भांगरभूंय | प्रतिनिधी
एकठांय उपचार पद्दत करपी गोंय थारतलें पयलें राज्य
पणजी : आयुर्वेदीक तशेंच होमिओपथी उपचारांचे म्हत्व दिसान दीस वाडत आसा. गोंयांत आतां भलायकी केंद्रांनी एलोपथी सयत आयुर्वेदीक अशी एकठांय उपचार पद्दत सुरू जातली. एकठांय उपचार पद्दत सुरू करपी गोंय हें देशांतलें पयलें राज्य थारतलें. भलायकी मंत्री विश्वजीत राणे हांणी ही म्हायती दिली.
देशाच्या हेर वाठारां सयत गोंयांत आयतारा आयुर्वेद दीस मनयलो. हे विशींची मुखेल कार्यावळ बांबोळे गोंय वैजकी म्हाविद्यालय हॉस्पिटलांत जाली. हे कार्यावळीक भलायकी मंत्री विश्वजीत राणे हाजीर आशिल्ले. ते भायर सांखळे भलायकी केंद्रांत आयुर्वेद दिसाची कार्यावळ जाली. सांखळे जाल्ले कार्यावळीक मुख्यमंत्री डॉ. प्रमोद सावंत हाजीर आशिल्ले.
देशांत 23 ऑक्टोबर हो दीस दर वर्सा आयुर्वेद दीस म्हूण मनोपाचो निर्णय केंद्र सरकारान घेतला. केंद्रीय आयुश मंत्री सरबानंद सोनोवाल हांणी गोंय भेटीर आसतना ही म्हायती दिल्ली. हो दीस व्हड उमेदीन मनोवपाचें आवाहन तांणी केल्लें. ते प्रमाण सरकारी पांवड्यार आयुर्वेद दीस मनयलो.
गोंय वैजकी म्हाविद्यालय हॉस्पिटलांत जाल्ले कार्यावळीक भलायकी मंत्र्यां सयत भलायकी संचालक डॉ. गीता काकोडकार, गोंय वैजकी म्हाविद्यालयाचे डीन डॉ. शिवानंद बांदेकार, आयुश फांट्याच्यो उपसंचालक मिनल जोशी तशेंच हेर दोतोर हाजीर आशिल्ले.
खासगी तशेंच सरकारी हॉस्पिटलांनी एलोपथी उपचार पद्दत चलता. सगली कडेन एलोपथी वखदांचो वापर जाता. आयुर्वेदीक तशेंच होमिओपथी उपचार पद्दतीन लेगीत दुयेंसां बरीं जावं येतात. ही गजाल आतां लोकांक ल्हवू ल्हवू पटपाक लागल्या. हाका लागून ल्हवू ल्हवू आयुर्वेदीक तशेंच होमिओपथी दोतोरां कडेन गर्दी जावपाक लागल्या. एलोपथी उपचार पद्दती इतलीच आयुर्वेदीक उपचार पद्दत म्हत्वाची आसा. प्रधानमंत्री नरेंद्र मोदी हे आयुर्वेदीक तशेंच होमिओपथी उपचार पद्दतीक उर्बा दीत आसात. हाका लागून आयुश मंत्रालय स्थापन जालां अशें मंत्री विश्वजीत राणे हांणी सांगलें.
बऱ्याच दुयेंसांचेर आयुर्वेद पद्दतींत इलाज आसा. हाका लागून सरकारी भलायकी केंद्रांं तशेंच जिल्हो हॉस्पिटलांनी एलोपथी सयत आयुर्वेदीक उपचार पद्दत सुरू जातली. भलायकी केंद्रां तशेंच जिल्हो हॉस्पिटलांनी आयुर्वेदीक दोतोरांची नेमणूक जातली. आयुर्वेदीक वखदां उपलब्ध जातलीं. एलोपथी दोतोरांक लेगीत आतां आयुर्वेदीक वखदांचें म्हत्व पटपाक लागलां. एलोपथी आनी आयुर्वेदीक अशें एकठांय उपचार करपी गोंय हें देशातलें पयलें राज्य थारतलें अशें विश्वजीत राणे हांणी सांगलें.
गोंय हें ल्हान राज्य आसा. हाका लागून एकठांय उपचार पद्दतीची कारवाय करप सोंपें जातलें. सरकारान आयुर्वेदीक दोतोरांच्यो नेमणुको करपाक सुरवात केल्या. आतां धारगळे आयुश हॉस्पिटल जातलें. कांय वर्सां पयलीं एलोपथी आनी आयुर्वेदीक उपचार पद्दतींत खूब अंतर आशिल्लें. आतां हें अंतर पयस जायत आसा. प्रधानमंत्री नरेंद्र मोदी हांच्या कार्यकाळांत योगाचो प्रसार सुरू जालो. आतां योगा हो जिविताचो भाग जाला. आयुर्वेदीक उपचार पद्दतीक लेगीत बरे दीस येतले. तो जिविताचो भाग जातलो, अशें भलायकी मंत्री विश्वजीत राणे हांणी सांगलें.
लीव 52 हें गुणकारी वखद : डॉ. बांदेकार
आयुर्वेदीक वखदां मदीं भलायकी सुदारपाची तांक आसा. खूबशा दुयेंसांचेर आयुर्वेदीक उपचार प्रभावी थारता. लीव 52 हें आयुर्वेदीक वखद प्रभावी आसा. सोरो पियेले उपरांत दुसरे दिसा लीव 52 घेतिल्ल्या लोकांचे फिग्द पेड्डेर जायना अशें गोंय वैजकी म्हाविद्यालयाचे डीन डॉ. शिवानंद बांदेकार हांणी सांगलें.
आयुर्वेदीक एलोपथी परस पोरणी पद्दत : मुख्यमंत्री
लोकांक आयुर्वेदीक उपचार पद्दतीचो इतिहास खबर ना. आयुर्वेदीक ही एलोपथी परस पोरणी उपचार पद्दत आसा. प्लास्टीक सर्जरी उपचार पद्दतीचो उगम आयुर्वेदांतल्यान जाला. चार हजार वर्सां पयली सुश्रू संहितेत प्लास्टीक सर्जरीचें विवचेन आसा. चरक संहिता ह्या ग्रंथांत लेगीत आयुर्वेदीक उपचारांचे संदर्भ आसात. आयुर्वेदीक उपचार पद्दतींत खूबशा दुयेंसांचें निदान आसा अशें मुख्यमंत्री डॉ. प्रमोद सावंत हांणी सांगलें. ते सांखळे आयुर्वेदीक दिसाचे कार्यावळींत उलयताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
