आतां ‘मनोहर’ नांवा वयल्यान वाद

भांगरभूंय | प्रतिनिधी

भाजपा म्हणयाऱ्याचीय हरकत; मनोहर पर्रीकार नांवूच योग्य आशिल्ल्याचें म्हणणें

भांगरभूंय । प्रतिनिधी

पणजीः मोपा विमानतळाच्या उक्तावणा उपरांत लेगीत नांवाचो वाद चालूच आसा. फक्त ‘मनोहर’ हें नांव दिवप अयोग्य आसा. मनोहर पर्रीकार विमानतळ अशें नांव दिवप योग्य थारपाचें, अशी चर्चा आतां सुरू जाल्या. काँग्रेसीचे आमदार अॅड. कार्लोस फरेरा आनी भाजपाचे म्हणयारे सावियो रॉड्रिग्स हांणी मनोहर हाचे बदला मनोहर पर्रीकार नांव दिवप योग्य आशिल्लें, अशें मत उक्तायलां.

प्रधानमंत्री नरेंद्र मोदी हांचे हस्तुकीं आयतारा मोपा विमानतळाचें उक्तावण जालें. उक्तावणाची कार्यावळ रंगरंगयाळे पद्दतीन जाली, पूण आदले मुख्यमंत्री प्रा. लक्ष्मीकांत पार्सेकार हांचे सयत काँग्रेस पक्षान कार्यावळीच्या आयोजनाचेर टिका केल्या.

गोंय सरकाराचे मागणे प्रमाण विमानतळाक मनोहर पर्रीकार हांचें नांव दिलां. हो विमानतळ मनोहर ह्या नांवान वळखतले, अशी घोशणा प्रधानमंत्री नरेंद्र मोदी हांणी केली. ताका लागून मोपा विमानतळाचें मनोहर अशें नामकरण जालां.

मनोहर विमानतळ ह्या नांवा वयल्यान विमानतळाक मनोहर पर्रीकार हांचें नांव दिल्ल्याचें स्पश्ट जायना. मनोहर नांवाचे खूब जाण आसात. आपलय् हळदोणें मतदारसंघांत मनोहर नांव आशिल्ले खूब जाण आसात. मनोहर त्र्यंबक आजगांवकार नांवाचे एक आदले मंत्री आसा. अमेरिकेंत आदले राष्ट्राध्यक्ष केनेडी हांचें नांव विमानतळाक जॉन एफ केनेडी विमानतळ अशें दिलां. मनोहर पर्रीकार अशें नांव दिल्लें जाल्यार आदले मुख्यमंत्री पर्रीकार हांचें नांव दिल्ल्याचें सगळ्यांक कळपाचें. मनोहर विमानतळ नांवा वयल्यान पर्रीकार हांचो उगडास जावप कठीण, अशें काँग्रेस आमदार अॅड. फरेरा हांणी म्हणलां. आदले मुख्यमंत्री मनोहर पर्रीकार हांच्या उगडासा खातीर तांचें नांव दिवपाचो निर्णय जाला, मागीर मनोहर इतलेंच नांव कित्याक, असो प्रस्न तांणी उपस्थीत केला.

काँग्रेस हो विरोधी पक्ष. विरोधी पक्षान मनोहर ह्या नांवाक हरकत घेतल्याच. भाजपाचे म्हणयारे सावियो रॉड्रिग्ज हांणी लेगीत हरकत घेतल्या. मनोहर पर्रीकार हे मुख्यमंत्री आशिल्ले तशेंच देशाचे संरक्षण मंत्री आशिल्ले. गोंया सयत हेर राज्यांनी लेगीत तांचें नांव आदरान घेतात. मनोहर विमानतळ ह्या नांवा वयल्यान तांचें नांव दिलां, अशें स्पश्ट जायना. विमानतळाक मनोहर पर्रीकार अशें पुराय नांव दिवप योग्य जावपाचें, अशें तांणी म्हणलां. सगळ्यांत आदीं मोपा विमानतळाक दक्षीण गोंयचे राजकारणी आनी पर्यावरणवाद्या कडल्यान विरोध जातालो. विरोधाची धार उणी जावपाक लागली तेन्ना विमानतळाचो वावर सुरू जालो. विमानतळ पुराय जाले उपरांत भाऊसायब बांदोडकार हांच्या नांवाची मागणी जाली. कांय जाणांनी जॅक सिकेर हांच्या नांवाची मागणी केली. नांवा विशीं वाद आसून लेगीत मनोहर पर्रीकार हांचें नांव दिवपाचो निर्णय जालो. फक्त ‘मनोहर’ ह्या नांवा वयल्यान आतां वाद सुरू जाला. मोपा विमानतळाच्या उक्तावणा वेळार उत्तर गोंयचे खासदार तशेंच केंद्रीय मंत्री श्रीपाद नायक, खासदार विनय तेंडुलकार हे माचयेर आशिल्ले. निमंत्रण पत्रिकेचेर दक्षीण गोंयचे खासदार फ्रांसीस सार्दिन, विरोधी पक्ष फुडारी युरी आलेमांव हांचें नांव नाशिल्लें. हाका काँग्रेस प्रदेशाध्यक्ष अमीत पाटकार हांणी हरकत घेतल्या. काँग्रेस पक्षानूय ताचो निधेश केला. दक्षीण गोंयचे खासदार तशेंच विरोधी पक्ष फुडाऱ्याक उक्तावण कार्यावळीक मान मेळपाची गरज आशिल्ली, अशें अमीत पाटकार हांणी म्हणलां.

गैरवेवस्थापनाचेर काँग्रेसीचो आक्षेप

धारगळ आयुष हॉस्पिटल आनी मोपा विमानतळ हांचें मदलें अंतर सामकें उणें आसा. प्रधानमंत्र्यांक धारगळे वचून आयुष हॉस्पिटल आनी उपरांत मोपा विमानतळाचें उक्तावण करप शक्य आशिल्लें. आयुर्वेदीक काँग्रेसीक वर्च्युअल पद्दतीन संबधीत करप शक्य आशिल्लें. प्रधानमंत्र्यांचे भेटीक लागून पणजे येरादारीची कोंयडी जाल्ली. लोकांक त्रास जाले हाकाय काँग्रेस पक्षान हरकत घेतल्या.

प्रधानमंत्र्यांच्या विधानाक हरकत

स्वातंत्र्या उपरांत वोट बँकेचो विचार करून निधीचें वांटप जालें. मुळाव्या सुलिधांचे उबारणे कडेन फावोशे पद्दतीन लक्ष दिलें ना, अशें विधान प्रधानमंत्री नरेंद्र मोदी हांणी केल्लें. स्वातंत्र्या उपरांत पंडीत नेहरू प्रधानमंत्री आसतना एम्स संस्था स्थापन जाली. ललीत अकादमी, आयआयटी स्थापन जाली. तेन्ना देशाची तिजोरी रिती आशिल्ली. अणू चांचण्यो जाल्यो, उपगिरे सोडले. काँग्रेस राजवटींत मुळाव्यो सुविधा तयार जावपाक सुरवात जाली, अशें काँग्रेस प्रदेशाध्यक्ष अमीत पाटकार हांणी सांगलें आनी प्रधानमंत्र्यांच्या विधानाचेर टिका केली.