भांगरभूंय | प्रतिनिधी
भांगरभूंय I प्रतिनिधी
पणजी : 20 नोव्हेंबर सावन सुरू जावपी आंतरराष्ट्रीय चित्रपट महोत्सवाची (इफ्फी) सुरवात ऑस्ट्रीयन चित्रपट अल्मा आनी ऑस्कर ह्या चित्रपटान जातली. डायटर बर्नर हांणी दिग्दर्शित केल्लो हो चित्रपट 110 मिण्टांचो आसा. इफ्फीच्या उक्तावणा उपरांत अल्मा आनी ऑस्कर ह्या चित्रपटांचें सगल्या थिएटरांनी प्रदर्शन जातलें. व्हिएनीज समाजांतली प्रतिश्टीत बायल अल्मा महलर आनी ऑस्ट्रीयन कलाकार ऑस्कर कोकोस्का हांचे मदल्या नात्याचेर आदारीत हो चित्रपट आसा. संगीतकार आनी कलाकार हांचे मदल्या प्रेमसंबंदाचेर आदारीत चित्रपटान इफ्फीची सुरवात जातली. चित्रपटांतली अभिनेत्री ऑस्कर कोकोस्का ही एक चित्रकार आसा. तिचो घोव गुस्ताव महलरच्या मरणा उपरांत वास्तुशिल्पकार वॉल्टर ग्रोपियस हाचे वांगडा तिचे नातें सुरू जाता. ह्याच वेळार अल्मा हिचो ऑस्कर कोकोस्को कडेन संपर्क येता. अल्मा कोकोस्कोचेर आदारीत व्हड कलाकृती तयार करता, अशें तांचें मदलें नातें आसा.
इफ्फींत इंडियन पॅनोरेमा, काँपिंटेशन सेक्शन तशेंच शुभारंभी चित्रपट जाहीर जाला.
हॉरर (भिरांकूळ) चित्रपटांचे प्रदर्शन
हॉरर हो एक चित्रपटांचो खाशेलो फांटो आसा. ह्या महोत्सवांत हॉरर चित्रपटांचें प्रदर्शन जातलें. नायट सिरेन (स्लोवाकिया), हुईसेरा (पेरू), व्हीनस (स्पेन), हॅचींग (फिनलँड) ह्या चित्रपटांचें प्रदर्शन जातलें. पयलेच खेपे इफ्फींत हॉरर चित्रपटांचे खाशेल्या गटांत प्रदर्शन जाता.
सध्या आंतरराष्ट्रीय चित्रपट महोत्सवाची तयारी नेटान सुरू आसा. महोत्सवाक आतां फक्त इकरा दीस उरल्यात. अंदूं आयनॉक्स, मॅक्विनेझ पॅलेस हातूंत चित्रपटांचे प्रदर्शन जातले. कला अकादमीचे नुतनीकरण सुरू आसा. चडशें काम पुराय जाल्ले आसले तरी दिनानाथ मंगेशकार सभाघरांत चित्रपटाचे प्रदर्शन जावचें ना. मात आर्ट गॅलरी तशेंच हेर कांय दालनां उक्तीं जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
