखार युगोस्लाव्हिया लायतात. हांव म्हज्या नांवा मुखार भारतीय अशें लायतलों. गोंयकार लावचो ना, अशें फिलीप नेरी फेर्रांव हांणी सांगलें.
देवाच्या आशिर्वादान तशेंच देवाक शरण वचून हांवें कार्दिनाल पदाचो स्विकार केला. जिझसा कडल्यान उर्बा घेवन हांव समाज तशेंच संवसाराची सेवा करता. कार्दिनाल पदाचेर बडटी मेळिल्ल्यान म्हजी जापसालदारकी आतां वाडल्या. पोप फ्रान्सीस हांचे सयत कार्य करपाची संद म्हाका मेळ्ळ्या. दोन दिसांंनी बँकोक हांगा आशियांतल्या धर्मगुरुंची परिशद जातली. हे परिशदेक हांव हाजीर रावतलों अशें कार्दिनाल फेर्रांव हांणी सांगलें.
इतिहासाचो अभ्यास आनी जतनाय गरजेची : राज्यपाल पिल्लई
हांव कायद्याचो विद्यार्थी आसा. कायद्यांत भारतीय घटनेचो अभ्यास करपाची संद म्हाका मेळ्ळी. सर्व धर्म समभाव हाचेर कायदे तशेंच घटना आधारीत आसा. इतिहासाचो अभ्यास करपा सयत ताची जतनाय जावपाची गरज आसा. ख्रिश्ननिटी युरोपा पयली भारतांत पावली, अशें संदर्भ इतिहासांत मेळटात. हे विशीं वेगळींवेगळीं मतां आसात. भारताची संस्कृताय, विविधताय, तरेकवार धर्म, भास हें सगलें समजून घेवपा खातीर इतिहासाचो अभ्यास आसपाची गरज आसा, अशें राज्यपाल पी एस श्रीधरन पिल्लई हांणी सांगलें.
फिलीप नेरी फेर्रांव हांचे कडल्यान मानवतायेची सेवा : मुख्यमंत्री
फिलीप नेरी फेर्रांव हे 2004 वर्सा आर्चबिशप जाले. आर्चबिशप जावन ते गोंयच्या समाजाची सेवा करताले. आता ते कार्दिनाल जाल्यात. पुराय संवसाराची सेवा करपाची संद आतां तांकां मेळ्ळ्या. गोंय आसूं वा संवसार तांचे कडल्यान मानवतायेची सेवा जाल्या. देशांत तरेकवार धर्म आसात. तरेकवार पंथ आसा. मानवतायेचे सेवेची शिकवण सगले धर्म दितात अशें मुख्यमंत्री डॉ. प्रमोद सावंत हांणी सांगलें.
फिलीप नेरी फेर्रांव हांचे कडल्यान मोलादीक सल्लो : मॉवीन गुदिन्हो
फिलीप नेरी फेर्रांव हांणी समाज तशेंच गोंयकारांक आर्चबिशप ह्या नात्यान मोलादीक सल्लो दिला. काय वेळार तांणी सरकाराचेर टिका लेगीत केल्या. आर्चबिशप म्हूण तांणी जी सेवा दिल्या, ताची तोखणाय पुराय देशांत जाल्या. आतां ते कार्दिनाल जाल्यात. कार्दिनाल पदाचेर गोंयच्या आर्चबिशपाची निवड जावप हे अभिमानाची गजाल आसा. दर एके गोंयकारां खातीर ही खोशयेची गजाल आसा. तांचे सेवेक हाचे फुडें पुराय संवसारांत मान मेळटलो अशें येरादारी मंत्री मॉवीन गुदिन्हो हांणी सांगलें.
कार्यावळीक म्हायती तंत्रज्ञान खात्याचे मंत्री रोहन खंवटे, भौशीक बांदकाम खात्याचे मंत्री निलेश काब्राल, आमदार कार्लोस फेरेरा, उपसभापती ज्योशुआ डिसोझा तशेंच हेर मानेस्त हाजीर आशिल्ले.
निसुवार्थी सेवेची जापसालदारकी वाडली: फेर्रांव
कार्दिनाल म्हूण निवड जाले उपरांत देशभरांतल्यान मेळिल्ल्या मोगान हांव भारावन गेलां. प्रधानमंत्री नरेंद्र मोदी हांणी वैयक्तीक पत्र बरोवन केल्ली तोखणाय विशेश भावली. खंयच्याय पदार नेमणूक जाली तरी आमी सगले देवाचे सेवकूच आसात. ताका लागून नम्रपणान निसुवार्थी सेवा दिवपाची जापसालदारकी आनीक वाडल्या. म्हजे खातीर सदांच देश पयली आसा. म्हजे जापसालदारकी कडेन हांव सदांच कटिबद्ध आसतलों अशें कार्दिनाल फिलीप नेरी फेर्रांव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
