भांगरभूंय | प्रतिनिधी
नंदकुमार कामतः ‘आंबेडकरी शिलेदार दादू मांद्रेंकार’ पुस्तकाचें प्रकाशन
भांगरभूंय । प्रतिनिधी
पणजीः देशांतली रचनात्मक मुळाव्या सुविधांचो विज्ञानीक विचार डॉ. बाबासाहेब आंबेडकर हांणी मांडलो. फक्त संविधानूच न्हय जाल्यार सर्वांगी उदरगतीचो विचार तांणी मांडला. हेच खातीर ज्ञाननिश्ठ आनी विज्ञाननिश्ठ समाज उबारपाक डॉ. आंबेडकर हांच्या विज्ञानीक विचारांची गरज आसा, अशें ज्येश्ठ विचारवंत डॉ. नंदकुमार कामत हांणी सांगलें.
लेखक दादू मांद्रेंकार हांचे जयंती निमतान तांचे जिणेचेर आदारीत ‘आंबेडकरी शिलेदार, दादू मांद्रेंकार’ पुस्तकाच्या प्रकाशन सुवाळ्यांत अध्यक्षपदा वयल्यान डॉ. कामत उलयताले. ह्या वेळार मुखेल सोयरे म्हूण आदले कायदोमंत्री अॅड. रमाकांत खलप, मुखेल उलोवपी म्हूण प्रभाकर ढगे, पुस्तकाचे लेखक डॉ. महेश पेडणेंकार आनी दादू मांद्रेंकार हांची घरकान्न अनिला मांद्रेंकार हाजीर आशिल्ली.
आमी स्वताक सुसंस्कृत, प्रागतीक, सुशिक्षीत समाज म्हणटात. मात आयजूय खूबशो अंधश्रद्धा, रुढी, परंपरा हांकां वेंगावन बसल्यात. प्रागतीक विचार म्हणल्यार चर्चेंतल्यान आयिल्ले विचार. मात हालीं चर्चा जायच ना. आयजूय आमी थरावीक विचारसरणीचेच शिलेदार आसात. हेच खातीर शिक्षणीक संस्थां सयत आमच्या कर्तृत्वाची थळां आमचीं प्रार्थना थळां जावचे बदला देवळां, मशिदी ह्या गजालींनी आमी आडकून पडल्यात. धर्म, जाती हाचे पलतडी फक्त बरें आनी वायट ह्यो दोनूच जाती संवसारांत आसात, हें आमी समजून घेवपाक जाय. पृथ्वी एक आसा, पवित्र आनी मंगल आसा हें लक्षांत घेवन तिचो सांबाळ करपाक जाय, अशें डॉ. कामत हांणी सांगलें.
ह्या वेळार डॉ. कामत हांणी दादू मांद्रेंकार हांचे कांय उगडास सांगले. तांकां अवकाश संशोधनांत रस आशिल्लो. कल्पना चावला अंतरले उपरांत तिका आर्गां ओंपपा खातीर तांणी कार्यावळ आयोजीत केल्ली. त्या वेळार ते अवकाश संशोधनाचेर पोटभर उलयले. विज्ञानाच्या खूबशा विशयांचेर आमच्यो नेमान चर्चा जाताल्यो. दादूक सदांत प्रस्न पडटाले. तांचे चिकित्सक वृत्तीक लागून तांचे मदल्या विज्ञानीक दृश्टीकोनाक चालना मेळ्ळी. आंबेडकर हांचें विज्ञानीक दायक ताका सांबाळपाक जालें. सध्या अशाच ध्येयवादी, चिंतनशील, प्रज्ञाशील आनी चिकित्सक लोकांची गरज आसा, अशें डॉ. कामत हांणी सांगलें.
बहिश्कृत गोंय ह्या पुस्तकांतल्यान गोंयांतली सत्यस्थिती मांद्रेंकार हांणी मांडली. खर बंडखोर, निडर अशें व्यक्तीमत्व म्हणल्यार दादू मांद्रेंकार. तांचे कडेन खूब खेपे वैचारीक मतभेद जाले. तांची भुमिका, तांचें काम खूब व्हड आसा. अशा शिलेदारांची समाजाक गरज आसा, अशें प्रभाकर ढगे हांणी सांगलें. सगळ्या मानेस्तांचे हस्तुकीं पुस्तक प्रकाशन केलें. मिलिंद माटे हांणी सुत्रसंचालन केलें.
दादू प्रागतीक गुंडः अॅड. रमाकांत खलप
दादू मांद्रेंकार हांकां लोक गुंड म्हणटाले. मात प्रस्थापीत वेवस्थे आड आवाज काडून बंड करप हें गुंडपणाचें लक्ष आसत जाल्यार ते प्रागतीक गुंड आशिल्ले, अशें म्हणपाक हरकत ना. आपल्या जिवीत काळांत आपले लेखणीच्या माध्यमांतल्यान तांणी वंचितांचे प्रस्न मांडपाचें काम केलें. मानवतावादी विचारांची देणगी दिली. आयच्या काळांत तांचे मनीसपणाचे शिकवणेची खरी गरज आसा, अशें अॅड. रमाकांत खलप हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
