भांगरभूंय | प्रतिनिधी
उपराष्ट्रपती जगदीप धनखड हांचें म्हणणें
आचार्य चरक, रुशी सुश्रूत हांच्या पुतळ्यांचें अनावरण
राजभवनांतले ‘बोन्साय’ बागेची तोखणाय
भांगरभूंय । डीआयपी
पणजी : देशाच्या सैन्य दळांनी आमकां भारतीयांक अभिमानीत केल्यात. भारत खंयचेच परिस्थितींत आतंकवाद खपोवन घेवचो ना, हो ऑपरेशन सिंदूरा वरवीं संवसाराक स्पश्ट संदेश दिला. आतंकवाद सोंपोवप हेंच भारताचें उद्दिश्ट आसा. ते खातीर अशें ऑपरेशन गरजेचें आसा. ह्या ऑपरेशनांतल्या दरेकल्याक भारताची तांक कळ्ळ्या, अशें उपराष्ट्रपती जगदीप धनखड हांणी सांगलें. तशेंच प्रधानमंत्र्यांच्या निर्णयाची तोखणाय केली.
उपराष्ट्रपती धनखड हांणी बिरेस्तारा राजभवन बागेंत उबारिल्ल्या आयुर्वेदाचे जनक आचार्य चरक आनी शस्त्रक्रियेचे जनक रुशी सुश्रूत हांच्या पुतळ्यांचें अनावरण केलें. ह्या वेळार तांचे वांगडा राज्यपाल पी. एस. श्रीधरन पिल्लई आनी मुख्यमंत्री डॉ. प्रमोद सावंत उपस्थीत आशिल्ले. तेचवरी उपस्थितां मदीं उपराष्ट्रपतीची घरकान्न डॉ. सुदेश धनखड, केंद्रीय ऊर्जा आनी नविनीकरण ऊर्जा राज्यमंत्री श्रीपाद नायक, राज्यसभा खासदार सदानंद तानावडे, उपसभापती ज्योशुआ डिसोझा, वीज मंत्री सुदिन ढवळीकार, आमदार आनी हेर मानेस्तांचो आस्पाव आशिल्लो.
राज्यपाल पिल्लई हांच्या वावराची आनी चड करून राजभवन बागेंत विकसीत केल्ले ‘बोन्साय’ बागेची धनखड हांणी तोखणाय केली. भलायके विशीं गिन्यान मेळोवपाक अथर्व वेदाक भांगराची खण मानतात. पुरातन भारतीय वैजकी पद्दतींत आयुर्वेदाक मुखेल आनी म्हत्वाची सुवात आसा. आमच्या पुरातन वैजकी पद्दतीचो आदार घेवन नवीं व खदां तयार करपाचेर भर दिवपाची गरज आसा, अशेंय तांणी सांगलें.
राज्यपाल पिल्लई हांणी आपल्या वावराची म्हायती दिली. गोंयच्या राज्यपाल पदाचो ताबो घेत सावन गोंय ग्राम पुराय यात्रा, सैमीक दायज यात्रा, द्वीप वळख यात्रा, गोंय गिर्यारोहण यात्रा अश्या यात्रांच्या माध्यमांतल्यान गोंय राज्यांतल्या ग्रामीण तशेंच शारी वाठारांक भेट दिवन लोकां कडेन संपर्क सादला, अशें तांणी सांगलें.
‘बोन्साय’ बागेची म्हायती दितना पिल्लई हांणी सांगलें, हे बागेंत 1008 तरांचीं झाडां आसात. सरकारी सुवातेंत तयार केल्ली भारतांतली ही सगल्यांत व्हड बाग आसतली. राजभवनाच्या वाठारांत उबारिल्ली हे बागेक लोकांनी आऩी चड करून विद्यार्थी तशेंच शिक्षकांनी भेट दिवची, असो उलो राज्यपालान मारलो.
बोन्साय बागेंत 1008 तरांचीं झाडां आसप हो गोंयच्या राजभवनांतलो खाशेलो उपक्रम आसा, अशें मुख्यमंत्री डॉ. प्रमोद सावंत हांणी राज्यपालाच्या वावराची तोखणाय करतना सांगलें.
राजभवन बागेंत आयुर्वेदाचे जनक आचार्य चरक आनी शस्त्रक्रियेचे जनक रुशी सुश्रूत हांचे पुतळे उबारिल्ले खातीर मुख्यमंत्र्यान समाधान उक्तायलें. शस्त्रक्रियेचे जनक रुशी सुश्रूत हांचो पुतळो फक्त मेलबोर्नचे नामनेचे रॉयल ऑस्ट्रेलियन कॉलेजींत प्रदर्शीत केल्लो आसा. आचार्य चरक आनी रुशी सुश्रूत हांच्या पुस्तकांनी आमकां विंगड विंगड दुयेंसां आनी तांचेर उपचार-वखदां विशीं खोलायेन म्हायती मेळटा, अशें मुख्यमंत्र्यान सांगलें. गोंयची प्रथम महिला रिता श्रीधरन पिल्लई, मुख्य सचीव डॉ. व्ही. कांदवेलू, राज्यपालाचे सचीव संजीव सी. गांवस आनी हेर मानेस्त ह्या वेळार उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
