भांगरभूंय | प्रतिनिधी
पणजी : निलेश काब्राल हांकां काडून आलेक्स सिक्वेरा हांचो मंत्रिमंडळांत आस्पाव केल्या उपरांत येवपी कांय दिसांनी गोंयच्या मंत्रिमंडळांत आनीक कांय बदल जावपाचे आसात. आनीक दोग मंत्र्यांक काडून तांचो जागो हेर आमदारांक दितले.
येवपी चार- पांच दिसांनी मुख्यमंत्री डॉ. प्रमोद सावंत दिल्लींत पक्षश्रेश्ठीं कडेन चर्चा करतले. ३ डिसेंबराक पांच राज्यांतल्या विधानसभा वेंचणुकेचो निकाल जाहीर जातलो. उपरांत भाजपच्या केंद्रीय कार्यकारिणीतूय कांय बदल जातले.
मजगती, गोंयच्या मंत्रिमंडळांत बदल करपाच्या प्रस्तावाचेर पक्षश्रेश्ठीनी शिक्को मारल्या उपरांत रोखडेच बदल जातले, अशी म्हायती सुत्रांनी दिली.
दिगंबर कामत हांचे वांगडा कॉंग्रेसीच्यान भाजपांत आयिल्ल्या आनीक एका आमदाराक मंत्रिपद मेळपाक शकता. पयलेच फावट आमदार जाल्ल्या एका आमदाराचो विचार जावं येता. पक्षांतरा वेळार त्या आमदाराकूय मंत्रिमंडळांत सुवात दिवपाचें भाजपान आस्वासन दिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
