भांगरभूंय | प्रतिनिधी
क्रिस्तांव समाजाचे सर्वोच्च धर्मगुरू, पापसायब फ्रान्सीस काल सकाळीं संवसाराक अंतरले. गरीब, दुबळ्यां विशीं मोग, करुणा आशिल्लो हो मानेस्त. व्हॅटिकनांत मार्च 2013 त पापसायबाचे वेंचणुकेंत पयल्या पांवड्यार एकाय उमेदवाराक दोन तृतियांश मतां मेळूंक नाशिल्लीं. पांचवे खेप मतपत्रिका उक्त्यो केल्यो, तेन्ना जाॅर्ज मारियो बर्गोग्लिओ हे अर्जेंटिनाचे कार्डिनल 266 वे पापसायब म्हूण वेंचून आयले. तांचे वेंचून येवप होच इतिहास आशिल्लो. कारण 1300 वर्सांच्या काळांत ह्या उंचेल्या पदाचेर येवपी ते पयले बिगर युरोपियन, पयले लॅटिन अमेरिकन आशिल्ले. ‘पोप फ्रान्सीस’ ह्या नांवान तांणी हे पद घेतलें. 13 व्या शेंकड्यांतले असिसीचे सेंट फ्रान्सीस हांच्या नांवा वयल्यान तांणी ‘फ्रान्सीस’ हें नांव घेतिल्लें. विशेश म्हणल्यार हें नांव घेवपी ते पयलेच पापसायब.
17 डिसेंबर 1936 दिसा तांचो जल्म अर्जेंटिनांत जालो. तांचे पालक मूळ इटालियन. ते दक्षीण अमेरिकेक स्थलांतरीत जाल्ले. जाॅर्ज बर्गोग्लिओ हांणी केल्ल्या मानवतावादी, पर्यावरणाच्या कामाक लागून ते पापसायब जावपाक पावले. पयलीं आनी पद स्विकारले उपरांतूय तांणी जायते आदर्श निर्माण केले. पिरायेच्या सोळाव्या वर्सा तांकां अचकीत चर्चींत भितर वच्चेंशे दिसलें. धर्मगुरू जावचेंशें दिसलें. उपरांत 1969 त शिक्षण पुराय करून जेजुइत धर्मगुरू जाले. 1992 त ते सहाय्यक बिशप, जाल्यार 1998 ब्युनोस आयर्स शाराचे आर्चबिशप जाले. 2001 त कार्डिनल, तर 2013 त पापसायब, असो तांचो प्रवास. पापसायब जावपी ते पयले जेजुइत धर्मगुरू. जेजुइत आनी चर्चमातेच्या विचारां मदीं बरेच खेप संघर्श पळोवंक मेळटा. ताका लागून फ्रान्सीस हांकां पापसायबाचें पद मेळप ही पसून तशी आगळीच गजाल.
पापसायब फ्रान्सीस सदांच दुबळ्या, गरीब लोकां वटेन रावले. तांच्या मनांत दुसऱ्यां विशीं मोग, संवेदनशिलताय आशिल्ली. कसलोच प्रचार, आवाज करिनासतना शांतपणान वावर करपा खातीर ते प्रसिद्ध. कितें तरी उलोवन प्रसारमाध्यमांच्या उजवाडाचे झोतींत रावपाची तांकां संवय नाशिल्ली. पापसायबान आपले कारकिर्दींत कांय धाडसी निर्णय घेतले. पापसायब जातकच चारुच म्हयन्यांनी समलैंगिकतेच्या मुद्द्याचेर तांकां प्रस्न विचारिल्ले. ताचेर तांणी सांगिल्लें, जर समलिंगी व्यक्ती देवाचो सोद घेता जाल्यार तांकां पारखुपी, आडावपी हांव कोण? समलिंगी जोडप्यांक आशिर्वाद दिवपाकूय तांणी 2023 त परवानगी दिल्ली. आशिर्वाद हे देवाचे दयेचे, मोगाचें प्रतीक, अशें तेन्ना व्हेटिकनान जाहीर केल्लें. मात चर्च दादलो, बायल हांच्या परंपरीक लग्नाकूच मान्यताय दिता, अशेंय स्पश्ट केल्लें. परत लग्न केल्ल्या, घटस्फोट घेतिल्ल्या क्रिस्ती भावा-भयणांक पवित्र संस्कारा पसून कुशीक दवरचें न्हय, अशें पापसायबान म्हणिल्लें. बाल लैंगीक शोशणा विशीं तांणी एप्रील 2014 त माफी मागिल्ली. हें गंभीर पाप, लज्जास्पद गुन्यांव. तो आडावपाक आमी कडक पावलां उबारतले, अशें तांणी स्पश्ट केल्लें. 