भांगरभूंय | प्रतिनिधी
छत्रपती शिवाजी महाराज हांची आयज जयंती. पुराय भारतीयां खातीर ते आदर्श. तांचे विचार, शिकवण आमी आचरणांत हाडपाक जाय.
मराठा साम्राज्याचे संस्थापक छत्रपती शिवाजी महाराज हे भारतीय इतिहासांतले एक आदरणीय मनीस. 19 फेब्रुवारी 1630 दिसा महाराष्ट्रांतल्या शिवनेरी किल्ल्यार जल्मल्ले शिवाजी हे एक आख्यायिका जाल्ले झुजारी, न्याय्य राज्यकर्ते. जुलूमाक प्रतिकार करपाचें, संघर्शाचें प्रतीक म्हूण तांकां पळयतात. ताचें जिवीत म्हणल्यार धैर्य, देशभक्ती आनी जिद्द.
शिवाजी महाराजांच्या सुरवेकच्या जिवितांत कश्ट आनी संघर्श अशें चित्र आशिल्लें. ताचे बापूय शहाजी भोसले आनी आवय जिजाबाई हांणी महाराजांच्या जिविताक आकार दिवपाक म्हत्वाची भुमिका केली. तांच्या जिविताचीं मार्गदर्शक तत्वां जावपी धिटाय, मान आनी न्याय हीं मुल्यां तिणें महाराजा मदीं रुजयलीं.
शिवाजी महाराज व्हड जातकच मोगल साम्राज्याच्या जुलमी सत्ते आड आनी आपल्या लोकांचें परकी लोकां कडल्यान शोशण जातालें,ताचे आड लढलो. परकी वर्चस्वा पसून मुक्त जावन स्वराज्य स्थापन करपाचें सपन तांणी पळयलें. ह्या दृश्टीकोनान तांणी मोगल साम्राज्या आड चळवळ सुरू केली. कांय तेंपान तें ‘मराठा साम्राज्य’ जालें.
शिवाजी महाराजांची लश्करी मोहीम ही आख्यायिकांची गजाल. तांणी गुरिल्ला झुजाचो प्रकार सोदून काडलो. जीं दुस्मानाच्या परंपरीक, संख्येच चड आशिल्ल्या सैन्या आड प्रभावी थारली. तांच्या शौर्य आनी रणनितीच्या विचारांक लागून ताका पन्हाळगढ आनी प्रतापगड झुजा सयत जायतीं जैतां मेळ्ळीं. ते एक न्याय्य राज्यकर्ते आशिल्ले. तांणी हिंदू संस्कृतायेचो प्रचार करून आपल्या लोकांक जुलूमांतल्यान राखण दिली. मात केन्नाच हेर जाती, धर्मांचो दुस्वास केलो ना. तांकां दुय्यम लेखले नात. तांची प्रशासकी पद्दत कार्यक्षम आशिल्ली. बरी संघटना तांणी उबी केली. ताका लागून लोकांचें कल्याण आनी समृद्धी सुनिश्चीत जाली. तांणी शेतकी, वेपार, कारागिरांक प्रोत्साहन दिलें,. घटमूट आनी जगपाक गरजेची आशिल्ले अर्थवेवस्थेची बुन्याद घाली.
भारतीय इतिहासाचेर शिवाजी महाराजांचो व्हडलो प्रभाव आसा. भारतीयांच्या पिळग्यांक तांणी आपल्या स्वातंत्र्या खातीर आनी आत्मसम्माना खातीर झुजपाची प्रेरणा दिली. तांचें धाडस, रणनिती आनी न्यायाची वचनबद्धताय संवसारभरांतल्या लोकांक मोहित करीत आयल्या. ते अत्याचार आनी जुलूम हांचे आड प्रतिकार करपाचें एक बळिश्ट प्रतीक थारल्यात. डोंगरायेदीं आव्हानां लेगीत धैर्य, निश्चय आनी जिद्दीन पयस करूं येतात, हें तांणी दाखोवन दिलां.
पुराय भारतीयां खातीर छत्रपती शिवाजी महाराज हे आदर्श. तांचे विचार आमी आचरणांत हाडपाक जाय. तांणी सगल्यांक वांगडा घेवन स्वराज्य उबें केलें, ताचो आदर्श आमी घेवंक जाय. जयंती निमतान ह्या म्हान राजाक आदरांजली.
– अक्षदा सावंत देसाय
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
