भांगरभूंय | प्रतिनिधी
पूण स्वातंत्र्य सैनीक दादा भट हांच्या घराची मात आवतिकाय; सरकारूय करता आडनदर
फोंडें: गोंयचे सुटके खातीर स्वातंत्र्य सैनिकांनी बलिदान दिल्ल्यान गोंयची सुटका जाली हें कोणूच न्हयकारूंक शकना. गोंय मुक्ती उपरांत सत्तेर आयिल्ल्या दरेक सरकारांतल्या आमदारांनी आनी मंत्र्यांनी लाखांनी रुपया खर्च करून स्वता खातीर घरां बांदलीं. पूण गोंय मुक्ती खातीर म्हत्वाचें योगदान दिल्ल्या स्वातंत्र्य सैनिकांच्या कुटुंबाक मात हालाकिचे दीस काडचे पडटात. ते खातीर स्वातंत्र्य सैनीक काय राजकी फुडारी व्हड हे विशीं कांय जाणां मदीं गोंदळ निर्माण जाला.
धारबांदोडें म्हालांतल्या किर्लपाल पंचायत वाठारांतल्या शेमेल हांगा गोंय मुक्ती खातीर म्हत्वाचें योगदान दिल्ले स्वातंत्र्य सैनीक दादा भट हांच्या घराची सद्या आवतिकाय जाल्या. घर कोसळपाच्या मार्गार आसा. दादा भट हांच्या नांवान कांय वर्सां पयलीं वाघोण रस्त्याक नांव दिलें खरें. पूण दादा भट हांच्या घरा वचपा खातीर धड रस्तोय ना. दादा भट हयात नासले तरी तांची सून कल्पना देसाय पूत, सून आनी नातरां सयत त्याे घरांत रावतात. मोडकुळेक आयिल्लें घर कोसळून एखादी दुर्घटणा लेगीत हांगा घडूंक शकता.
शेमेले हांगा सावन लागींच आशिल्ल्या वडामळ हांगा पयलीं गोंयचे खूबशे स्वातंत्र्य सैनीक संदेश घेवन यो-वच करताले. संदेश घेवन येवपी स्वातंत्र्य सैनिकांक जेवण, खावपाची वेवस्था लेगीत दादा भट आनी हेर वांगडी करताले. गोंय मुक्ती उपरांत सरकारान थंय हायस्कूल उबारून वाठारांतल्या विद्यार्थ्यांक शिक्षणाची सोय केल्ली. पूण उपरांत तें हायस्कूल बंद केल्ल्यान थंय सद्या मोडकुळेक आयिल्ल्यो दोन इमारती उब्यो आसात. दोनूय इमारतींचीं पाखीं कांय वर्सां पयलीं मातयेभरवण जालीं.
कांय वर्सां पयलीं मुंबयंत आतंकवादी हल्ल्यांत अटक केल्लो आतंकवादी कसाबाक पुलिसांनी अटक केल्ली. कसाबा सारक्या आतंकवाद्याचे सुरक्षे खातीर सरकारान कोट्यांनी रुपयांचो चुरो केलो. पूण एका सामान्य आनी गोंय सुटके खातीर म्हत्वाचें योगदान दिल्ल्या दादा भट सारक्या स्वातंत्र्य सैनिकांच्या कुटुंबा कडेन सरकार लक्ष दिना हें दुर्दैवी आशिल्ल्याचें थळावे तरणाटे प्रताप देसाय हांणी सांगलें.
रोहिदास नायक हांणी दादा भट आनी तांच्या वांगड्यांनी गोंय मुक्ती खातीर दिल्लें योगदान थळावे लोक केन्नाच विसरचे नात. पूण सरकारान हाची नोंद घेवन दादा भट सारक्या स्वातंत्र्य सैनिकाच्या घरा कडेन वचपा खातीर रस्तो तयार करून दिवपा बरोबरूच घराची दुरुस्ती करून तांच्या कुटुंबांक थाकाय मेळोवन दिवपाची गरज आशिल्ल्याचें सांगलें.
गोंयांतल्या खूबशा स्वातंत्र्य सैनिकांनी दिल्ल्या योगदानाक लागून गोंयाक मुक्ती मेळ्ळी. गोंय मुक्ती उपरांत सत्तेर आयिल्ल्या सरकारांतले दरेक आमदारांनी, मंत्र्यांनी स्वताच्या कुटुंबा खातीर लाखांनी रुपया खर्च करून घरां उबारिल्ल्याचें दिसून येता. पूण स्वातंत्र्य सैनिकांच्या कुटुंबा कडेन गंभीरतायेन कोणूच लक्ष दिनात. गोंयची पुर्तुगेज राजवटींतल्यान सुटका जाल्ल्यान खूबशे जाण आमदार, मंत्री जाले हाची जाण लेगीत नाशिल्ल्याची खंत थळावे तरणाटे प्रताप देसाय हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
