भांगरभूंय | प्रतिनिधी
नवी दिल्ली, खबरां संस्था ः योगाचो दिसपट्ट्या जिणेंत आसपाव केल्यार जायत्या दुयेंसां पसून पयस दवरपाक फायदेशीर आसता आनी ताण उणो करपा सावन रगताची येरादारी सुदारपा मेरेन जायत्या गजालीं खातीर योग फायदेशीर आसता. दर वर्सा 21 जून हो दीस ‘आंतरराष्ट्रीय योग दीस’ म्हूण मनयतात. योग ही एक पुर्विल्ली पद्दत जी भारतांत 5000 वर्सां पयलीं सुरू जाल्ली. कूड, मन आनी आत्म्याच्या बऱ्यापणा खातीर ताची उदरगत जाल्ली. योग आसन, प्राणायम आनी ध्यान हाचे संयोजना वरवीं शारिरीक बळगें, मानसीक स्पश्टताय आनी भावनिक समतोल वाडोवपाक मजत करता.
आंतरराष्ट्रीय योग दिसाचो इतिहास
योगाचो आदर करुन ताचो फायदो संवसारभर पातळावपा खातीर प्रधानमंत्री नरेंद्र मोदी हांच्या प्रस्तावावेल्यान संयुक्त राष्ट्रांनी 2014 वर्सा 21 जून हो आंतरराष्ट्रीय योग दीस म्हूण जाहीर केलो. तेन्ना सावन हो दीस संवसारभर मनयतात. हे खातीर लाखांनी लोक एकठांय येवन योग करतात आनी भलायकेन भरिल्ली, चड जागृत जिवीत पद्दत आपणायतात.
आंतरराष्ट्रीय योग दिसाची थीम
आयुश मंत्रालयान आंतरराष्ट्रीय योग दीस 2025 ची थीम जाहीर केला. 21 जून हो दीस “एक पृथ्वी, एक भलायकी” ह्या थीमी वांगडा मनयतले. लोकांक योगा वरवीं चड जाणीवपूर्वक जगपाक, हानी टाळपाक, तांच्या निवडीची जाणविकाय करपाक आनी सैमाचो आदर करपाक प्रोत्साहन दिवप हे ह्या थीमीचे म्हत्व आसा. आमी स्वास घेतात ती हवा, आमी खातात तें जेवण आनी आमी पितात तें उदक हीं सगळीं एकामेकांक जोडिल्लीं आसात. देखून योग आमकां जागृत जावपाक, जापसालदारकी घेवपाक आनी आमच्या जिवितांत आनी आमच्या भोंवतणच्या संवसारांत समतोल मेळोवपाक आदार करता.
असो मनयात आंतरराष्ट्रीय योग दीस
० थळाव्या गटाचो भाग जावन वा घरांतल्यान ऑनलायन वर्गांत वांटो घेवन तुमी 21 जून दिसा आंतरराष्ट्रीय योग दीस मनोवंक शकतात.
० तुमच्या ऑफिसांत, शाळेंत वा तुमच्या शेजारांतल्या पार्कांत लेगीत योग सत्र आयोजीत करूं येता.
० अंदूंची थीम पर्यावरण-अनुकूल सवयींक प्रोत्साहन दिता, देखून परत वापरपाक येवपी उदकाची बाटली हाडची, प्लास्टीक टाळचें आनी तुमच्या योग सत्रांत चलत वा सायकलीन वचात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
