भांगरभूंय | प्रतिनिधी
12 वर्सां पिराये सकयले राष्ट्रकूल बुद्दीबळ वस्तादपण सर्तीच्या उक्त्या गटांत गोंयच्या अॅथन वाझान भारताक भांगरा पदक जिखून दिलें. 14 ते 12 नोव्हेंबर मेरेन श्रीलंकेंत सर्तीचें आयोजन केल्लें.
अॅथन वाझान भांगरा पदक जिखून देशाचें आनी गोंयचें नांव परतून पर्जळ्ळीत केलें. उक्त्या गटांत आशियायी युवा बुद्दीबळ सर्त जिखपी तो गोंयचो पयलो खेळगडो आसा. ह्या जैतान ताचेर सगले वटेच्यान परबींचो पावस पडपाक लागला.
येरादारी मंत्री मावीन गुदिन्हो, आमदार जोशुआ डिसौझा, आमदार विजय सरदेसाय हांणी अॅथन वाझाची तोखणाय केल्या. अॅथन मडगांवच्या सां जुझे दी आरियल शाळेंत शिकता.
अॅथनान राज्य, राष्ट्रीय, पश्चीम आशिया, आशियायी स्कूल आनी संवसारीक बुद्दीबळ वस्तादपण सर्तींत साबार पदकां जिखल्यात.
वर्साचे सुरवातीक राष्ट्रीय 12 वर्सां पिराये सकयले उक्ते बुद्दीबल वस्तादपण सर्तींत कांश्या पदक जिखिल्ल्यान अॅथनाची फिडे वर्ल्ड कॅडेट्स बुद्दीबळ सर्तींत भारताचें प्रतिनिधित्व करपा खातीर निवड जाल्ली.
वर्ल्ड कॅडेट्स बुद्दीबळ वस्तादपण सर्त 16 ते 27 सप्टेंबर 2022 ह्या कालावधीत जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
