भांगरभूंय | प्रतिनिधी
संवसार करपाक पयशे जाय पडटात. पगार, येणावळ मेळटा ती दीसपट्ट्या गरजांचेर खर्च करची पडटा. फुडाराक भुरग्यांचें शिक्षण, लग्नां, हेर सुवाळे वा कसलेंय संकश्ट आयलें जाल्यार पयसो आसचो म्हूण लोक बँकांनी (खास करून राष्ट्रीयीकृत) पयसो दवरतात. ताचेर व्याज मेळटा खरें, पूण आयकर पसून कापतात. उपरांत एक- देड वर्सां उपरांत ती रक्कम मेळटा. कांय बँकांनी व्हडलेशें व्याज मेळना. देखून बरेच नागरिक चड व्याज मेळटा थंय धांवतात. तातूंत तांची चूक, म्हणपाक मेळचें ना. कारण आयज जगपा खातीर जोडटा तितलो पयसो थोडोच. गोंया सारक्या राज्यांत तर म्हारगाय, अनुकरण, प्रतिश्ठा, झेत अशा कांय कारणांक लागून पयशांचो धुंवर जाता. चड व्याज पतसंस्था दितात. आतां बँकांच्या भानगडींक लागून त्यो त्रासांत पडल्यात. गोंयांतल्या 20 पतसंस्थांचें 175 कोटी रुपया एकेच बँकेंत आडकल्यात. ती बँक म्हणल्यार, अर्थीक भानगडीक लागून गाजिल्ली पंजाब- महाराष्ट्र बँक. एके पतसंस्थेचे तर 70 कोटी रुपया तातूंत आसात. हो पयसो अर्थांत पतसंस्थांच्या खातेदारांचो. पीएमसी बँकूच न्हय, तर हाचे पयलींय गोंयांत कांय बँकांनी, पतसंस्थांनी, भायल्यान आयिल्ल्या अर्थीक संस्थांनी गोंयकारांक चुनो लावन पळ काडला. थोड्यो संचालकांच्या सुवार्थ आनी गैरकारभाराक लागून बुडल्यात. हातूंत खऱ्या अर्थान उमथे पडल्यात ते भितर पयश्यांची गुंतवणूक करपी लोक. कांय शिक्षकांनी जीणभराची जोड गुंतोवपाचे आनी मागीर ती बुडपाचे प्रकार हांगा घडल्यात. समाजांत प्रतिश्ठा आशिल्ल्या लोकांनी सुरू केल्ल्यो बँकोय बुडल्यात. हाका नेमको कोण जापसालदार तो चर्चेचो, संशोधनाचो विशय.
पीएमसी बँकेंत 4 हजार 355 कोटी रुपयांची भानगड जाली, अशें सप्टेंबर 2019 त उक्ताडार आयिल्लें. तीन वर्सां जालीं. कांय जाणांक अटक जाल्या. मात बऱ्याच लोकांचो पयसो परत मेळूंक ना. 25-30 वर्सां नोकरी करून जमयिल्ले सगले पयशे बुडिल्ले 6-7 खातेदार तणावाक लागून मेल्यात. पीएमसी बँकेचें युनिटी स्माॅल फायनान्स बँकेंत विलीनीकरण जालां. मात, रिझर्व्ह बँकेन सांगिल्ले प्रमाण, तातूंत पयशे घाल्ल्या बऱ्याच गिरायकांक आनी पतसंस्थांक पयशे मेळूंक नात. खरें म्हणल्यार सगल्या संचालकांची वैयक्तिक मालमत्ता जप्त करून तो पयसो संबंदीत खातेदारांक दिवंक फावो. तसो कायदोच करपाक जाय. अर्थीक घोटाळ्याक जापसालदार आसात, ते बंदखणींत वतात आनी कांय तेंपान सुटून भायर येतात. मागीर हड्डें फुडें करून मिरयतात. थोडे विदेशांत पळून वतात. आमच्या भारतांत अश्यो साबार देखी आसात. बुडटा तो सामान्य मनीस. कांय राजकी फुडारीच बँको स्थापन करतात. कारण तांकां तो पयसो घोळोवपाक मेळटा. वयल्यान समाजकार्य केलें, असो झेत मारूंक मेळटा.
पीएमसी बँकेंत गोंयांतल्या 20 पतसंस्थांनी पयसो दवरलो तेन्ना तांकां सात टक्के व्याज दिवपाची हमी दिल्ली. पूण भानगड उक्ताडार येतकच सगलो पयसो आडकून उरलो. कांय म्हयन्या पयलीं ठेवी सुरक्षीत आसात, पूण सात टक्के व्याज दिवपाक मेळचें ना, अशें बँकेन कळीत केलां. ते दिवपाक सोदता तो व्याज दर सामको उणो, अशें पतसंस्थांचें मत. देखून आतां ते न्यायालयांत वचपाक सोदतात. म्हणजे आनीक कांय वर्सां हें प्रकरण हुमकळत उरतलें. ह्या पतसंस्थां प्रमाण, गोंयांतल्यो दोन बँकांचेर निर्बंध आयिल्ल्यान, मागीर त्यो बंद जाल्ल्यान नागरिकांक मनस्ताप सोंसचो पडटलो. तांचेर वा हेर पतसंस्थांचेर रिझर्व्ह बँकेचें नियंत्रण आसता, तरीय तांकां वाळटी लागतात. नेमान आॅडिट जायत, ताचेर रिझर्व्ह बँकेचें लक्ष आसत, जाल्यार अर्थीक मळाचेर जावपी हे प्रकार उणे जातले. बँक 2015 वर्सा पोखरली, जाल्यार ताची सुलूस खातेदारांक 2020 त लागता. कांय बँको तर दरवर्सा जमाखर्च खातेदारांक दाखयतात. हाचो अर्थ खंयतरी कितेंतरी चुकता वा कोणतरी फटयता. कांय वर्सां फाटीं मुंबयच्या एका कामगार फुडाऱ्यान टीव्ही वयले चर्चेंत सरकाराचेर टिका करतना हाचे मुखार सहकार मळा वयल्यो बँको, पतसंस्था ल्हवू ल्हवू नाच्च जातल्यो. देशभर मेजक्योच बँको उरतल्यो, अशें भाकीत केल्लें. ताची नांदी सुरू जाल्या असो दुबाव येता, हे अर्थीक मळा वयले घोटाळे, संकश्टां पळयत जाल्यार!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
