आमदार आर्लेकारा आड पेडणे पुलिसांत जाती वाचक शब्द वापरिल्ल्याची कागाळ

आमदार प्रवीण आर्लेकार हांचे आड पुलीस कागाळ केल्या उपरांत पत्रकारांक म्हायती दितना प्रशांत धारगळकार, मनोहर धारगळकार, संजय बर्डे आनी हेर

भांगरभूंय | प्रतिनिधी

भांगरभूंय । प्रतिनिधी
पेडणेः पेडणे मतदारसंघाचो आमदार प्रवीण आर्लेकार हांणे आपल्याक जाती वाचन शब्द वापरून मारपेट करपाची धमकी दिल्ल्याची कागाळ धारगळच्या प्रशांत वसंत धारगळकारान पेडणे पुलीस स्टेशनांत केल्या.  निरीक्षक दत्ताराम राऊत हाणे कागाळेची दखल घेवंन तपास करतले, अशें सांगलां.
प्रशांत धारगळकार हे दलित समाजांतले आसात. दलितां खातीर राखीव आशिल्ल्या पेडणे मतदारसंघातल्यान आमदार जाल्ल्या प्रवीण आर्लेकारान पुलीस स्टेशनांत  म्हजे जातीचो उल्लेख करून म्हाका सकल बसपाक सांगले, उपरांत मारपेट करपाचो यत्न केलो अशें धारगळकारान शुक्राराक पुलीस स्टेशनांत कागाळ केल्या उपरांत थळाव्या पत्रकारांक सांगलें. एका अपघाता संबंदी चवकशी करपा खातीर फाटल्या 16 डिसेंबराक पेडणे पुलीस निरीक्षकान आपल्याक दनपारां पुलीस स्टेशनांत येवपाक सांगिल्लें आनी सुमार चार वरां बसोवन दवोरलें. उपरांत आर्लेकारान पुलीस स्टेशनांत येवंन जाती वाचक शब्दांत अपमान करून म्हाका लाथ मारपाक पांय उबारलो अशें धारगळकारान पत्रकारांक सांगलें.
आमदार आर्लेकारान एके भौशीक कार्यावळींत  मोपा विमातळाक मनोहर पर्रीकार हांचें नांव दिवपाच्या मुद्द्या वयल्यान भौशीक प्रकल्पांक जे मेल्यांत तांचींच नांवा दितात, जिते आसात तांचीं नांवां दिनात अशें सांगिल्ले. ताचो संदर्भ घेवन धारगळकारान एक व्हिडिओ तयार करून गुजरातांतल्या एका क्रिकेट स्टेडियमला नरेंद्र मोदी हांचें नांव दिल्ल्याची याद करून दिवंन तो व्हिडिओ सोशल मीडियाचेर घातिल्लो. सत कितें तें समजून घेवन मागीर उलोवपाचो सल्लो तांणे आर्लेकाराक दिल्लो. त्या रागान ताणे आपल्याक जाती वाचक शब्द  वापरून मारपेट करपाची धमकी पुलिसां सामकार दिली असो धारगळकाराचो दावो आसा.
धारगळकाराक तेंको दिवपा खातीर धारगळचो जिल्हो पंचायत वांगडी मनोहर धारगळकार आनी काँग्रेस पक्षाचो म्हणयारो संजय बर्डे हाजीर आशिल्लें. प्रवीण आर्लेकारान आपल्याच एक दलित भावाक दिल्ले वागणुके आड गोंयांतल्या दलित समाजांत जाग्रुताय करून ताचें आड कारवाय करपाची मागणी करतले अशें मनोहर धारगळकारान सांगलें. मजगतीं आर्लेकार हाचो पीए ओंकार गोवेकारान शुक्राराक सांजे पांच वरांचेर आर्लेकार पत्रकारां कडेन उलयतलो अशें सांगलें. मात कार्यालयांत आसून लेगीत आर्लेकार पत्रकारां कडेन उलोवपाक आयलेच नात.