भांगरभूंय | प्रतिनिधी
ऋषी शुक्लाः मेळिल्लो वेळ देशसेवे खातीर दिवपाचो उलो
भांगरभूंय । प्रतिनिधी
पेडणें: सध्या इंटरनेट सोशल मिडिया वरवीं आनी सोशल मिडिया वरवीं अश्लिलतेक व्हड म्हत्व दितात. ताचे कडेन आकर्शीत जावन खूबशे तरणाटे आपलो वेळ पेड्डेर करतात. ताचेर नियंत्रण दवरचे खातीर दरेकल्यान जनदागृती करतना मेळिल्लो वेळ देश सेवे खातीर दिवचो. अशें केल्यारूच समाज सुदारतलो आनी उजवाडा वटेन वचपाक वेळ लागचो ना, असो संदेश उत्तर प्रदेशांतले पुलीस खात्याक नोकरेक आशिल्ले कॉन्स्टेबल ऋषी शुक्ला हांणी दिलो.
ऋषी शुक्ला हे पुराय देशांत अश्लिलते आड जनजागृती करचे खातीर 150 दिसांची सायकल भोंवडी करतात. 29 ऑक्टोबराक ते तुयां आयटीआय वाठारांत पाविल्ले. त्या वेळार आमच्या प्रतिनिधीन तांची भेट घेतली आनी चर्चा केली.
शुक्ला हांणी सांगलें, आयज काल टीव्ही, इंटरनेट, फेसबूक, इंस्टाग्राम, व्हॉटस्अप अशा विवीध माध्यमांतल्यान एकादी बरी जायरात आसत जाल्यार ताका जोडुनूच आश्लिलतेचो प्रसार करतात. ही घाताची शिटकावणी. तिका म्हत्व दिवपी खूबशे तरणाटे हातूंत घुस्पल्यात. तांच्या फुडारांतलो हो धोको वळखून तांणी हे पासून पयस वचून आपलो वेळ देश सेवे खातीर दिवचो आनी देश बळिश्ट करपाचो यत्न करचो, असो उलो शुक्ला हांणी मारलो.
150 दिसांची रजा आनी सायकल प्रवास करपा खातीर आपणे आपल्या खात्याक पत्र बरयलें आनी तांणी परवानगी दिली. पूण 150 दिसांचो पगार आपल्याक मेळचो ना. तरीय आपल्याक ताची पर्वा ना. देशांतले खूबशे तरणाटे वायट मार्गाचेर पावल्यात. तांचो फुडार धोक्याचो आसा, हें वळखून आपणे सायकल भोंवडे वरवीं तांकां योग्य संदेश दिवपाचो वावर करता, अशें शुक्ला हांणी सांगलें. सध्या टीव्ही आनी चित्रपटाच्या माध्यमांतल्यान अस्तुरेचें अश्लील चित्र व्हड प्रमाणांत रंगोवपाचो यत्न चल्ला. तरी लेगीत संवेदनशील आशिल्ली अस्तुरी ओग्गी रावल्या. हे गजाली कडेन आडनदर करून चलचें ना. नारीशक्ती जागृत जावपाकूच जाय, अशे शुक्ला हांणी सांगलें.
बीन पगारी जनजागृती
ऋषी शुक्ला हे पुलीस खात्याक कॉन्स्टेबल म्हूण नोकरी करता. तांणी 150 दिसांची रजा काडून अश्लिलते आड जनजागृती करपाक सायकलीन देशभरांत प्रवास सुरू केला. आतां मेरेन तांणी 75 दिसांचो तांणी गोंय आनी कर्नाटकांतलो प्रवास केला. आतां शुक्ला अयोध्या ते दिल्ली मेरेन प्रवास करतले. हे भोंवडेंत तांकां जे कोण वाटेर जेवण वा खावपाक दितात, तें मानान घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
