भांगरभूंय | प्रतिनिधी
मार्गाक हुतात्मा बाळा राया मापारी हांचें नांवः डॉ. प्रमोद सावंत
भांगरभूंय । प्रतिनिधी
दिवचलः अस्नोडें- मुळगांव ह्या बायपास मार्गाक गोंय मुक्ती संग्रामांतले पयले हुतात्मा बाळा राया मापारी हांचें नांव दितले, अशी घोशणा मुख्यमंत्री डॉ. प्रमोद सावंत हांणी केली. सुमार 160 कोटी रुपया खर्च करून बांदपा आशिल्ल्या ह्या रस्त्या खातीर बुन्यादी फातर बसयले उपरांत मुख्यमंत्री उलयताले. हो बायपास रस्तो 3 किलोमिटर अंतराचो आसतलो. ताचेर दोन उड्डाण पूल आसतले.
बुन्यादी फातर बसोवपाच्या सुवाळ्याक मुख्यमंत्र्यां वांगडा मंत्री निळकंठ हळर्णकार, आमदार डॉ. चंद्रकांत शेट्ये, आमदार प्रेमेंद्र शेट, जिल्हो अध्यक्ष शंकर चोडणकार, सपना मापारी, दीक्षा कांदोळकार हाजीर आशिल्ली.
डबल इंजीन सरकारान गोंयांत पूल, रस्ते अश्यो साबार सुविधा दिल्यात आनी सगळ्याच घटकांची उदरगत केल्या. हो म्हत्वाचो बायपास दोन वर्सांत पुराय करपाची मोख दवरल्या. फुडले वेंचणुके आदीं ताचें उक्तावण जातलें. फुडल्या पांच वर्सांत 30 हजार कोटींचे उदरगतीचे प्रकल्प साकार करतले. काँग्रेस सरकारान 2012 मेरेन कसलेंच उदरगतीचें काम करूंक ना. भाजपा सरकारान सगळ्याच मळार उदरगत केल्या. ते खातीर उदरगतीचे प्रक्रियेंत आदार करात, अशें मुख्यमंत्र्यान सांगलें.
अस्नोड्यां मुळावें भलायकी केंद्र उबारतलें, अशें मुख्यमंत्री डॉ. सावंत हांणी जाहीर केलें. गोंयांतल्या दरेका म्हालांत सुसज्ज प्रशासकीय इमारत बांदतले. तशेंच जे पूल, रस्ते बांदपाचें नियोजन आसा, तेवूय पुराय करतले, अशें तांणी स्पश्ट केलें.
कुडचिऱ्यां सरकारी जमनीर सीएनडी प्रकल्प उबारपाचो प्रस्ताव आसा. ताका विरोध करपाची भुमिका चुकिची आसा. हाचे वयल्यान मुख्यमंत्री बेजार जाले.
सरकारी जमनीर सरकारी प्रकल्पांक विरोध करपाची भुमिका उदरगतीक घातक आसा. काँग्रेसीचे लोक आनी हेर विरोधक लोकांक खुबळायतात. काँग्रेसीन गोंयांत कसलेच प्रकल्प हाडूंक नात, मात सत्तेर येवप शक्य नाशिल्ल्यान मेळत ताका विरोध करून बुरशें राजकारण करतात, अशी टिका मुख्यमंत्र्यान केली.
आयज गोंयांत डबल इंजिनाक लागून व्हड उदरगत जाल्या. डॉ. प्रमोद सावंत हांकां लागून पांच वर्सांत सगळ्याच मळार उदरगत जातली, अशें राजसभा खासदार सदानंद शेट तानावडे हांणी सांगलें.
मंत्री निळकंठ हळर्णकार हांणी सांगलें, स्वयंपूर्ण गोंयचे शिल्पकार डॉ. प्रमोद सावंत हांणी गोंयचे उदरगतीक व्हड प्रमाणांत चालना दिल्या. अस्नोडें- मुळगांव बायपास रस्त्याची 30 वर्सांचीं मागणी आयज पुराय जाता, हे खातीर तांणी खोस उक्तायली.
आमदार डॉ. चंद्रकांत शेट्ये हांणी सांगलें, हो नवो बायपास ह्या वाठारा खातीर खुबूच फायद्याचो थारतलो. मुख्यमंत्री डॉ. सावंत हांणी उदरगतीक गती दितना खूबशे प्रकल्प पुराय केल्यात आनी ताका लागून सगळे वटेन उदरगत जाता. दरेकल्यान उदरगतीक आदार केलो जाल्यार दर्जेदार प्रकल्प साकारप सहज शक्य आसा, अशें तांणी सांगलें. सुत्रसंचालन गोविंद भगत हांणी केलें.
‘कुडचिरें प्रकल्पाक लागून प्रदुशण जावचें ना’
सरकाराचे जमनीर बेकायदेशीर तरेन चिरे काडटात, मात सरकाराच्या प्रकल्पाक विरोध करतात, हो कसलो प्रकार? तो प्रकल्प कसलो आसा, तें आदीं समजून घेवप म्हत्वाचें आसा. ताचे आदींच विरोध करप चुकीचें आसा. रस्त्याचे कुशीक सगळे तरेचो कोयर, सिमेंट उडोवन रस्ते बुरशे करतात. गोंय पर्यटन केंद्र आसा. गोंयचें सैम पळोवपा खातीर पर्यटक येतात. ते खातीर रस्त्या कुशीक कोयर उडोवन ते बुरशे करप सामकें चुकीचें. कुडचिरें प्रकल्प बांदकाम अवशेश प्रक्रिया करपी प्रकल्प आसा. ताका लागून कसलेंच प्रदुशण जावचें ना, अशी हमी मुख्यमंत्री डॉ. प्रमोद सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
