भांगरभूंय | प्रतिनिधी
देशाच्या राजकी मैदानार आम आदमी पार्टीचें अस्तित्व आतां फक्त पंजाबांत तिगून आशिल्ल्याचें वयले वयर दिसून येत आसलें तरी, ज्या दिल्लींतल्यान ह्या पक्षान धा बारा वर्सां आदीं आपलो जो वेगळोच दबदबो देशभर निर्माण केल्लो त्या देशाच्या राजधानितूच ह्या पक्षाची सद्या जी दुर्दशा जाल्या ती पळयत जाल्यार, ह्या पक्षाक राजकी फुडार आसा अशें म्हणप धाडसाचें जातलें. दिल्लींत तिट्टी इंजीन आशिल्लें सरकार अधिकाराचेर येत सावन आम आदमी पार्टी दिल्लींत भुंयसपाट जाल्ली आसून पक्षाचे फुडारी अरविंद केजरीवाल आनी हेर राजकी मळार हालींच्या दिसांनी दिसून लेगीत येनात. देशभर दिल्ली मॉडेल सरकाराची जायरात करीत भोंवपी ह्या पक्षा मुखार आतां अशें कांयच शिल्लक उरिल्लें ना की लोकां मुखार येवन तांणी परतून राजकी मळार नव्यान झेंप घेवपा खातीर प्रयास करचो. दिल्लींत म्हानगरपालिकेतलें वर्चस्व लेगीत चुकीचे रणनितीक लागून व्हगडायले उपरांत ह्या पक्षा कडेन आतां देशा मुखा वेल्यो कांय जिव्यो समस्या वा प्रस्नांचेर उलोवपाचो त्राण उरला अशें दिसून येना. दिल्लीच्या म्हापौर आनी उपम्हापौरपदाचे वेंचणुकेंत भारतीय जनता पक्षाक बिनविरोध मुखार चाल दिवपाची पाळी आम आदमी पार्टीचेर कित्याक येवची हाचें कुवाडें अजून लेगीत सुटना. आतां तर दिल्लींत ह्या पक्षांत उबी फूट पडल्या आनी तांच्या एकूण अस्तित्वाचो प्रस्न उपस्थीत जाला.
दिल्ली म्हानगरपालिकेंतल्या कितल्याशाच वर्सांचीं सत्ता हातांतल्यान गेले उपरांत पक्षांत पडिल्ली फूट हो आदमी पार्टी खातीर मोटो धपको थारला. पक्षाच्या मुळाव्या वांगडीपदाचो राजिनामो दिवन म्हानगरपालिकेंतल्या तांच्या पंदरा वीस वांगड्यांनी नव्या पक्षाची स्थापणूक करप हाची अपेक्षा अरविंद केजरीवाल वा हेर फुडाऱ्यांनी सपनांत लेगीत पळयिल्ली नासुये. पूण घर घुंवलें म्हणटकूच घराचे वाशेय कशे घुंवतात हें दिल्लीत ह्या पक्षांत सद्या जें कितें चल्लां तें पळयल्यार कळून येता. हाका लागून सहाजिकूच देशभर पक्षाच्या विस्तारा खातीर जे प्रयास चालू आसात ताचेर प्रतिकूल परिणाम जालो ना जाल्यार तें नवलायेचें थारुये. गोंयांतूय ताचो फटको पक्षाक बसूंक शकता. दिल्ली विधानसभा वेंचणुकेंत अनअपेक्षीत अशी व्हड हार खावची पडिल्ल्यान ह्या पक्षाच्या फुडाऱ्यांनी आत्मविस्वास पुरायपणान व्हगडायला. तातूंतल्यान हे फुडारी अजून सांवरूंक नात इतलेंच म्हणचें पडटलें. विधानसभेंत णव्वद टक्क्या परस चड सुवातो ज्या पक्षा कडेन आशिल्ल्यो तांचेर तीस बत्तीस टक्के इतल्योच सुवातो येवच्यो हें खरें म्हणल्यार कोणाकूय सहजपणान विस्वास दवरपाची गजाल निश्चितूच नाशिल्ली. पूण दुर्दैव अशें की आम आदमी पार्टीच्या फुडाऱ्यांक आपल्या व्हड हारीचीं कारणां अजून लेगीत सोदून काडूंक आयलीं नात. भारतीय जनता पक्षा मुखार साश्टांग नमस्कार घालून आयज हे फुडारी खंय तरी बसून आशिल्ल्याचें जें चित्र दिसता तें पळयत जाल्यार ह्या पक्षाक अजून लेगीत फुडार आसा अशें कोणूच म्हणचो ना.
