भांगरभूंय | प्रतिनिधी
तीन दुचाकी लासून गोबर; सुमार 20 लाखाचें लुकसाण
म्हापशें फ्रेतसवाडो वेर्ला हांगा आदले दुस्मानकायेंतल्यान मांद्रेंकार कुटुंबांच्या मालकिच्या चार गाडयांक उजो घालून लासून उडयल्यो. ह्या प्रकरणांत म्हापशें पुलिसांनी आलेक्सो हिरिरियो पिंटो (फ्रेतसवाडो, वेर्ला) हाचे आड गुन्यांव दाखल केला.
ही घडणूक फांतोडेर 4.30 ते 5 मजगतीं घडली. कागाळदार योगेश मांद्रेंकार कुटुंबान आपलीं वाहनां पार्कींग शेडींत डिओ, स्प्लेंडर आनी फसिनो ह्यो तीन दुचाकी आनी स्विफ्ट मोटार सदचे प्रमाण सोमारा पार्क करून दवरिल्ल्यो.
ह्या गाडयांक फांतोडेर उजो घालो. फांतोडेर 5 वरांच्या सुमाराक कसल्या तरी फुटपाच्या आवाजान मांद्रेंकार कुटुंबाक जाग आयली. तांणी घरा भायर धांव घेतली. तेन्ना गाडयो उज्यांत लासत आशिल्ल्याचें तांचे नदरेक आयलें. तांणी रोखडीच धांव घेवन आनी उदक मारून उजो पालयलो. तो मेरेन तिनूय दुचाकी लासून गोबर जाल्ल्यो. जाल्यार स्विफ्ट मोटारीक लेगीत उज्याची झळ बसली.
हे दुर्घटणे विशीं योगेश मांद्रेंकार हांणी शेजारी आलेक्सो पिंटो हाचेर दुबाव उक्तायला. मालमत्तेचे आदले दुस्मानकायेंतल्यान ताणेंच उजो लायलो आनी आपलें सुमार 20 लाखाचें लुकसाण केल्ल्याचो दावो करीत पुलीस कागाळ केल्या.
ते प्रमाण पुलिसांनी दुबावीत पिंटो हाचे आड भादंसंच्या 451 आनी 435 कलमा खाला गुन्यांव दाखल केला. फुडलो तपास पुलीस उपनिरिक्षक विराज कोरगांवकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
