भांगरभूंय | प्रतिनिधी
-आयज न्यायालयांत हजर रावपाचो आदेश
तशेंच आम आदमी पक्षाचे सर्वेसर्वा अरविंद केजरीवाल हांणी वेंचणूक आचारसंहितेचो भंग केल्ले प्रकरणांत म्हापशें न्यायालयान समन्स धाडून 29 नोव्हेंबराक न्यायालयांत हजर रावपाचो आदेश दिला. हो समन्स पयलो वर्ग न्यायालयाची न्यायाधीश शिल्पा पंडीत हांणी जारी केला.
2017 च्या विधानसभा वेंचणुके वेळार म्हापशें टॅक्सी स्थानकाचेर आयोजीत पक्षाच्या प्रचारसभेंत दिल्लीचे मुख्यमंत्री अरविंद केजरीवाल हांणी ‘हेर पक्षां कडल्यान पयशे घेयात, पूण मत मात आम अादमी पक्षाक दियात’ अशें आवाहन मतदारांक केल्लें. ह्या प्रकरणांत तेन्नाचे निर्वाचन अधिकारी गुरूदास देसाय हांणी केजरीवाल हांचे आड सुदारीत वेंचणूक आचारसंहितेचो भंग केल्ल्याची कागाळ न्यायालयांत दाखल केल्ली.
8 जानेवारी 2017 दिसा सांजे म्हापशें टॅक्सी स्थानकाचेर जाहीर सभा आयोजीत केल्ली. हे सभेंत केजरीवाल हांणी केल्ल्या विधानाक भाजपान आक्षेप घेवन वेंचणूक आयोगा कडेन कागाळ केल्ली. हे कागाळेच्या आदारान वेंचणूक आयोगान केजरीवाल हांकां समन्स धाडिल्लो. केजरीवाल हांच्या आवाहनाक लागून लोकप्रतिनिधी कायदो कलम 123 (1) तशेंच आदर्श आचारसंहितेचो भंग जाल्ल्यान भा.दं.सं. कायदो कलम 171 (ब) आनी 171 (ई) चे उल्लंघन जाल्ल्याचे कागाळेंत वेंचणूक अधिकारी गुरूदास देसाय हांणी नमूद केल्ले. ते प्रमाण वेंचणूक आचारसंहितेचो भंग केल्ल्याच्या आरोपा खाला म्हापशें पुलिसांनी केजरीवाल हांचे आड अदखलपात्र गुन्यांव दाखल केल्लो. ह्या प्रकरणांत म्हापशें पुलिसांनी जुलय 2018 दिसा निमाणो अहवाल न्यायालयांत सादर केल्लो. तेन्नाच्यान न्यायालयांत हो खटलो सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
