भांगरभूंय | प्रतिनिधी
गोंयांत पांचव्या अधिसुची प्रमाण आदिवासी वाठार जाहीर केल्लो ना
पणजी: घटनेच्या पांचव्या अधिसुची प्रमाण गोंयांत अजून आदिवासी वाठार जाहीर केल्लो ना. राष्ट्रीय एसटी आयोगा कडल्यान राष्ट्रपतींक सादर केल्ल्या अहवालांत हे विशीं शिफारस करतले अशी म्हायती आयोगाचे अध्यक्ष अंतर सिंग आर्या हांणी दिली. काल (बुधवारा) पणजेंत जाल्ले पत्रकार परिशदेंत ते उलयताले. ह्या वेळार डॉ. आशा लकरा आनी निरुपम चकमा हाजीर आशिल्ले. ताचे पयलीं आयोगान विवीध खात्याचे संचालक, पुलीस म्हासंचालक हांचे कडेन बसका घेतली.
आर्या हांणी सांगलें, देशांतल्या णव राज्यांत अशे विशेश आदिवासी वाठार जाहीर केल्यात. गोंयांत एसटी समाजाची लोकसंख्या सुमार 12 टक्के आसा. पूण देशाचे तुळेन गोंयाक उसरां स्वातंत्र्य मेळिल्ल्यान हांगा घटनेच्या पांचव्या अधिसुची प्रमाण आदिवासी वाठार जाहीर जाल्लो ना. हे विशीं आपूण मुख्यमंत्री तशेंज राज्यपालां कडेन चर्चा केल्या. विधानसभा वा राज्यपाल कचेरे वरवीं असो प्रस्ताव राज्य सरकारान केंद्रा कडेन धाडपाची शिफारस आमी केल्या.
तांणी म्हणलें, आयोगान फाटले तीन दीस विवीध खात्यांचे संचालक, आदिवासीं खातीर काम करपी संस्था, आदिवासी फुडाऱ्यां कडेन चर्चा केल्या. गोंयांतल्या आदिवासी समाजाच्यो अपेक्षा आमी समजून घेतल्यात. जमीन नांवार नाशिल्ल्यान कांय जाणांनी केंद्र तशेंच गोंयांतल्या येवजण्यांचो लाव घेवंक मेळनाशिल्ल्याचें आमकां समजलां. हे खातीर समाजांतल्या व्यक्तींचे रानांहक्क, जमीन मालकी हक्कांचे दावे जाता तितले बेगीन निकालांत काडपाची शिफारस लेगीत आमी केल्या. तशेंच गोंयांत आदिवासी राबितो घराची शिफारस लेगीत केल्या.
आमकां मेळिल्ले म्हायती प्रमाण गोंयांत आदिवासी समाजा खातीरचीं कामां बरे पद्दतीन सुरू आसा. देशभरांतल्या आदिवासी समाजाक न्याय मेळचो, तांच्या अधिकारांची राखण जावची, नोकरी, बडटी, निवृत्ती वेतन मेळयतना तांचेर अन्याय जावचो न्हय हे खातीर आयोग यत्न करतलो.
फुडल्या काळांत आमी समाजांतले तरणाटे पिळगेचेर लक्ष केंद्रीत करतले. तरणाटो वर्ग देशाचो फुडार आशिल्ल्यान आमी आतां सावनूच तांकां मार्गदर्शन करतले अशें आर्या हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
