भांगरभूंय | प्रतिनिधी
पावसा पयलींच्या कामां खातीर पंचायत, पालिकांक मेळटलो निधी
पणजीः पावसाच्या दिसांनी निर्माण जाल्ली खंयचीय आपत्ती वा समस्या आयल्यार ती नोंद करुन ताचेर उपाय काडपा खातीर दरेका खात्यांत समन्वय अधिकारी नेमपाचो आदेश मुख्यमंत्री डॉ. प्रमोद सावंत हांणी दिला. तशेंच पावसा पयलींच्या कामां खातीर पंचायतींक दरेकीं 35 हजार रुपया, पालिकांक 60 हजार रुपया (ब गट) आनी एक लाख 10 हजार रुपया (अ गट) दितले. राज्य आपत्ती वेवस्थापन प्राधिकरणाचे बसके उपरांत मुख्यमंत्री डॉ. सावंत हांणी ही म्हायती दिल्या.
पर्वरी मंत्रालयांत राज्य आपत्ती वेवस्थापन प्राधिकरणाची बसका मुख्यमंत्री डॉ. प्रमोद सावंत हांचें अध्यक्षतेखाला जाली. हे बसकेंत महसूल मंत्री बाबूश मोन्सेरात, मुखेल सचीव डॉ. डॉ. वी. कांडावेलू, जिल्लोधिकारी आनी खात्यांचे अधिकारी हाजीर आशिल्लें. आपत्ती वा दुर्घटना जाल्यार मोबायल फोनांतल्यान फोन करतना पयलीं 0832 कोड डायल करून उपरांत 112 नंबराचेर फोन करचो असो उलो मुख्यमंत्र्यांनी केलां.
० भौशीक बांदकाम खात्यान धोक्याची बांदकामां वळखून ताचेर उपाय करचे. गरज पडल्यार धोक्याची बादकामां मोडून उडोवपाचेय आदेश बसकेंत दिल्यात.
० पावसाळ्यांत हुंवार येवचो न्हय हे खातीर न्हंयतलें गाळ काडपाचे आदेश उदका संसाधन खात्याच्या अधिकाऱ्यांक दिल्यात.
० पावसाच्या दिसांनी दुर्घटना घडल्यार वा आपत्ती जाल्यार ताचें लुकसाण उणें करपा खातीर जिल्लो जिल्होधिकाऱ्यांक सादूर रावपाची आनी उपाय करपाची सुचोवणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
