भांगरभूंय | प्रतिनिधी
पणजी : राज्यांत सद्या दमट वातावरण आसा. तशेंच केन्नाय पडपी पावस आनी दमट वातावरणाक लागून राज्यांत आमो आनी काजू उत्पादक शेतकारां मदीं हुस्क्याचें वातावरण निर्माण जालां. अशेंच वातावरण आनीक कांय दीस उरल्यार आंबो आनी काजू उत्पादनाक बरोच फटको बसपाची शक्यताय आसा.
राज्यांतले जायते शेतकार आंबो आनी काजवाचें उत्पादन घेतात. हाचेर तांचे पोट चलता. पूण फाटल्या तीन- चार दिसां सावन राज्यांतल्या कांय वाठारांनी बारीक पाव शिरशिरला. तशेंच फाटल्या दोन दिसां सावन वातावरण दमट आसा. तें तशेंच उरल्यार ताचो आंबो आनी काजवाच्या
चंवराचेर परिणाम जावन अंदूं उत्पादन उणें जातलें अशी शक्यताय कृषी विभूशण पुरस्कार मानेली शेतकार उदय प्रभुदेसाय हांणी उक्तायली.
कृषी उपसंचालक संदीप फळदेसाय हांणीय पावस केन्नाय पडिल्ल्यान ताचो आंब्याच्या उत्पादकांक चड फटको बसपाची शक्यताय उक्तायली.
फाटल्या तीन वर्सां सावन राज्यांत आंबो आनी काजू उत्पादन देंवलां. फाटल्या वर्सा बाराय म्हयने पाव पडिल्लो. ताचो परिणाम ह्या दोनूय पिकांचेर जाल्लो. २०२१- २२ चे तुळेंत २०२२- २३ त काजूचें उत्पादन सुमार २३२ टनांनी देंविल्लें. आंब्याच्या उत्पादनांत ल्हानशी वाड जाल्या. मात पावस आनी दमट हवामानाचो आंब्याच्या पिकाचेर परिणाम जाल्लो.
राज्य हवामान विभागाच्या अंदाजा प्रमाण पणजे सयत विंगड विंगड वाठारांनी आयज पावस पडलो. आयज, फाल्यांय पावस पडपाची शक्यताय विभागान उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
