भांगरभूंय | प्रतिनिधी
7 म्हयन्यांची आशिल्ली गुरवार; संवसारांतली पयली शस्त्रक्रिया
डॉ. एम. डी. दीक्षित आनी वांगड्यांची येसस्वी कामगिरी
बेळगांव: अरिहंत हॉस्पिटलांत गुंतागुंतीच्यो शस्त्रक्रिया डॉ. एम. डी. दीक्षित हांच्या फुडारपणा खाला येसस्वीपणान जायत आसात. हालींच एक जानेवारी दिसा सात म्हयन्याचे गुरवार बायलेचेर येसस्वी आनी कठीण अशी बायपास शस्त्रक्रिया (ट्रिपल बायपास सर्जरी) केली. विशेश म्हणल्यार बायल आनी अर्भक सुखरूप आसा. दोगांचीय भलायकी थीर आसा. गुरवार बायलेचेर ट्रिपल बायपास सर्जरी जावन ही गजाल भारतांतूच न्हय जाल्यार संवसारांतली पयली शस्त्रक्रिया करपी अरिहंत हॉस्पिटल पयलें आसा. अनिता (37) अशें शस्त्रक्रिया जाल्ले बायलेचें नांव.
अनिता ह्यो सात म्हयन्याच्यो गुरवार आशिल्ल्यो. त्या वेळार तांकां अचकीत हड्ड्यांत दुखूंक लागलें. ताका लागून कुटुंबान तांकां एका खाजगी हॉस्पिटलांत दाखल केलें. त्या वेळार तांच्यो सगल्यो तपासण्यो केले उपरांत काळजाच्या रक्ताच्या वाहिन्यां मदीं ब्लॉकेज आशिल्ल्याचें दिसून आयलें. उपरांत कुटुंबान डॉ. एम. डी. दीक्षित हांचे कडेन संपर्क सादून अरिहंत हॉस्पिटलाक भेट दिली. डॉ. दीक्षित हांणी अनिताच्यो सगल्यो तपासणी पडटाळून पळयल्यो. हातूंत अनिता कॅल्सिफायड ट्रिपल वेसल डिसीज वीथ लेफ्टमन अर्टरी (टीव्हीडी) न त्रस्त आशिल्ली. तिका 700 एमजी/डीएल परस चड कोलेस्ट्रोल पातळी सयत हायपरकोलेस्टेरोलेमिया लेगीत आशिल्लो. हाका लागून मुखेल महाधमनी कोलेस्टेरॉलाच्या सांठ्यांनी घट्ट जाल्ली. तेच बरोबर तिचेर अॅंजिओप्लास्टी करप घाताचें आशिल्लें. कारण हातूंत रेडिएशन आशिल्ल्यान अर्भकाचेर विपरीत परिणाम जातलो आशिल्लो. उपरांत डॉ. दीक्षित हांणी अनिताचेर सर्जरी करपाचो सल्लो दिलो. ही एक दुर्मीळ आनी कठीण शस्त्रक्रिया आशिल्ल्याचेंय तांणी कुटुंबाक सांगलें. उपरांत कुटुंबान काळजाचेर फातर दवरून शस्त्रक्रिया करपाक हयकार दिलो.
उपरांत कुटुंबान 31 डिसेंबर दिसा अनिताक हॉस्पिटलांत दाखल केली. डॉ. एम. डी. दीक्षित हांणी बायलां दुयेंस तज्ञ सौभाग्या भट हांचे कडेन शस्त्रक्रिये विशीं सविस्तर चर्चा केली. मजगतीं अनिताचे परिस्थितीचे नाजूक स्वरूप लक्षांत घेवन सर्जिकल पंगडान खोलायेन चर्चा केली. सगल्या संभाव्य पर्यायांचो विचार करून लीमा-रिमा ‘वाय’ ह्या तंत्राचो वापर करून 1 जानेवारी दिसा अनिताक तीन ग्राफ्ट (बायपास) केली.
शस्त्रक्रिये उपरांत अनिता आनी अर्भकाचेर कसलोच परिणाम जावचो न्हय हाची पुरेपूर जतनाय हॉस्पिटला वतीन घेतिल्ली. तीन-चार दीस अनिताक अतिदक्षता विभागांत दवरली. शस्त्रक्रिया उपरांत अनितानूय योग्य प्रतिसाद दिल्ल्यान दोगांचेरूय कसलोच परिणाम जालो ना. उपरांत दोगांची भलायकी थीर आशिल्ल्यान 8 जानेवारीक अनिताक डिस्चार्ज दिलो.
डॉ. एम. डी. दीक्षित हांच्या फुडारपणा खाला डॉ. अमृत नेर्लीकर, डॉ. अभिषेक जोशी, डॉ. प्रशांत एम. बी., डॉ. निखील दीक्षित, डॉ. अविनाश लोंढे बी हांणी अनिताचेर येसस्वी शस्त्रक्रिया केली.
ह्या वेळार डॉ. एम. डी. दीक्षित हांणी म्हणलें, सात म्हयन्याचे गुरवार बायलेचेर काळजाची शस्त्रक्रिया करप खूब घातक आशिल्लें. आवय आनी जल्मूंक नाशिल्लें भुरगें ह्या दोगांचीय भलायकी संतुलीत दवरपा खातीर आमचे मुखार खूबशीं आव्हानां उबीं आशिल्लीं. हातूंतले एक म्हणल्यार गर्भाकाक संभाव्य घात जावपाची शक्यताय आशिल्ली. शस्त्रक्रिये खातीर गुरवार बायलेक योग्य ती भूल दिवप, प्रतिजैवीक, वेदनाशामक वखदां सयत तपासण्यो मर्यादीत दवरिल्ल्यो. ह्या सगल्या गजालींचो विचार करून आमी अनिता आनी अर्भकाची योग्य काळजी घेवन आनी गुरवार बायलेक चड काळ एकेच स्थितीचेर दवरूंक मेळनाशिल्ल्यान सामक्या उण्या काळांत अनिताचेर येसस्वी शस्त्रक्रिया केली. ही एक सामकी दुर्मीळ शस्त्रक्रिया आसून आमच्या हॉस्पिटलान ही येसस्वी केल्ल्याचो आमकां अभिमान आसा अशें डॉ. दीक्षित हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
