भांगरभूंय | प्रतिनिधी
अर्जेंटिना पंगडान सेगीत दुसऱ्या वर्सा कोपा अमेरिका सर्त जिखली. फायनलींत ताणें कोलंबिया पंगडाक 1-0 असो हारयलो. निर्धारीत वेळाच्या खेळांत दोनूय पंगड गोलाविणें बादाबाद उरल्या उपरांत अतिरिक्त वेळाचो आदार घेवचो पडलो. अतिरिक्त वेळाच्या पयल्या अर्दांत लेगीत गोलाची कोंयडी फुटूंक ना. पूण, दुसऱ्या अर्दांत म्हणल्यार 112व्या मिनटाक लुतारो मार्टिनेझान अर्जेंटिना वतीन निर्णायक गोल केलो. ह्या गोला उपरांत ही आघाडी अर्जेंटिनान अखेर मेरेन कायम राखली आनी वस्तादपण जोडलें.
अर्जेंटिनान वट्ट 16वे खेपे ही सर्त जिखली. 2021त जाल्ले सर्तींत ताणें ब्राझिलाक हारोवन वस्तादपण जोडिल्लें. अर्जेंटिना उपरांत सगल्यांत चड खेपे ही सर्त जिखपाचे वळेरेंत उरुग्वे आसा. ताणें 15 खेपे जिखल्या.
लियॉनॅस मॅसीचे कारकिर्दींतलो हो चवथो आंतरराष्ट्रीय करंड आसा. मॅसीक दुखापत जाल्ल्यान ताका पुर्ण मॅच खेळपाक मेळूंक ना. मॅचीच्या उत्तरार्धांत मॅसीच्या पांयाक दुखापत जाली. धोंपराचे दुखापतीक लागून ताका 66व्या मिनटाक मैदान सोडचें पडलें.
कोपा अमेरिका सर्तीक 1916त सुरवात जाल्ली. त्या वेळार उरुग्वेन येजमान अर्जेंटिनाक हारोवन वस्तादपण जोडिल्लें. अर्जेंटिनान आपलें पयलें वस्तादपण 1921त जिखिल्लें.
मजगतीं,अर्जेंटिनाचो स्टार खेळगडो लियॉनॅल मॅसीन देश आनी क्लबां वतीन खेळटना वट्ट 45 करंड जिखपाचो विक्रम केलो. ताणें ब्राझिलाच्या डॅनी अल्वेसाचो विक्रम मोडलो.
अॅंजल डी मारिया निवृत्त
अर्जेंटिनाच्या अॅंजल डी मारियान निवृत्ती जाहीर केली. करंडा सयत राष्ट्रीय पंगडांतल्यान निवृत्त जावपाचें आपलें सपन आशिल्लें अशें मॅच सोंपल्या उपरांत पत्रकारां कडेन उलयतना ताणें म्हणलें.
मारिया 2008तले ऑलिम्पीक सर्तींत पयले खेपे अर्जेंटिना वतीन खेळिल्लो. त्यावेळार अर्जेंटिनान भांगरा पदक जिखिल्लें. अंदूंची कोपा अमेरिका आपली निमाणी आंतरराष्ट्रीय सर्त आसतली अशें मारियान पोरूं नोव्हेंबरांत जाहीर केल्लें.
मारिया 144 आंतरराष्ट्रीय मॅचींनी खेळटना 31 गोल केल्यात. 2022त जाल्ली संवसारीक सर्त जिखपी अर्जेंटिनाच्या पंगडाचो तो वांगडी आशिल्लो. तशेंच 2014त उप वस्तादपण जोडपी पंगडांत लेगीत तो आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
