भांगरभूंय | प्रतिनिधी
मुख्यमंत्र्यांची फाल्यां सगल्या खात्याच्या सचिवां कडेन बसका
भांगरभूंय I प्रतिनिधी
पणजी : गोंय विधानसभेंत हालीच सादर जाल्ल्या 2023-24च्या अर्थसंकल्पांतल्या घोशणांची बेगोबेग अंमलबजावणी करपा विशीं मुख्यमंत्री डॉ. प्रमोद सावंत हांणी सोमारा सगल्याच खात्यांच्या सचिवांची बसका घेवपाचे निश्चीत केला. ते विशींचो कृती आराखडो (अॅक्शन प्लान) आयतारा दनपारां 12 वरां मेरेन सादर करपाचे निर्देश सचिवांक दिल्यात.
अर्थसंकल्पीय अधिवेशना मजगतीं, 29 मार्च दिसा मुख्यमंत्री डॉ. प्रमोद सावंत हांणी विधानसभा सभाघरांत 2023-24 वर्सा खातीरचो 26,844 कोटी खर्चाचो अर्थसंकल्प सादर केलो. ‘स्वयंपूर्ण गोंय’ मोहिमेक अदीक घटाय दिवपा खातीर मुख्यमत्र्यांनी अर्थसंकल्पांत जायत्यो नव्यो घोशणा केल्यात. समाजांतल्या दरेक घटकाचो विचार करून तांचे उदरगती खातीर कांय नव्यो संकल्पनाय अर्थसंकल्पांत मांडल्यात. ह्या संकल्पनांची आनी येवजण्यांची बेगोबेग अंमलबजावणी करपा खातीर प्रशासकीय बदल करपाचे संकेत मुख्यमंत्र्यांनी दिल्ले. ते फाटभुंयेर तांणी सोमारा सगल्याच खात्यांच्या सचिवांची बसका आपयल्या. सचिवांनी आपापल्या खात्या वरवीं राबोवपी येवजण्यां विशींचो कृती आराखडो तयार करून तो आयतारा 12 वरां मेरेन सादर करपाचे निर्देश मुख्यमंत्र्यांनी तांकां दिल्यात.
घोशणांच्या 100 टक्के अंमलबजावणीचें ध्येय
‘स्वयंपूर्ण गोंय’ मोहिमे वरवीं राज्यांतल्या तळागाळांतल्या लोकांची सर्वांगी उदरगत करपाचें ध्येय मुख्यमंत्र्यांनी नदरे मुखार दवरलां. ताका लागून अंदूंच्या अर्थसंकल्पांतल्या घोशणांची 100 टक्के अंमलबजावणी करपा खातीर तांणी यत्न सुरू केल्यात. ताका लागून सगल्याच खात्यांचे सवीव आनी मुखेली अर्थसंकल्प सादर जाले उपरांत कामाक लागल्यात.
केंद्रीय येवजण्यांच्या जागृताये खातीर
नोडल अधिकारी नेमपाची सुचोवणी
पणजीः केंद्रीय येवजण्यां विशीं राज्यभर जागृताय करून, पात्र लाबार्थ्यांक येवजण्यांचो लाव मेळोवन दिवपाक दरेक खात्यांत एका नोडल अधिकाऱ्याची नेमणूक करपाची सुचोवणी मुख्यमंत्री डॉ. प्रमोद सावंत हांणी सगल्याच खात्याच्या सचिवांक केल्या. दिल्लींतल्या निवासी आयुक्तां कडेन समन्वय दवरून चडांत चड येवजण्यो गोंयांत हाडपाचो सल्लोय तांणी कांय दिसां पयलीं जाल्ले बसकेंत सचिवांक दिल्लो.
केंद्र सरकारा वतीन दरवर्सां विवीध येवजण्यो राबयतात. पूण गोंयांत केंद्रीय येवजण्यांची फावोश्यां प्रमाणांत जागृताय जायना. ताका लागून पात्र लाबार्थ्यांक त्या येवजण्यांचो लाव घेवपाक मेळना. ते खातीर अंदूं अर्थीक वर्सांत केंद्राच्या सगल्याच येवजण्यांची गोंयांत जागृताय करून त्या येवजण्यांचो लाव तळागाळांतल्या लोकां मेरेन पावोवपाचो निश्वेच मुख्यमंत्री डॉ. सावंत हांणी अर्थसंकल्प सादर केले उपरांत उक्तावन दाखयिल्लो. ते प्रमाण आतां तांणी ह्या येवजण्यांच्या जागृताये खातीर दरेक खात्याच्या सचिवांनी दरेक खात्यातं एका नोडल अधिकाऱ्याची नेमणूक करची, अशी सुचोवणी केल्या.
सचिवांनी दिल्लींतल्या निवासी आयुक्तांच्या संपर्कांत रावन तांचे कडेन समन्वय सादूर केंद्रीय येवजण्यांची फाटपुरवण करची, तशेंच गोंयां खातीर विवीध प्रकल्प मंजूर करून घेवचें, असो सल्लोय तांणी दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
