आतंकवादाचो अंत ही काळाची गरज !

भांगरभूंय | प्रतिनिधी

पेहलगामच्या आतंकवादी हल्ल्या उपरांत प्रत्यक्ष काश्मीरांतल्यान ताचो जो खर निशेध जायत आसा तोवूय आयचे परिस्थितींत खूब म्हत्वाचो म्हणचो पडटलो.

पेहलगामांत आतंकवादी हल्ल्या उपरांत प्रधानमंत्र नरेंद्र मोदी हांणी खर उतरांनी आपल्या देशवासियांच्यो भावना उक्तावपाचो यत्न मेळत ती संद सादून केल्लो आसलो तरी, आपल्या ‘मन की बात’ ह्या नियमीत म्हयान्याळ्या कार्यावळींतल्यान देशवासियां मुखार आपल्यो वेदना नेमक्यो कश्यो व्यक्त करतले हाची उत्सुकताय सगल्यांकच आशिल्ली. ताका लागून पयर आयताराची तांची कार्यावळ सगल्या देशवासियांनी आवर्जून पळयली आनी आयकली. पाकिस्तान पुरस्कृत ह्या आतंकवादी हल्ल्या उपरांत ताचो बदलो घेवपा खातीर दरेक भारतीयाचे रगत कशें सळसळटा हेंच प्रधानमंत्री मोदी हांणी जगाक संदेश दितना सांगलें, आनी तें करतना कोणाकूच दयामाया दाखोवपाचो प्रस्न उपस्थीत जावचो ना हे विशींय देशवासियांक आस्वस्त केलें. काश्मीरांतल्या ह्या ताज्या आतंकवादी हल्ल्याचे घडणुकेक सप्तक जायत आयलें तरी ताका लागून मनाचेर जाल्लो खोल घावो तसो सहजतायेन इतले बेगीन भरून येवपाचो नाशिल्ल्यान पाकिस्तानाक जबरदस्त अद्दल घडोवची आनी तातूंततल्यान आतंकवादाचो कायमचो अंत जावचो हीच सगल्या भारतीयांची एकसुरी इत्सा आशिल्ल्याचें प्रधानमंत्री नरेंद्र मोदी हांणी आपल्यो भावना उक्तायतना सांगलें. आनी तें खरेंय आसा की भारतीयांक आयज आनीक कशाचीच अपेक्षा ना, पूण पाकिस्तानी आतंकवादाक आतां आमी खंयचे भाशेंत आनी नेमकें केन्ना जशाक तशी जाप दितले हाचे कडेन आमचे सगल्यांचे दोळे लागून आसात.
आयज आमी निश्चितूच अशे स्थितींत आसात की मनान निर्धार करीत जाल्यार कांय दिसांतूच पाकिस्तान ननपश्‍चात जावंक शकतलो, हें खरें आसलें तरी तशे करतनाय मोटो संयम बाळगूनच पावलां उबारचीं पडटलीं आनी तेच घडयेची आमकां आयज वाट पळोवची पडटली. प्रधानमंत्री नरेंद्र मोदी हांणी आपल्या ‘मन की बात’ कार्यावळींतल्यान पेहलगामच्या आतंकवादी हल्ल्यांत गरजे भायर बळी पडिल्ल्या नागरिकांच्या सोयऱ्यांचें सांत्वन करतना जो संदेश दिला तो खूब म्हत्वाचो आसा. पिडीत कुटुंबांक तांणी आश्‍वस्त केलां की तुमकां न्याय मेळटलो. पेहलगामाक पर्यटना खातीर गेल्ल्या 28 जाणांनी जो त्याग केला तो देशाचे सेवेंत रुजू जावचो आसलो तरी तांच्या कुटुंबांक न्याय मेळोवन दिवपा खातीर कितेंय करपाचें शिल्लक दवरचे नात अशेंय प्रधानमंत्र्यांनी म्हणलें. आतंकवादी हल्ल्या उपरांत आतंकवाद्यांचे जनक आशिल्ल्या पाकिस्ताना आड भारताक अदिकूच आक्रमक पवित्रो घेवन खूबशे निर्णय जाहीर केल्ले आसले तरी जो मेरेन कसलीच ठोस कृती जायना तो मेरेन निदान कोणूय ताचेर समाधान मानून घेतले अशें समजुपा सारकी स्थिती ना. एखादो सर्जिकल स्ट्रायकूय आयज देशवासियांक अपेक्षीत आसलो तरी आमचे सेने कडल्यान ताचे परसय चड खर जाप पाकिस्तानाक मेळटली अशी आस्त प्रधानमंत्री नरेंद्र मोदी हांणी घेतिल्लो पवित्रो आनी आतंकवादी सोंपोवपा खातीर तांकां संवसारान दिल्लो सांगात हाचो विचार केल्यार निश्‍चीतपणान बाळगूंक येतलो.
