भांगरभूंय | प्रतिनिधी
राष्ट्रकूल खेळां सर्तींत भारताच्या खेळगड्यांची दोळेदिपकावपी कामगिरी चालूच आसा. काल सर्तीच्या णवव्या दिसा अॅथलेटिक्सांत भारताक तीन इतिहासीक पदकां फावो जालीं.
बायलांच्या 10 हजार मिटर चलपाचे सर्तींत प्रियांका गोस्वामीन रुप्या पदक जिखलें. ते उपरांत अविनाश साबळेन तीन हजार मिटर आडखळांचे सर्तींत रुप्या पदक जोडलें, जाल्यार दादल्यांच्या लॉन बॉल्सांत रुपें फावो जालें.
अविनाश साबळेन 8.11.20 मिनटांनी सर्त पुर्ण केली. हाचे सयत ताणें तीन हजार मिटर सर्तींत नवो राष्ट्रीय विक्रम नोंदयलो. अविनाश हो भांगरा पदक जिखपी अब्राहम किबिव्होटा परस फक्त 0.5 सेकंद फाटीं उरलो. केनियाच्या अब्राहमान 8.11.15 मिनटांनी सर्त पुर्ण केली.
मजगतीं, प्रियांकान बायलांची 10 हजार मिटर चलपाची सर्त 43.38 मिनटांनी पुर्ण केली. ऑस्ट्रेलियेचे जेमिमान 42.34 मिनटांची वेळ नोंदयत भांगरा पदक जिखलें. प्रियांका पयलीं चार मिनटां आघाडीचेर आशिल्ली. पूण, उपरांत ऑस्ट्रेलियेचे जेमिमान आघाडी घेत भांगरा पदक निश्चीत केलें.
दादल्यांच्या लॉन बॉल्स पंगडाक दुसरी सुवात
तशेंच लॉन बॉल्स सांघीक (4) प्रकारांत भारताच्या दादल्यांच्या पंगडान रुप्या पदक जिखून इतिहास घडयलो. दादल्यां पयलीं भारताच्या बायलांच्या पंगडान भांगरा पदक जिखून इतिहास घडयिल्लो.
दादल्यांची लॉन बॉल्साची फायनल बारत आनी उत्तर आयर्लेण्ड हांचे मदीं जाली. उत्तर आयर्लेण्डान भारताक 18-5 अशा फरकांनी हारोवन भांगरा पदक जिखलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
