अशक्य लेगीत शक्य करतले मोदी ?

भांगरभूंय | प्रतिनिधी

विरोधकांक आतां मेरेन खूब मजल मारपाची संद आशिल्ली. मात आपापसांत झगडत बसपाक चार वर्सां केन्ना सोपलीं आनी वेंचणुकांच्यो तारखो कश्यो लागत गेल्यो हें लेगीत तांकां कळ्ळें ना.

देशांतले सगलेच विरोधक आयज भाजपाच्या ‘झंझावाता’ सामकार सामके थतरवीतर जाल्ल्याचे चित्र दिसतना प्रधानमंत्री नरेंद्र मोदी हांणी आपल्या पक्षाच्या स्थापणूक दिसाचें निमित्त सादून विधानसभा आनी फुडल्या वर्साचे सुरवेक जावपी लोकसभेच्या वेंचणुकां खातीर स्वताक शंबर टक्के ओंपून घेतिल्ल्याचें सगलो देश पळयता. अशक्य दिसपी येस ओडून हाडून ताचेर स्वार जावपाचीं सपनां नरेंद्र मोदी एके वटेन पळयत आसात जाल्यार दुसरे वटेन वर्स- दोन वर्सां सावन मोदी विरोधांत म्हाआघाडी स्थापन करपा खातीर व्यस्त आशिल्ल्या भाजपा विरोधकांची गाडी इंचभर लेगीत फुडें सरकना. उरफाटी ती फाटीं वचपाक लागल्या. कर्नाटकाची विधानसभा वेंचणूक जाल्यार आतां एका म्हयन्याचेर पावल्या. अशा वेळार विरोधकां मदले चर्चेच्या वेळार सुसंवादाची सुवात विसंवादान घेतल्ली दिसता. ताका लागून विरोधकां सामकार येवपी वेंचणुकांनी, चड करून लोकसभा वेंचणुकेंत कसलें ताट वाढून दवरिल्लें आसतलें हाची आतांच कल्पना करप शक्य आसा. अशक्य अश्यो गजाली करून दाखोवपाचें आव्हान नरेंद्र मोदी हांणी स्विकारलां, अशें दिसता जाल्यार विरोधकांक ‘अशक्य’ ह्या शब्दाक न्याय दिवन ताची व्याख्या बदलची अशें दिसना, अशें सद्याच्या तांच्या इबाडल्ल्या सुरां वयल्यान स्पश्ट दिसपाक लागलां. अशक्य लेगीत शक्य करतले मोदी हो आशावाद सद्या वाडीक लागला. जाल्यार अश्यो जायत्यो घडणुको घडपाक लागल्यात जाका लागून म्हाआघाडी स्थापन करून भाजपाक जेरीक हाडपाची विरोधकांची आदली उमेद देंवल्ली दिसता.
केंद्रीय तपास यंत्रणांचो विरोधकां आड कसलेंच बंधन नासतना जाय तसो वापर करतात असो आरोप करतल्यांक सर्वोच्च न्यायालयान असो धपको दिला की आतां वेंचणुकेच्या जाहीर प्रचारांतूय विरोधी फुडारी ते विशीं कितले मेरेन छातीठोकपणान उलोवपाक शकतले, हाचो दुबाव आसा. प्रधानमंत्री नरेंद्र मोदी आनी तांच्या भाजपाक हाका लागून वेंचणूक प्रचारा खातीर आनीक एक नवें अस्त्र हातांत मेळ्ळां. भाजपा कडेन पयलीं असल्या हत्त्यारांचो उणाव ना आनी तातूंत सर्वोच्च न्यायालयान दिल्ल्या आनी एका निवाड्याच्या रुपांतल्या हत्त्याराची भर पडल्या. नरेंद्र मोदी सध्या दरेका कार्यावळींत ह्याच अस्त्राचो चडांत चड वापर करतना दिसतात. ताचे फाटलें कारण अर्थांतूच स्पश्ट आसा आनी तें म्हणल्यार अशक्य दिसपी गजाली तांच्या सरकाराक साध्य करपाच्यो आसात. सेगीत तीन फावट एकाच नेतृत्वा खाला लोकसभा वेंचणुको जिखप हें सादेसुदें कर्तृत्व न्हय आनी ताचो आसपाव फकत ‘अशक्य’ हेच वर्गवारींत करचो पडटलो. मात, जैताची हॅटट्रिक करपाचो संकल्प प्रधानमंत्री नरेंद्र मोदी आनी तांच्या भाजपान सोडला आनी सध्याचे घडीक निदान ‘अशक्य’ हें उतर नरेंद्र मोदी हांच्या शब्दकोशांत आसा, अशें दिसना. फाटल्या तीन- चार वर्सांत जाल्यार काश्मीर पसून अयोध्येतल्या राम मंदिरा मेरेन अशक्य अश्यो दिसताल्यो त्यो जायत्यो गजाली तांणी साध्य केल्यात. ताकाच लागून लोकसभेच्या जैताची अशक्य दिसपी हॅटट्रिक ते करतले हें सध्या तरी विरोधकांच्या बॉडी लँग्वेजींतल्यान स्पश्ट दिसता. विरोधकांची भ्रश्टाचाराच्या समान अश्या मुद्द्या वयल्यान तरी एकी जातली, एकवटाची गाडी धांवपाक लागतली अशे अदमास करताले, पूण खंयचें कितें! सध्या विरोधकांची जाल्ली असाह्य अवस्था पळयल्यार ताचो फायदो नरेंद्र मोदी हांणी करून घेतलोना जाल्यार अजाप दिसपाचें.
