भांगरभूंय | प्रतिनिधी
लंडन वचपी 241 जाणांक मरण
अजापीत तरेन एकलो वाटावलो
गुजरातचे आदले मुख्यमंत्री विजय रुपाणी करताले प्रवास
खबरां संस्था
अहमदाबाद : अहमदाबादांत अॅर इंडियाचे बोईंग 787 ड्रीमलायनर विमान कोसळ्ळें. विमानांतल्या सगल्या 241 जाणांक मरण आयलें. जाल्यार एक प्रवासी अजापीत तरेन वाटावलो. ताचेर सध्या हॉस्पिटलांत उपचार चालू आसात. ताचें नांव रमेश विश्वस कुमार. तो 11 ए सीटा वयल्यान प्रवास करतालो. ही म्हायती जंकारी अहमदाबादचे पुलीस आयुक्त जी एस मलीक हांणी दिल्या.
विमानांत 230 प्रवासी आशिल्ले. तातूंत 169 भारतीय, 53 ब्रिटीश, 7 पुर्तुगीज आनी एक कॅनडियन नागरीक आशिल्लो. उरिल्ले 12 जाण क्रू मेंबर आशिल्ले.
दुर्घटणेचे सुवातेर सांपडिल्ल्यो खूबश्यो कुडी सामक्योच लाशिल्ल्यो. तांची वळख पटोवप खूब कठीण आसा. डीएनए चांचणे उपरांतूच तांची वळख पटोवप शक्य जातलें.
ह्या विमानांतल्यान गुजरातचे आदले मुख्यमंत्री विजय रुपाणी हेवूय प्रवास करताले.
जे इमारतीक विमान आपटलें ते इमारतींत अहमदाबाद सिव्हील हॉस्पिटलाचे दोतोर रावतात. म्हायती प्रमाण 15 दोतोर जखमी जाल्यात.
अॅर इंडियाच्या विमान क्रमांक एआय-171 दनपारां 1.38 वरांचेर लंडन वचपाक उड्डाण केलें आनी तें 1.40 वरांचेर कोसळ्ळें.
मेळिल्ले म्हायती प्रमाण, विमान विमानतळाच्या वण्टी लागसार आनी अॅर कस्टम कार्गो ऑफिसा लागसार पडलें. विमान पडटाच पुराय वाठारांत धुंवराचे लोट दिसले.
अहमदाबादांत जे इमारतीचेर अॅर इंडियाचें बोईंग 787 ड्रीमलायनर विमान कोसळिल्लें ते इमारतींत अहमदाबाद सिव्हील हॉस्पिटलाचे इंटर्न दोतोर रावताले. हे इंटर्न दोतोरांचें हॉस्टेल आशिल्लें. विमान पडलें तेन्ना थंय 50 ते 60 इंटर्न दोतोर आशिल्ले.
रातीं उसरां हॉस्टेलांतल्यान स कुडी काडिल्ल्याची म्हायती मेळिल्ली. भितर आनिकूय कुडी आशिल्ल्याचो दुबाव आसा. विमानाक लागिल्ल्या उज्याक लागून येवपी धुंवरान हॉस्टेलाची पुराय इमारत पुराय काळी जाल्या.
अजापीत तरेन एक प्रवासी वाटावलो
विमान पडटना विमानांतल्यान उडी मारली हे खातीर आपलो जीव वाटावलो, असो दावो 38 वर्सां पिरायेच्या रमेश विश्वासकुमार ह्या प्रवाशान दावो केला.
टाटा समुहाची 1 कोटीची मजत जाहीर
विमान दुर्घटणेंत मरण आयिल्ल्यांच्या घरच्यांक दरेकी 1 कोटी रुपयांची मजत जाहीर केल्या. जखमीच्या उपचाराचो खर्च लेगीत टाटा समूह करतलो. तेचवरी बी. जे. मॅडिकल हॉस्टेल बांदपाक लेगीत मजत करतलो.
प्रधानमंत्र्यान उक्तायलें दुख्ख
अहमादाबांत जाल्ले विमान दुर्घटणेचेर प्रधानमंत्री नरेंद्र मोदी हांणी खर दुख्ख उक्तायलें. हे घडणुकेन आपल्याक व्हड धपको बसला. हे दुर्घटणेक लागून पराय देश सुन्न जाला अशें तांणी म्हणलां. हे दुर्घटणेंतल्या पिडितांक ताकतिकेन आनी परिणामकारक पद्दतीन मजत मेळची हे खातीर आपणे संबंदीत मंत्री आनी प्रशासना कडेन सेगीत संपर्कांत आसा. ह्या दुख्खाच्या वेळार, आपल्यो सहवेदना हे दुर्घटणेची धग लागिल्ल्या सगल्यां वांगडा आसात, अशें प्रधानमंत्र्यान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
