भांगरभूंय | प्रतिनिधी
अयोध्या, खबरां संस्था: अयोध्येंतल्या राम मंदिराच्या उक्तावण सुवाळ्यांत प्रधानमंत्री नरेंद्र मोदी वांटो घेतलो. बुधवारा श्री रामजल्म भूंय तीर्थक्षेत्र ट्रस्टाचे वांगडी चंपत राय, नृपेंद्र मिश्रा आनी उडिपी शंकराचार्य गोविंद गिरी महाराज हांणी प्रधानमंत्री मोदी हांची भेट घेवन तांकां ह्या सुवाळ्यांत वांटेकार जावपाक आपयले. प्रधानमंत्र्यान आमंत्रण मान्य करून हाजीर रावपाचें आस्वासन दिलें. राम मंदिराची अभिशेक कार्यावळ २२ जानेवारी दिसा दनपरां १२.३० वरांचेर जातली.
कार्यावळ १० दीस चलतली
राम मंदीर निर्माण समितीचे अध्यक्ष आनी प्रधानमंत्र्याचे आदले मुखेल सचीव नृपेंद्र मिश्र हांणी अयोध्येंत राम देवळांत राम लल्लाच्या अभिशेका वेळार प्रधानमंत्री मोदी हाजीर आसतले, अशें सांगलें. हो उत्सव १० दीस चलतलो. देवूळ बांदल्या उपरांत दर दिसा एक ते देड लाख भक्तांक रामाचें दर्शन घेवपाक मेळटलें. पुराय देशभरांतल्या कोट्यांनी भक्त येतले, अशें तांणी सांगलें. दरेका भक्ताक गर्भगृहांत २० ते ३० सेकंद देवाचें दर्शन घेवंक मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
