भांगरभूंय | प्रतिनिधी
रॉबर्ट फर्नांडीसः वाळपय लुर्डस् हायस्कुलांत मनयलो आजो-आजी दीस
भांगरभूंय । प्रतिनिधी
वाळपयः आजो- आजी हो कुटुंबांतलो म्हत्वाचो घटक. तांचे बगर जिवीत अर्थहीन, अशें वाळपय अवर लेडी ऑफ लर्डस हायस्कुलाचे मुख्याध्यापक रॉबर्ट फर्नांडीस हांणी सांगलें.
लुर्डस् हायस्कुलांत आजो- आजी दीस मनयलो. ह्या वेळार व्हड संख्येन आजो आनी आजी हाजीर राविल्ल्यो. हायस्कुला वतीन फूल भेटोवन तांचो भोवमान केलो. ह्या वेळार फर्नांडीस उलयताले.
आमच्या दरेका मदीं बदल जावपाक लागला. दरेकाची जिणेशैली बदलपाक लागल्या. ह्या बदलते जिणेशैलीक लागून कांय जाणांच्या घरांनी आजो- आजी फक्त फोटो पुरतीच मर्यादीत उरल्यात. ही सामकी दुख्खाची गजाल. आमी कितलेय शिकले, गिरेस्त जाले तरी लेगीत जांच्या घरांत आजो- आजी ना तें घर सुसंस्कारीत जावपाक शकना. ताका लागून दरेकल्यान तांचो मान राखप खूब गरजेचें आसा, अशें फर्नांडीस हांणी सांगलें.
सहमुख्याध्यापक वायरेट पिरायस हांणी आपल्या उलोवपांत दरेका घरा खातीर आजो- आजी कितली म्हत्वाची आसतात हें विशीं विचार मांडले. हाजीर राविल्ल्या आजो- आजीं खातीर भुरग्यांनी मनरिजवणेची कार्यावळ सादर केली. शिक्षिका दर्शना देसाय आनी आशिया वाळके हांणी सुत्रसंचालन केलें. वायरेट पिरायटस हांणी उपकार मानले. राष्ट्रगितान कार्यावळीची सांगता जाली.
आजो- आजींचे संस्कार मोलादीकः फर्नांडीस
जांच्या घरांत आजो- आजी आसात, त्या घरांत निश्चीत संस्काराची गिरेस्तकाय आसता, हातूंत मातूय दुबाव ना. तांचे कडल्यान शिकपा सारक्यो खूबश्यो गजाली आसतात. तांचो मान राखात. तांणी दिल्ले संस्कार फुडारांत दरेका खातीर मोलादीक थारतले, अशें मुख्याध्यापक रॉबर्ट फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
