भांगरभूंय | प्रतिनिधी
पेनाल्टी शुटआवटांत 4-2 गोलांनी फ्रान्साक हारयलो
दोहा: फिफा संवसारीक सर्तीचे फायनल मॅचींत फुटबॉल इतिहासांतली उमेद वाडोवपी मॅच पळोवंक मेळ्ळी. पयलीं आलायतो वेळ उपरांत पेनाल्टी शुटआवट अशें सगलें पळोवंक मेळ्ळें.
जातूंत अर्जेंटिना पंगडान फ्रान्साचेर 3-2 अशें जैत मेळोवन संवसारीक फुटबॉल कप जिखलो. विशेश म्हणल्यार जे मेस्सी खातीर अर्जेंटिनाक हो कप जिखपाचो आशिल्लो, त्या मेस्सीनूच मॅचींत सर्वोत्कृश्ट कामगिरी केली. पेनाल्टी शुटआवटांतलो गोल धरून वट्ट दोन गोल मेस्सीन केलें. खाशेली गजाल म्हणल्यार अर्जेंटिनाचो गोलकिपर एमिलानो हाणें उत्कृश्ट खेळ दाखयत पंगडाच्या जैतांत मोलादीक कामगिरी केली. मजगतीं, मॅचीच्या आलायत्या वेळार लिओनील मेस्सीन परतून एक गोल करून 3-2 अशी आघाडी मेळयली. पूण ताची ही उमेद चड वेळ तिगली ना. फुडल्या कांय मिनटांतूच एम्बापेनीन तिसरो गोल करून मॅच 3-3 बरोबरींत हाडली.
108व्या मिनटाक लौटारे मार्टिनेझान गोल गेलो. पूण फ्रान्साचो गोलपिकर लॉरिसनान तो हड्ड्यार बॉल घेवन आडायलो. थंयच आशिल्ल्या मेस्सीन ल्हवूच बॉलाक गोलपोस्टांत धुकल्लो. फ्रान्साच्या उपमेकानोन गोलपोस्टांतल्यान तो परतायलो, पूण तो स्वता गोलपोस्टांत आशिल्ल्यान अर्जेंटिनाचो गोल जालो आनी ताच्या बरें मागप्यांनी ग्रावंड तकलेर घेतलो.
ताचे पयलीं 79व्या मिनटाक फ्रान्साक पेनल्टी मेळ्ळी. फ्रान्साच्या एम्बापेनान अर्जेंटिनाच्या गोलकिपरान जे दिशेन डाय मारली तेच दिशेन गोल केलो. एम्बापेचे गतीन गोलकिपराक चकयत फ्रान्सान गोलाचें खातें उक्तें केलें. आनीक दोन मिणटांत मार्कस लिलिआन थुरम युलियनच्या गतीन पासाचेर तितल्याच नेटान एम्बापेन दोळे दिपकावपी गोल करून फ्रान्साक बरोबरी करून दिली. मॅचीच्या निमाण्या पांवड्यार फ्रान्सान बॉलाचेर नियंत्रण मेळयलें. माँटेइलान एम्बापोची शूट आडावपाचो यत्न केलो. पूण त्या वेळार बॉल ताच्या हाताक लागलो. रेफरींन फ्रान्साक पॅनल्टी दिली. एम्बापेन हॅट्रीक करून फ्रान्साक बरोबरी करून दिली.
पयल्या हाफांत अर्जेंटिनाची आघाडी
गोल करपाचो हातखंडो आशिल्लो मुखेली मेस्सीन संवसारीक फुटबॉल कपाचे फायनलींत फ्रान्सा आड दोळे दिपकावपी गोल केलो. ह्या गोला सयत अर्जेंटिनान आघाडी घेतली. अल्वारोझ आनी डी मारिया बॉलाचेर ताबो मेळोवपा खातीरच्या यत्नांत आसतना फ्रान्साचे राखणे गड्यांनी ताका आडावपा खातीर खर कश्ट घेतले. रेफरीन अर्जेंटिनाक पेनाल्टी मेळिल्ल्याचें जाहीर केलें. अर्जेंटिनाच्या मेस्सीन ल्हानशा रनअपा सयत फ्रान्साच्या गोलकिपराक चकोवन गोल केलो. 23व्या मिनटाकूच गोल जाल्ल्यान फ्रान्साच्या खेळगड्यांचेर चेपण दिसूंक लागलें. मेस्सीचो अंदूंच्या संवसारीक कपांतलो हो सवो गोल आसा.
36 व्या मिनटाक डी मारियानान मेळिल्ल्यान अफलातून पासाचो बरो उपेग करून गोल केलो. सांघीक प्रदर्शनाचें हें एक बरें उदाहरण दाखोवन डी मारियानान अर्जेंटिनाची आघाडी वाडयली. अॅलेक्सीस मॅकअलिस्टरान फ्रान्साच्या गड्याक चकवो दिवन डी मारिया कडेन बॉल सोंपयलो. खूबशे अंतर कापून धांवत आयिल्लो डी मारियान रोखडेंच बॉलाचेर नियंत्रण मेळयलें आनी फ्रान्साचो गोलपिकर लॉरिसाक भेदून गोल केलो.
अर्जेंटिना आनी फ्रान्स ह्या पंगडांनी हाचे आदीं दोन फावटी संवसारीक कप जिखला. अर्जेंटिनाक 30 वर्सां उपरांत जैतिवंत जावपाचें सपन प्रत्यक्षांत साकार जालें. दुसरे वटेन फाटल्या संवसारीक कपाचो वस्ताद सेगीत दुसरे फावटी जैतिवंत जावपाची संद आशिल्ली. अंदूंचे सर्तींत गोल करपी मेस्सी पयल्या हाफाचो वैशिश्ट थारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
