अर्जेंटिनाक हारीचो धपको

भांगरभूंय | प्रतिनिधी

संवसारीक फुटबॉल सर्तीच्या तिसऱ्या दिसा धपको बसपी निकाल पळोवपाक मेळ्ळो. सी गटांतले मॅचींत तीन खेपेचो आशियायी करंड जैतिवंत सावदी अरेबियान सगल्यांक अजाप भरीत निकालाची नोंद करतना दोन खेपेचो संवसारीक वस्ताद अर्जेंटिनाक एका गोलान फाटीं पडून लेगीत हारयलो.

सर्तीच्या पयल्या दोन दिसांनी येजमान कतर आनी इराण ह्या आशिया पंगडां हार घेवची पडिल्ली. ताका लागून सावदी अरेबिया कडल्यान कोणे आस्त धरूंक नाशिल्ली. पूण, तांणी चमत्कारीक खेळ केलो आनी लियॉनॅल मॅसीच्या पंगडाक हारीचो धपको दिलो. सावदी अरेबियाच्या बचावाक जापूच नाशिल्ली. ताकाच लागून अर्जेंटिनाक बरोबरीचो गोल करपाक जमलो ना.

ते पयलीं लियॉनॅल मॅसीन पॅनल्टीचेर अर्जेंटिनाचें 10व्याच मिनटाक खातें उगडून दिलें. सावदी अरेबियाचे खेळगडे रॅफ्रीच्या निर्णयाचेर खोशी दिसूंक नात. चार संवसारीक सर्तींत (2006, 2014, 2018 आनी 2022) अर्जेंटिना वतीन गोल करपी मॅसी पयलो खेळगडो थारलो, जाल्यार संवसारांतलो पांचवो खेळगडो थारलो. ताचे आदीं पेले, उवे सीलर, मिरोस्लाव्ह क्लोस आनी क्रिस्तियानो रोनाल्डो हांणी अशी कामगिरी केल्ली.

पयल्या अर्दांत अर्जेंटिनान आपलो शेक दवरतना 1-0 अशी आघाडी घेतली. दुसऱ्या अर्दांत सावदी अरेबियाच्या सालेह अलशेहरीनान 48व्या मिनटाक गोल करून मॅच 1-1 अशी बरोबरींत हाडली. 53व्या मिनटाक सालेम अलदावसारीन 18 यार्डाच्या बॉक्साच्या कोंनश्या वयल्यान अर्जेंटिनाच्या डिफॅण्डरांक चकयत उत्कृश्ट गोल केलो. सावदी अरेबियान 2-1 अशी आघाडी घेवन अर्जेंटिनाच्या मोग्यांक धपको दिलो.

1-2 अशा गोलान फाटीं पडल्या उपरांत अर्जेंटिनान बरोबरी मेळोवपाची धडपड सुरू केली. मॅसी, मारिया ही जोडी सक्रिय जाली. 63व्या मिनटाक निकोलास टग्लिफिकोन गोलपोस्टाच्या लागिच्यान बॉल जाळाचे दिकेन धाडिल्लो. पूण, सावदी अरेबियाचो गोलकीपर मोहम्मद अलोवैसान फिशालकायेन बॉल आडायलो. अर्जेंटिनाच्या फॅन्सांक हाचेर विस्वासूच बसना जालो.

80व्या मिनटाक मॅसीन फ्री किकीचेर गोल करपाची संद वगडायली. 84व्या मिनटाक मॅसीचो हेडर वरवीं गोल करपाचो यत्न सावदी अरेबियाच्या गोलकीपरान आडायलो.

8 मिनटांच्या भरपाय वेळांत अर्जेंटिना वतीन नेटाचे यत्न जाले. पूण, अरेबियन बचाव भेदपाक जमना जालो. 90+1 मिनटाक गोलकीपरान आडायलो आनी रिटर्न घुंवलो आनी अर्जेंटिनाच्या खेळगड्यांनी तो परतून जाळाचे दिकेन धाडलो. पूण, अरेबियन खेळगड्यान हेडर वरवीं तो गोल आडायलो.

अखेरेक सावदी अरेबियान 2-1 फरकान जैत जोडून सर्तीक सर्वोत्कृश्ट सुरवात केली.

दुसरे वटेन अर्जेंटिना खातीर ही घातक थारपाक शकता. फुडले फेरयेंत पावपाक अर्जेंटिनाक आतां उरिल्ल्यो दोनूय मॅची जिखपाकूच जाय. 27 नोव्हेंबराक तो मॅक्सिको आड खेळटलो जाल्यार 30 डिसेंबराक पोलंडा आड खेळटलो.