भांगरभूंय | प्रतिनिधी
संवसारीक क्रमवारींत पयले सुवातेर आशिल्ल्या स्पेनाच्या कार्लोस अल्कराज आनी रशियेचो तिसरे सुवाते वयलो दानील मेदवेदेव हाणें कठीण वातावरणांत लेगीत सरळ सेटांनी जैत जोडून अमेरिकन ओपनाचे सेमी फायनलींत सुवात मेळयली.
सध्याचो वस्ताद अल्कराजान जर्मनीच्या अलेक्झेंडर झ्वेरेवाक 6-3, 6-2 आनी 6-4 अशा सरळ सेटांनी हारयलो. ह्या जैता सयत अक्लराज अमेरिकन ओपनाचो किताब सेगीत दुसऱ्या वर्सा जिखपाच्या आनीक लागसार पावलो. स्वित्झर्लेण्डाचो म्हान खेळगडो रोजर फॅडररान 2004 ते 2008 मेरेन सेगीत पांच किताब जिखिल्ली. ताच्या उपरांत दादल्यांच्या एकोड्या गटांत एकाय खेळगड्याक आपल्या किताबाची राखण करपाक जमूंक ना.
मजगतीं, मेदवेदेवान सोंसपाक जायना अशे गर्मेंत खेळटना आपल्याच देशाच्या आंद्रे रुबलेवाक हारोवन चवथे खेपे अमेरिकन ओपनाचे सेमी फायनलींत सुवात मेळयली.
फ्लशिंग मिडोजांत तापमान 35 डिग्री सेल्सियसा मेरेन पाविल्लो. अशा वातावरणांत खेळप खूब कठीण जाल्लें. मॅची वेळार मेदवेदेवान हिनलॅहराचो वापर केलो आनी वैजकी मजत लेगीत घेतली. कठीण परिस्थितींत लेगीत ताणें प्रतिस्पर्धी खेळगड्याक 6-4, 6-3 आनी 6-4 अशा सरळ सेटांनी हारयलो.
गर्मेक लागून खेळगड्यांक गंभीर समस्यांक तोंड दिवचें पडुये अशें मॅच सोंपल्या उपरांत पत्रकारां कडे उलयतना मेदवेदेवान सांगलें.
अशा वातावरणांत खेळटना खेळगड्याचो जीव लेगीत वचपाक शकता अशें ताणें मुखार म्हणलें.
मजगतीं, जर अल्कराज सेमी फायनलींत जैत जोडपाक येसस्वी थारता तर फायनलींत तो जोकोवीचा आड खेळपाक शकता. जोकोवीच दुसरे सेमी फायनलींत अमेरिकेच्या 20 वर्सां पिरायेच्या बेन शेल्टना आड खेळटलो. शेल्टन पयले खेपे ग्रॅण्ड स्लॅम सर्तीचे सेमी फायनलींत पावला.
बायलांच्या एकोड्या गटांत आर्यना सबालेंकान झेंग किनवेनाक 6-1 आनी 6-4 अशा फरकान हारयली. तिणें ग्रॅण्ड स्लॅम सर्तींनी सेगीत पांचवे खेपे सेमी फायनलींत सुवात मेळयली. सबालेंका फुडल्या सप्तकांक रॅंकिंगेंत पयले सुवातेर पावतली. ती इगा स्वियातेकाची सुवात घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