2016 त नाझीच्या कॅम्पांत वचून तांणी थंय मरण आयिल्ल्यां खातीर प्रार्थना केल्ली. भोगसणी मागिल्ली. तांणी चर्चमातेच्या विचारप्रणालींत बदल घडोवन हाडले. स्थलांतरीत, जाण्टे, वंचीत, गरीब लोकांची तांकां काकुळट येताली. पर्यावरणाचो नाश, संवसारीक तापमानाचेर तांणी ‘लावदातो सी…’ दस्तावेज बरयला. तो संवसारीक चर्चेचो विशय थारिल्लो. तांच्या लिखाणान, विवीध विशयां वयल्या उलोवपांनी एक वेगळो विचार समाजा मुखार आयलो.
पावसायब वैयक्ती जिणेंत सादे आशिल्ले. अपोस्टोलिक पॅलेसांत रावनासतना ते सेंट मार्थ गेस्ट हावसांत रावताले. थंय हरशी कार्डिनल वा भायल्यान येवपी सोयरे रावतात. चडशे फावट ते स्वता रांदून जेवताले. अर्जेंटिनांत आसतना तांणी केन्नाच मोटार वापरूंक ना. बस वा मेट्रो हें तांच्या प्रवासाचें साधन. पापसायब जाले उपरांतूय तांणी बरेच फावट बसींतल्यान प्रवास केला. पोरूं इंडोनेशियांतूय ते चर्चीचे बशींतल्यान गेल्ले. पापसायब भांगराची मुदी घालतात. शक्ती आनी अधिकाराचें तें प्रतीक. मात तांणी रुप्याची मुदी वापरली. हाचे पयलीं खंयच्याच पापसायबान स्वता फोन करून लोकां कडेन संपर्क करूंक ना. मात पोप फ्रान्सीस हाका आडवाद. ते जायते खेपे लोकां कडेन फोना वयल्यान उलयल्यात. गुड फ्रायडेच्या आदले दीस पापसायबान दुसऱ्यांचे पांय धुंवपाची प्रथा आसा. पापसायब फ्रान्सीसान 2024 त बंदखणींतल्यान बारा बायल कैद्यांचे पांय धुविल्ले. हातूंत मुस्लीम बायलांय आशिल्लीं. अशें पयलेच फावट घडिल्लें. परंपरीक वाट माड्डिनासतना वेगळे वाटेर चलपाचें धाडस करपी एक धर्मीक व्यक्ती आयज आमचे मदल्यान ना जाल्या.
पापसायब फ्रान्सीस हांकां डिसेंबरांत गोंयांत हाडपाचे यत्न जाल्ले. सां फ्रान्सीस झेवियराचे पवित्र कुडीचो दर्शन सुवाळो जाल्लो, तेन्ना ते येवपाचे आशिल्ले. तांकां केंद्र सरकारान अधिकृत आमंत्रणूय दिल्लें. घडये भलायकेच्या कारणांक लागून वा तांच्या थारिल्ल्या कार्यावळींक लागून ते पावले नात. रोखडीच नवो पापसायब वेंचून काडपाक परिशद जातली. आतां मेरेन चडशे युरोपांतलेच पापसायब जाल्यात. हे खेप आशियेंतलो कार्डिनल पापसायबाच्या पदाचेर पावचो, अशी समेस्त क्रिस्ती समाजाची इत्सा आसतली. तो आमचो भारतीय आसल्यार सगल्यांची खोस दुपेट जातली! पापसायब फ्रान्सीस हांकां नमळायेचीं आर्गां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
