भांगरभूंय | प्रतिनिधी
११ फेब्रुवारी २०११ आदीं सावन रावप्यां खातीरूच मेकळीक
पणजी : गोंय आनी उतराखंडच्या लोकां खातीर व्हड समाधान दिवपी गजाल मुखार आयल्या. खाजगी रान वाठारांत चडांत चड २५० चौ. मिटर जाग्यार घरां बांदिल्ल्या धनयांक तीं घरां कायदेशीर करपाक मेळटलीं, अशें पत्र केंद्रीय पर्यावरण मंत्रालयान गोंय आनी उत्तराखंड सरकाराक धाडलां. मात ही मेकळीक फकत ११ फेब्रुवारी २०११ पयलीं सावन रावप्यां खातीरूच आसतली. तशेंच ह्या अश्या वाठारांत संस्थात्मक वा वेवसायीक इमारती उबारपाक बंदी कायम आसतली, अशें पत्रांत स्पश्ट जालां.
रान वाठारांत ह्यान पयलीं गोंय आनी उत्तराखंडांतल्या खाजगी रान वाठारांत बांदकाम करपाक पुरायेन बंदी आशिल्ली. मात रानसंरक्षण कायद्यांत परत सुदारणा केल्यात. ताका लागून खाजगी रानमळांचेर रावपा खातीर घरां बांदपा खातीर आदले वरीं परवानगी घेवपाची गरज ना. असल्या वाठारांक दिल्ल्या कायदेशीर संरक्षणांत मेकळीक दिल्या. पूण ही सुधारणा करतना अशें बांदकाम करपी घर धनयां खातीर मार्गदर्शक तत्वां ह्या पत्रांतल्यान जारी केल्यांत.
हांकां मेळटली परवानगी
१. खाजगी रान वाठारांत रावपा खातीर, चडांत चड २५० चौरस मिटर वाठारांत बांदकाम करपाक परवानगी दितले. पूण खंयच्याच संस्थात्मक इमारती वा वेवसायीक उदरगती खातीर परवानगी दिवचे ना.
२. मसुरी डेहराडून उदरगत प्राधिकरण (MDDA) वाठारांत तशेंच गोंय आनी उत्तराखंडच्या हेर वाठारांनी रावपाक इमारती बांदपा खातीर वा त्यो पुरायेन बांदपा खातीर घर खनयांक जायत्या सम्यांक तोंड दिवचें पडटा. हो त्रास उणो करपा खातीर खाजगी रान वाठारांत निवासी इमारत बांदपाक परवानगी मेळटली.
३. संबंदीत प्रशासकीय यंत्रणांनी वयल्या बांदकामांक परवानगी दितना उण्यांत उणीं झाडां मारप, मातयेचो सांबाळ, दोंगर वाठारांतली स्थिती हांची म्हायती घेवनूच परवानगी दिवची. जाका लागून दुर्मीळ झाडां वाटवतलीं.
४. ११ फेब्रुवारी २०११ आदीं जे कोण असल्या वाठारांनी रावताले वा जाणी बांदकामां केल्यांत तांकांच ही मेकळीक दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
