भांगरभूंय | प्रतिनिधी
साळांतलें परब कुटुंब दोण्यां पासून सुबक प्रतिकृती करूंक मग्न
दिवचल ः गोंयचें दरेक हिंदू कुटुंब ज्या परबाची वाट पळयता ती सगल्यांची आवडटी चवथ आतां लागीं पावल्या. गणपतीबाप्पाक येवकार दिवपा खातीर सगल्यांकूच उमळशीक लागल्या. घरांतली साफसफाय, रंगरंगोटी तशेंच वेगळ्योवेगळ्यो सजावटी करपाक जण एकलो गुल्ल आसा. शारांनीच न्हय जाल्यार गांवांनी लेगीत उत्सवाचें वातावरण ल्हवू ल्हवू वेग घेवंक लागलां. सामान्य मनिसूच न्हय जाल्यार वर्सभर शेतांत राब राब राबपी शेतकार लेगीत थोडी भोव उसरपत घेवन हो आनंदोत्सव मनोवपाक तयार रावला.
वर्साक एक फावटीं घराक रंग काडप, सजावट करप, आरास करप ह्या कामांनी जण एकलो आनंदान वांटो घेता. मागीर तो जाण्टो जावं, जावं तरणाटो वा जावं माणकुलो. सगल्यांकूच बाप्पाची लक्तुबाय. जाण्ट्यां वांगडा ल्हान ल्हान भुरगीं लेगीत रातीचो दीस करून सजावटीच्या कामांक हातभार लावंक लागल्यांत.
गणपती मुखार सुबक आनी कल्पकतायेन सजिल्ली आरास करपाक जण एकल्यान पेंगट बांदलां. आरास बरी जावंक जाय, पळोवप्यांक आवडूंक जाय, सगल्यां परस वेगळी आसूंक जाय हो जण एकल्याचो हावेस. कांय सुवातांनी हालते देखावेय उबारल्यात. तातूंतली पताक्यांची सजावट तर दोळे दिपकावपी आसा.
जाण्ट्यां वांगडा भुरगींय साफसफायेच्या कामांनी आनी सजावटीच्या वावरांत हातभार लावंक लागल्यांत. उमेदीन, आनंदान, खोशेन सजावट करूंक लागल्यांत. कापिल्ल्यो फोली एकामेकां पासून वेगळ्यो करप, त्या फोलींक फेव्हिकाॅल वा घरांत तयार केल्लें घुरूत लावप आनी हेर बारीक सारीक कामां भुरगीं उमेदीन करूंक लागल्यांत.
साळांतल्या सकयल्या वाड्या वयले दर्शन परब आनी तांचें कुटुंब सध्या आरास करपाच्या कामाक गुंतलां. दशरथ परब हांकां प्राची, प्रणाली, रघुवीर, डाॅली, सरिता, रेश्मा आनी रोहित हीं सजावटीच्या वावरांत आदार करतात. आपली आरास हेरां परस वेगळी आसची हो ध्यास घेवन हें कुटुंब कामाक लागलां. अंदूं तांणी दोण्यांचो वापर करून सुंदर सजावट केल्या. आतां मेरेन हे सजावटीचें 75 टक्के काम पूर्ण जालां. सध्या हे सजावटी खातीर तांणी 750 परस चड दोण्यांचो वापर केला. सजावट पूर्ण जावपाक आनिकूय दोणे लागूं येतात अशें परब सांगतात.
अशे तरेच्यो आगळ्यो सजावटी कितल्याश्याच घरांनी चालू आसात आनी तो वावर पूर्ण करपा खातीर रातीचे दीस करप चालू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
