भांगरभूंय | प्रतिनिधी
-250 कोटींच्या भ्रश्टाचार प्रकरणात सीआयडीची कारवाय
-पूत लोकशाकूय घेतलो ताब्यांत
आंध्र प्रदेशः आदले मुख्यमंत्री चंद्रबाबू नायडू हांकां स्किल डेव्हलपमेंट येवजण भ्रश्टाचार प्रकरणांत अटक केल्या. शेनवारा सकाळीं 6 वरांचेर नंदयालांतल्यान सीआयडीन तांकां अटक केली. तांचे विरोधांत अजामीनपात्र अटक वाॅरंट जारी केल्लें. आंध्र प्रदेश पुलिसांनी तांचो पूत नारा लोकेश हांकांय ईस्ट गोदावरी जिल्ह्यांतल्यान ताब्यांत घेतल्या.
आंध्र प्रदेश पुलिसांनी ते व्हॅनिटी व्हॅनींत विसव घेतना तांकां अटक केल्या. 250 कोटींच्या भानगड प्रकरणांत तांचे आड 2021 त एफआयआर दाखल जाल्लो.
गुन्यांव अन्वेशण विभाग (सीआयडी) हांणी जायतीं कलमां लावन चंद्रबाबू नायडू हांकां अटकेची नोटीस धाडिल्ली. स्किल डेव्हलपमेंट येवजणेंत तांणी कोट्यांनी रुपयांची लांच घेतिल्ल्याचो तांचेर आरोप आसा.
कितें आसा भ्रश्टाचाराचें प्रकरण?
चंद्रबाबू नायडू हांच्या सरकारान तरणाट्यांक रोजगार दिवपाक स्किल डेव्हलपमेंट येवजण हाडिल्ली. हे येवजणे खाला तरणाट्यांक नोकरे खातीर तयार करपाची येवजण आशिल्ली. सरकारान येवणे खाला जापसालदारकी ‘सिमेन्स’ कंपनीक दिल्ली. 6 क्लस्टर्स तयार केल्ले. हाचो वट्ट खर्च 3,300 कोटी रुपया आशिल्लो. दरेक क्लस्टराचेर 560 कोटींचो खर्च केल्लो. राज्य सरकार 10 टक्के म्हणल्यार 370 कोटी रुपया खर्च करपाचे अाशिल्ले. हेर 90 टक्के खर्च कुशळटाय विकास प्रशिक्षण दिवपी ‘सिमेन्स’ कंपनी करपाची आशिल्ली. चंद्रबाबू नायडू सरकारान तांच्या वांट्याचे 250 कोटी रुपया शेल कंपनीक ट्रान्स्फर केले. तशेंच ते विशींची कागदपत्रांय नश्ट केली, असो आरोप तांचेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
