भांगरभूंय | प्रतिनिधी
मुख्यमंत्री डॉ. सावंत हांची घोशणा
भांगरभूंय I प्रतिनिधी
पणजी : आंतरराष्ट्रीय पांवड्या वयल्या खेळां सर्तींनी भारताक पदक मेळोवन दिवपी गोंयकार खेळगड्यांक थेट सरकारी नोकरेंत आस्पावन घेतले. राज्य मंत्रीमंडळाचें बसकेंत हे विशींचो प्रस्ताव मंजूर करतले, अशी घोशणा मुख्यमंत्री डॉ. प्रमोद सावंत हांणी केली.
चेन्नयंत 27 जुलय ते 10 ऑगस्ट ह्या काळांत जाल्ल्या 44व्या बुद्दीबळ ऑलिम्पियाड सर्तींत कांश्यां पदक मेळयिल्ली गोंयकार बुद्दीबळ खेळगडी भक्ती कुलकर्णी हिच्या भोवमान सुवाळ्यांत मुख्यमंत्री मुखेल सोयरे ह्या नात्यान उलयताले.
पणजेंतल्या मिनेझीस ब्रागांझा सभाघरांत आयोजीत कार्यावळींत खेळां मंत्री गोविंद गावडे, खेळां खात्याचे संचालक अजय गावडे आनी हेर मानेस्त हाजीर आशिल्ले.
बुद्दीबळ खेळांत मेळयिल्ल्या येसा खातीर गोंय सरकारा वतीन 10 लाख रुपया भेटोवन भक्ती कुलकर्णीचो भोवमान केलो. ते भायर तिची गोंय खेळां प्राधिकरणांत सरकारी नोकरेंतूय नेमणूक करतले, अशें मुख्यमंत्री डॉ. प्रमोद सावंत हांणी घोशीत केले.
भक्ती कुलकर्णीन बुद्दीबळ खेळांत सातत्य राखले. ते खातीरूच तिका विवीध राज्यांतल्या सर्तींनी येस मेळोवप शक्य जालें. फुडले ऑलिम्पीक सर्तीत भक्तीक निश्चीत भांगरा पदक मेळटलें, असो विस्वास मुख्यमंत्र्यान उक्तायलो.
तशेंच हाचे मुखार आंतरराष्ट्रीय खेळगड्यांक रोख रकमेची इनामां वा साधनसुविधां खातीर वाट पळोवची लागची ना. कोवीड म्हामारी उपरांत ज्या खेळगड्यांक इनामां मेळूंक नात, तांकां 29 ऑगस्ट दिसा आयोजीत कार्यावळींत इनामां भेटयतले, अशेंय तांणी सांगलें.
आतां मेरेन फक्त तीन ते चार सरकारी खात्यांनीच खेळगड्यांक नोकरे खातीर आरक्षण दिल्लें. तांकां हेर क्षेत्रांतूय आरक्षण मेळचें, हे
खातीर यत्न करतले. राज्यांतले बुद्दीबळ खेळगडे तशेंच हेर खेळां विभागांतल्या खेळगड्यांक
सरकारा कडल्यान मजत मेळटली, अशी हमीय मुख्यमंत्री डॉ. सावंत हांणी दिली.
ह्या वेळार भक्ती कुलकर्णी हिणें बुद्दीबळ क्षेत्रांतलो आपलो प्रवास लोकां मुखार मांडलो. सहकार्या खातीर तिणें राज्य सरकाराचे उपकार लेगीत मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
