भांगरभूंय | प्रतिनिधी
पणजीः दक्षीणे उपरांत उत्तर गोंयांतूय हावझीची क्रेझ सुरू जाल्या. फाटल्या कांय सप्तकांत कितल्योशोच कार्यावळी जावन गेल्यो. तातूंत ७ लाख परस चड इनामां लोकांनी जिखलीं. पर्रा पंचायत वाठारांत हो हावझीचो खेळ रंगलो. फुडाराक लाखांनी इनामाचें हांयस दाखोवपी हावझीच्यो कार्यावळी जावपाच्यो आसात.
दक्षीण गोंयांत १३ लाख मेरेनच्या इनामांचें हांयस दाखोवपी हावझी खेळाच्यो जायराती उजवाडाक आयले उपरांत प्रशासन शिटूक जालें. मनरिजवण कार्यावळी, फुटबाॅल सर्तीं वेळार ह्या हावझीच्या खेळांनी लाखांनी रुपयांची उलाढाल जाताली. देखून दक्षीण गोंय जिल्लोधिकार्यान आदेश काडून हे कार्यावळीक परवानगी दितना कांय अटी घाल्ल्यो. हे कार्यावळीच्या आयोजना वेळार मामलेदार तशेंच तलाठी हांकां पाळत दवरपाक सांगिल्ली. पुलिसांकूय ह्यो गजाली बंद करपाचे आदेश दिल्ले.
मात उत्तर गोंयांत खासा करून बार्देस म्हालांतल्या दर्यादेग वाठारांनी प्रशासनाक कसलोच वास लागूंक दिनासतना हे हावसीचे खेळ व्हडा प्रमाणात सुरू जाल्यात. हालींच जाल्लो म्युजीकल शो आनी क्रिकेट, फुटबॉल टुर्नामेंटांनी हावझीच्या तिकेटींनी लाखांची उलाढाल जावन लाखांचीं इनामां जैतिवंतांनी उखल्लीं. मात हाची प्रशासनाक कल्पना नाशिल्ल्यान व्हडलो बोवाळ जावंक ना.
शेनवारा कळंगुटे बागा दर्यादेगेर संगीताची सांज हो म्युजिकल शो जालो. ह्या वेळार १ हजारांत तीन हावझीचीं कुपनां विकलीं. फुल हावज जैतिवंतान सात लाखांचें इनाम जिखलें जाल्यार जल्दी फायव्ह भितर २ लाखाचें इनाम जिखलें.
कळंगुटे ‘कळंगूट प्रिमियर लिग’ हे क्रिकेट मॅची उपरांत हावजी खेळयली. ५०० रुपयांत ३ कुपन दिवन फुल हावज जैतिवंतांनी १ लाख इनाम, जल्दी फायव्ह जैतिवंतानी ५० हजार रुपया आनी आडवी रांक जैतिवंतानी रु. १० हजार इतलीं इनामां घरां व्हेलीं.
जाल्यार पर्रा पंचायतीच्या ‘पर्रा पंचायत फुटबाॅल कप २०२५ ची आयतारा फायनल जाली. उपरांत जाल्ले हावझींत फक्त जल्दी फायव्ह खातीर रु. २५ हजार इनाम जैतिवंतान जिखले. हे खातीर कुपनांचें फुकट वाटप जालें. ह्यान फुडें अशेच म्युजीक शॉ आनी टुर्नामेटांनी हावझीचे खेळ जावपाचे आसात. शिवोले, हणजूण, हडफडे वाठारांत हे खातीर कार्यावळी आखल्यात.
हे हावझीत जिखप खूब जाणां खातीर सोर्त जिखल्या सारकें जावन आसलें. ‘भांगरभूंय’ कडेन उलयतना आपल्या नांवाचो उल्लेख करीनासतना जैतिवंतांनी सांगलें, ह्या इनामांक लागून तांच्यो खुबश्यो गरजो पुराय जातल्यो. हे हावजींत जिखिल्ल्या इनामांक लागून ते आतां पावसा पयलीं घर दुरूस्त करपाक पावतले, तांच्या धुवांचें काजार जावपाचें आसा. तांच्या काजाराच्या खर्चाचोय प्रस्न हे हावझीच्या इनामांत मेळिल्ल्या पयशांक लागून सुटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