फाटल्या फेब्रुवारी सावन आम आदमी पार्टीक जी गळटी लागल्या ती अजून थांबपाचें नांव तर घेच ना, उरफाटें तांचे पांय आनीक खोल वचत आशिल्ल्याचें दिसून येता. विधानसभा वेंचणुकेंत जें व्हगडायलें तें मान्यूय केलें तरी दिल्ली म्हानगरपालिकेंत सुमार समसमान बळ आसून लेगीत म्हापौर, उपम्हापौरपदाचे वेंचणुकेंत आपलो उमेदवार लेगीत उबो करपाचें धाडस हो पक्ष दाखोवंक शकलो ना, हाची जाप आयजूय ह्या पक्षाचे फुडारी दिवंक शकनात हें कसलें लक्षण? पक्षाच्या कार्यकर्त्यांचो आत्मविस्वास उंचावपा खातीर व्हड धाडसान प्रतिस्पर्धी पक्षा सामकार वचपाची गरज आसतना धवो बावटो दाखोवन आत्मघातच करून घेतले उपरांत आयज जे परिस्थिती कडेन मुकाबलो करचो पडटा तें टाळप अशक्यूच आशिल्लें. म्हानगरपालिकेंत सत्ता आसून लेगीत आपलें कोणूच कांयच करूंक शकचो ना ह्याच भ्रमांत मनाक येता अशें सत्ता राबोवपाचो जो यत्न जाला होच आम आदमी पक्षाच्या आंगार आयिल्ल्याचें स्पश्ट निश्कर्श काडटात आनी तातूंत चुकीचें कांयच ना. इमानदारीचें राजकारण करपाचें आस्वासन दिवन सगल्यांत पयलीं दिल्ली जिखपी आम आदमी पक्षान तें प्रत्यक्ष कृतींत हाडलें? ह्या प्रस्नाची जाप नकारार्थीच आसा. हाचें कारण म्हणल्यार अरविंद केजरीवाल हांचे सयत पक्षाचे सगलेच वरिश्ठ फुडारी खंयच्या ना खंयच्या घोटाळ्याक लागून बंदखणींत वचून आयल्यात. ताका लागून इमानदारीचें राजकारण करपाच्या तांच्या दाव्यांतलो वारोच गेला. ताचेंच मोल ‘आप’च्या ‘इनामदार’ फुडाऱ्यांक आयज मेजचें पडटा. आतां पंजाबूय हातांतल्यान वचत जाल्यार तें अजाप दिसपा सारकें ना.
दिल्लींत आपल्या बालेकिल्ल्यांतूच आम आदमी पार्टीची अशी दुर्दशा जाले उपरांत काँग्रेसी सयत हेर विरोधी पक्ष आतां तांच्या वाऱ्याक लेगीत उबो रावपाची शक्यताय उणीच आसा. काँग्रेस पक्षाची सुवात आम आदमी पार्टी घेतली असो एक विस्वास एकवेळ लोकांक दिसतालो आनी खरें म्हणल्यार तशेंच कितेंशें वातावरणूय तयार करपाक अरविंद केजरीवाल हांकां तांच्या सुरवातीच्या पांच स वर्सांत येसूय आयिल्लें. पूण सत्ता तकलेक मारले उपरांत जें घडटा तेंच तांचे विशीं घडलें. आतां हो पक्ष परतून नव्यान रुजोवप आनी अस्तित्व तिगोवन दवरप हें केजरीवालां खातीर सोंपी गजाल मुळांतूच ना आनी तांकांय तें कळून चुकलां आसुये. पाकिस्ताना कडेन हालींचे दोन दिसांचें झूज आसूं वा ताचे आदींचो पहलगामांतलो आतंकवादी हल्लो. अरविंद केजरीवाल हांणी ताचेर एक उतर लेगीत काडलें ना. हातूंतल्यान खूब कितें अर्थ काडूंक येतलो. सत्तेचें केंद्रीकरण, एकाधिकारशायेची प्रवृत्ती आनी पक्षांगर्तत चालू आशिल्ली हुकुमशाय हीच आम आदमी पार्टीची सद्याची अवस्था जावपाचीं मुखेल कारणां आसात. आमचो पक्ष सोंपोवपा खातीर भाजपा कडल्यान साजीश रचली असो आरोप प्रियंका कक्कड बी फुडारी करीत आसले तरी राजकारण म्हणलें की ह्यो सगल्यो गजाली आयल्योच हाची जाण नासत जाल्यार आतां आड्डी मारून कांयच साध्य जावचें ना. आम आदमीन आत्मचिंतन करपाचो सल्लो ताका लागून भाजपान तांकां दिला. काँग्रेस फुडाऱ्यांनी आपले हात कुशीक काडून मेकळे जावप सभाविकूच आसा. आम आदमी पार्टी मुखार आतां आपलें अस्तित्व तिगोवन दवरपाचें व्हड संकश्ट उबें येवन रावलां आनी तांच्या फुडल्या पवित्र्याचेरूच खूब कितें निंबून आसा. आपले जाल्ले दुर्दशे खातीर फक्त भाजपा आड आड्डी मारून तातूंतल्यान कांयच साध्य जावचें ना. कांय खर निर्णय घेवनूच आपलें अस्तित्व रागून दवरपा खातीरची लडाय ‘आप’क लडची पडटली.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