आतां मेरेनचो सगल्यांत मोटो म्हणूंक येतलो अशा ह्या आतंकवादी हल्ल्या उपरांत देशवासियांनी आपल्या एकवटाचें जें प्रदर्शन केलां ताका खरेंच तोड ना. देशवासियांनी ह्या कठीण काळांत जो एकवट दाखयला ताका लागून सरकाराचे हात आनीक घटमूट जाल्यात, आनी पाकिस्तानाक बुद्द शिकोवपा खातीर हीच एकवट खूब म्हत्वाची आशिल्ल्याचें प्रधानमंत्री नरेंद्र मोदी जेन्ना सांगतात तेन्ना त्या बळारूच मुखा वेलें पावल ते उबारूंक शकतले अशी आस्त बाळगूनच आमकां सरकार नेमकें कसलें पावल उबारता हाचे कडेन लक्ष दवरून वाट पळोवची पडटली. भारताची अभेद्य अशी एकवट भेदपाचोच जर पाकिस्तानाचो ह्या आतंकवादी हल्ल्या फाटलो हेत आसत जाल्यार कठिणांतल्या कठीण परिस्थितींत लेगीत आमकां एकवट भंग जावचो ना हेंच आमकां दाखोवन दिवपाचें आसा. आनी संयमानूच मुखा वेलीं पावलां उबारचीं पडटलीं हेच प्रधानमंत्र्यांनी स्पश्ट केल्ल्यान आमची सगल्यांची जापसालदारकी आनीक वाडल्या. पाकिस्तानाक एकवटान कशी जाप दिवंक शकतात की परतून अशी घडणूक करपाचो विचारूय ते करूंक शकचे नात. आतंकवादी हल्ल्या उपरांत आयची शिमे वेली परिस्थिती स्फोटक आसली तरी अशा वेळा झूज करप कितले मेरेन योग्य आसा हाचो सारासार विचार करूनच निर्णय जावपाचो आसलो तरी पाकिस्तानाक जाता तितले बेगीन खर धपको दिवप ही काळाची गरज आशिल्ल्याचें सगल्यांकूच दिसता आनी तें चुकीचें आसा अशेंय म्हणूंक येवचें ना. देशवासीय आयज त्याच खिणाची आतुरतायेन वाट पळयत आसात.
पेहलगामच्या आतंकवादी हल्ल्या उपरांत प्रत्यक्ष काश्मीरांतल्यान ताचो जो खर निशेध जायत आसा तोवूय आयचे परिस्थितींत खूब म्हत्वाचो म्हणचो पडटलो. फाटल्या काळांत अशे हल्ले जाले तरी ताचे काश्मीरी लोकांक कितेंय पडून गेलां अशें दिसनाशिल्लें. पूण आयज काश्मीर खरो बदलिल्लो आसा अशें पेहलगामचे घडणुके उपरांत थंय सावन त्या घडणुकेच्यो ज्यो निशेधाच्यो खबरो येतात ताचे वेल्यान म्हणूंक येतलें. कलम 370 रद्द केले उपरांत काश्मीरांत इतले बेगीन बदल दिसून येतलो अशें कोणाकूच दिसूंक नाशिल्लें, पूण काश्मीर आतां खऱ्या अर्थान राष्ट्रीय प्रवाहांत वांटेकार जाला अशें आतांची थंयची परिस्थिती पळयत जाल्यार म्हणचें पडटलें. बदलिल्लो कश्मीर पाकिस्तानाक नाका आशिल्लो हें उघडच आसलें, तरी काश्मीरी लोकांनीय आतां दाखोवन दिलां की आमीय आतां आतंकवाद्या आड झुजपाक तयार आसता आनी जाल्लो हो बदल खूबच समाधान दिवपी आसा. आतंकवादाच्या उज्यांत कितलिंशींच वर्सां हुलपत आशिल्ल्या काश्मीरी लोकांनी थंयच्या बदलाक कसो येवकार दिलो हें पेहलगामचे घडणुके उपरांत प्रकर्शान दिसून आयलें. दिग्विजय सिंह वा हेर कांय काँग्रेस फुडारीच ताचेर कितेंय उलयत आसलें तरी काश्मीर लोकांनीय पाकिस्तानी आतंकवाद मोडून काडपाच्या कामांत आतां केंद्रांतल्या मोदी सरकाराक जो हात दिवंक केला तो खूबच म्हत्वपूर्ण आसा. हाचो सगलो विचार करूनच आतंकवादी प्रवृत्तीचेर आतां निर्णय घेवपाची वेळ लागीं आयल्या. आतंकवादाचो अंत जाल्लो जगाक पळोवपाचो आसा. पाकिस्तानाक बुद्द शिकयले बगर तें साध्य जावचें ना.

वामन प्रभू
9823196359