आतां आव्हान मंकीपॉक्साचें

भांगरभूंय | प्रतिनिधी

संकश्टां येवपाक लागल्यार ती फाटोफाट येतात, अशें म्हणटात. सध्या खवदळ घालपी दुयेंसांचें हेंच चल्लां. चीनांतल्यान संवसारभर पातळिल्ल्या कोरोना दुयेसाचें मूळ नेमकें खंय आसा तें सोदपाक सुक्ष्म जीवशास्त्रज्ञांक अजून येश मेळूंक ना. हो विशाणू सैमीक काय चीनी प्रयोगशाळेंत तयार केल्लें जीवाश्म अस्त्र हाचेर अजून भासाभास चल्ल्या. गिरेस्त देशांक खांकनवाळ करून स्वताक अर्थीक म्हासत्ता करपा खातीर चीनान हें शस्त्र तयार करून ते जगभर पातळावपाची तयारी केल्ली असो कांय जाणांचो दावो. कोरोना दुयेंस नियंत्रणा खाला येता अशें दिसतनाच ताचे दुसरेच व्हेरियंट तकली भायर काडपाक लागल्यात. तांचे कडेन कशे दोन हात करप हांच्या हुस्क्यांत आसतना आतां मंकीपॉक्साचो म्हारू चूड घेवन भायर सरला. हें दुयेंस संवसारांत पातळचे न्हय हे खातीर संवसारीक भलायकी संघटनेन सगळ्या देशांक सादूर रावपाचो उलो मारला. व्हड लोकसंख्येच्या, चड करून गरीब देशांनी साथीचें दुयेंस बेगीन पातळपाची भिरांत आसता. भारताक ह्या दुयेंसान वेटाळो घाल्यार तें खाशी-कोनश्यांनी पावपाक वेळ लागचोना. हें कोरोनान दाखोवन दिलांच. ताका लागून मंकीपॉक्सा विशीं लोकां मदीं जाग्रुताय करून हें दुयेंस पातळचें न्हय हे खातीर दरेकल्यान यत्न करपाक जाय. म्हाका कितें, सरकार करतलें ही वृत्ती सोडून दिवची.
मंकीपॉक्स गोंयांत रिगचो न्हय हे खातीर गोंय तयार आसा अशें वैजकी अधिकारी डॉ. प्रशांत सूर्यवंशी हांणी तीन दिसां पयलीं जाहीर केलां. गोंय हें आंतरराष्ट्रीय पर्यटन थळ आशिल्ल्यान विदेशी पर्यटकांच्या माध्यमांतत्यान कसलेंय दुयेंस गोंयांत पावपाक शकता. दाबोळी विमानतळ आनी मुरगांव बंदरांत खासा स्क्रिनिंगाची वेवस्था केल्या. मंकीपॉक्साचो दुयेंतीं अजून मेळूंक ना, अशें तांणी सांगलां. कोरोनाचे सुरवेक गोंयांत सात दुयेंती मेळिल्ले. ताचेर बेगोबेग उपचार करून गोंयांक कोरोना मुक्त केल्ल्याची बडाय त्या वेळार सरकारान मारिल्ली. ते उपरांत ह्या दुयेंसान भलायकी यंत्रणेची पोलखोल केल्ली सगल्यांनी पळयली. ऑक्सिजन नाशिल्ल्यान दुयेंतींक जीव वगडावचे पडले. ह्या दुयेंसाच्या सायड इफेक्टान तयार जााल्ल्या ब्लॅक फंगसाक लागून कांय जाण मेले. मंकीपॉक्सान अशी हाता भायर परिस्थिती वच्ची न्हय म्हणून गोंय सरकारा उपाय येवजण हातांत घेतल्या ही गजाल म्हत्वाची, गरजेची. वैजकी मळार दुयेंस बरें करपा परस तें जावचेंच न्हय हे खातीर यत्न करपाक सगल्यांत चड म्हत्व आसता. गोंयकारांनी हाचे पयलीं जायतीं घातमारीं दुयेंसां पळयल्यांत. कोरोना हें सामकें नवे तरेचें दुसेंस आशिल्ल्यान ताचेर वासीन सोदून काडपाक सुमार एक वर्स लागलें. कोरोना नियंत्रणा खाला हाडपा खातीर आमच्या देशान केल्ल्या यत्नांची तोखणाय पुराय संवसारांत जाली. स्मॉलपॉक्स, चिकनपॉक्स ह्या उपरांत मंकीपॉक्साच्या रुपान देशा सामकार आनीक एक आव्हान आतां उबें रावपाचे तयारेंत आसा.
गोंयांत दिसपट्टे कोरोनाचे नवे दुयेंती मेळपाक लागल्यात. हें ल्हार तितलें घातमारें न्हय ही तातूंतल्या तांतून बरी गजाल. मात लोक पोरण्या अणभवांतल्यान मात पसून शाणे जायनात हें खरें दुर्दैव. साथीचीं दुयेंसां लोक संपर्कांतल्यान पातळटात हाचे कडेन लोक आडनदर करतात आनी कितेंय चड जातकूच सरळ सरकाराक दोश दिवन मेकळे जातात. मंकीपॉक्स ही संवसारीक म्हामारी जावपाची शक्यताय तशी उणी. तरीय लोक सादूर रावले नात जाल्यार ताचो
प्रसार वाडटलो आनी तातूंतल्यान नवी समस्या उप्रासपाक शकता. आमी गोंयकार पांयांर फातर पडटा तो मेरेन
जागे जायनात. कोरोनाच्या दुसऱ्या ल्हारान हे दाखोवन दिवनूय सद्या कोरोना परत पातळपाक लागला तरी
तोंडाक मास्क बांदून कितले गोंयकार घरा भायर वतना दिसतात?
मंकीपॉक्स हो नवो व्हायरस न्हय अशें सूक्षजीव शास्त्रज्ञ सांगतात. पन्नास वर्सा पसून ताचें अस्तित्व आसा खंय. काती पसून कातीच्या संपर्कान ताचो प्रसार जाता. ताका लागून तो पातळपाचो वेग उणो. लोकांनी मंकीपॉक्सा विशीं हुस्को करपाची गरज ना अशें डॉ सूर्यवंशी हांणी सांगलां. जे लोक प्रवास करतात तांकां मंकीपॉस्काची लागण जावपाची चड शक्यताय आसता. मंकीपॉक्स अजून म्हामारीच्या पांवड्यार पावंक ना. मात ताचो प्रसार जावचो न्हय हे खातीरची उपाय येवजण सैल जावपाक दिवंक जायना. केंद्र आनी राज्य सरकारां मंकीपॉक्साक तोंड दिवपाक सज्ज जाल्यांत. मंकीपॉस्काच्या निमतान भारताक संवसारीक वैजकी मळाचें नेतृत्व करपाची कोवीडा उपरांत आनीक एक संद मेळपाक शकता.