विरोधी पक्षाचे एक ज्येश्ठ फुडारी शरद पवार हांणी जाल्यार आयत्या वेळार केल्ल्या एका निवेदनान राहुल गांधी सयत सगल्या फुडाऱ्यांचें आशिल्लें नाशिल्लें अवसान गळ्ळां. विरोधी पक्षांचो एकवोट जावचो हे खातीर काम करपी एक वरिश्ठ जाण्टो फुडारी म्हणून सगळेच विरोधक तांचो शब्द सकल पडपाक दिनात. राजकारणाचो तांचो अणभव जाल्यार पांच- स दशकांचो. काँग्रेस सयत सगळे विरोधक अदानी उद्देग समुहा आड उजो ओकून जोड संसदीय समिती वतीन तांची चवकशी जावची, हे एकेच मागणेचेर ठाम आसतना अदानीची बाजू घेवन शरद पवार हांणीच एकवटाचो बरोच फुगिल्लो फुगो फोडपाचें काम केलां आनी एक वेळार हवेंत उडपी विरोधकांक परत जमनीर आपटल्यात. अदानी उद्देग समुहाक थारावन लक्ष्य करप चालू आसा, ह्या पवार हांणी केल्ल्या विधानान जें कितें जावपाची अपेक्षा आशिल्ली तेंच घडटा आनी भाजपाक जाल्यार ह्या विधानान हतयाचें बळ मेळ्ळां. अदानी उद्देग समुहाच्या वेव्हारा विशीं चवकशी करपाक जोड संसदीय समितीची गरजूच नाशिल्ल्याचो दावो ‘जाणत्या राजा’न केल्ल्यान विरोधक तोंडार आपटल्यात आनी विरोधकांचो जावपाक घातिल्लो एकवोट परत बरोच फाटीं पडला. तोंडा कडेन आशिल्ल्यो विधानसभा आनी लोकसभा वेंचणुको पळयल्यार विरोधकां खातीर सध्या ‘रात थोडी संवगां चड’ अशी वायट परिस्थिती तयार जाल्या. अदानीच्या कथीत घोटाळ्या विशीं 18- 19 विरोधी पक्षांचें एकमत आसतना शरद पवार हांणी वेगळोच सूर लायिल्ल्यान सगळ्यांचीच पंचायत जाल्या. ह्या धपक्यांतल्यान साल्वार जावपाक विरोधकांक अजून कितलो तेप लागतलो आनी त्या उपरांतूय घडये एकवट जालोच जाल्यार ताचो कसलोच फायदो विरोधकांक जावचो ना. तो मेरेन बरोच वेळ गेल्लो आसतलो. भाजपाच्या स्थापणूक दिसा विरोधकांचो समाचार घेतनाय प्रधानमंत्री नरेंद्र मोदी हांणी विरोधकांक कमी लेखूं नाकात, आपस्तुतींत रावनाकात असो जो कळकळीचो सल्लो दिला, तोंय आयज सामको म्हत्वाचो.
चौफेर धांवपी भाजपाच्या घोड्याक आडावप आयज निदान विरोधकांक शक्य जावचें ना हें कोणूय सांगतलो. अशक्य लेगीत शक्य करपा खातीर जी इत्सा, जिद्द, शिस्तबद्धता जाय तीच मुदलांत विरोधकां कडेन अस्तित्वांतूच नाशिल्ल्यान भारतीय जनपा पक्षाचें काम सामकें सोपें जालां. राहुल गांधी हांचे नेतृत्व जाल्यार कांय मुखेल पक्ष स्विकारपाक तयार नात. भारत जोडो यात्रा ही कितें ती राहुलाची आतां मेरेनची जोड, पूण ती लेगीत विदेशांत तांणी वगडायली. खासदारकी गेल्या अश्या वेळार ताका कोणेय लागीं करप म्हणल्यार भाजपाक हात दिवपा सारकें आशिल्ल्याचें ममतादिदी, अखिलेश सयत जायत्या जाणाचें मत आसा आनी तें चूक अशें म्हणपाक जावचें ना. राजस्थान लेगीत भाजपाच्या निशाण्यार आशिल्ल्याचें दिसपाक लागलां. वास्तवीक विरोधकांक आतां मेरेन खूब मजल मारपाची संद आशिल्ली. मात आपापसांत झगडत बसपाक चार वर्सां केन्ना सोपलीं आनी वेंचणुकांच्यो तारखो कश्यो लागत गेल्यो हें लेगीत तांकां कळ्ळें ना. आतां देशा खातीर कांय ठोस अशी अर्थीक वा समाजीक कार्यावळ घेवन विरोधी पक्ष फुडें येतले अशें म्हणचें जाल्यार ते आघाडेर सगळो ठणठणातूच आसा. मागीर तांच्या फाटल्यान जनता खंबीरपणान उबी रावपाची अपेक्षा तरी तांणी कित्याक करची? भाजपा नाका ह्या एकाच मुद्द्याचेर लोकां सामकार मतां खातीर वतले जाल्यार फकत निर्शेणीच तुमच्या पदरांत पडटली हें आनी वेगळें सांगपाची गरज ना. नरेंद्र मोदी हांणी परत सत्ता संपादन करपाचो संकल्प तर सोडला आनी अशक्य लेगीत शक्य करून दाखोवपांत ते माहीर आसात. विरोधकांनी हे फावट तांकां जैता खातीर संघर्श करपाक फोर्सार केलें जाल्यारूच तांच्या उज्ज्वल फुडारा खातीर ती एक जमेची गजाल थारपाक शकतली.

वामन प्रभू
9823196359