भांगरभूंय | प्रतिनिधी
-प्रधानमंत्री नरेंद्र मोदी वांगडा जातली द्विपक्षीय बसका
नवी दिल्लीः दिल्लींत जावपी जी-20 परिशदे खातीर अमेरिकेचे राष्ट्राध्यक्ष ज्यो बायडेन दिल्लींत पावल्यात. विमानतळार राष्ट्राध्यक्ष ज्यो बायडेन हांकां केंद्रीय मंत्री जनरल व्ही. के. सिंह हांणी येवकार दिलो. विमानतळा वयल्यान ते तांच्या हॉटेलांत पावले. प्रधानमंत्री नरेंद्र मोदी हांचे कडेन ते द्विपक्षीय बसका घेतले.
बसकेंत प्रधानमंत्री मोदी आनी राष्ट्राध्यक्ष ज्यो बायडेन हे म्हत्वाच्या मुद्यांचेर चर्चा करतले. अंदूंच्या जी-20 परिशदेचे येजमानपद भारता कडेन आसून भारतांत जावपी ही पयलीच जी-20 परिशद अासा.
बसकेंत 5जी आनी 6जी स्पेक्ट्रम, युक्रेन, अणुक्षेत्रांतली प्रगती आनी नवें तंत्रज्ञान अशा म्हत्वाच्या मुद्यांचेर चर्चा जावपाची शक्यताय आसा.
अमेरिकेचे राष्ट्रीय सुरक्षा सल्लागार जेक सुलवीन हांणी म्हणलें, प्रधानमंत्री मोदींच्या भोंवडे वेळार घेतिल्ल्या जायत्या म्हत्वाच्या निर्णयांचो नियाळ घेवपाची शक्यताय आसा. पूण आखाती देश आनी हेर अरब देशांक जोडपाक अमेरिका, भारत आनी हेर अरब देशां वांगडा एक व्हड रेल्वे कबलात जाहीर करपाची येवजण तयार जाता, अशें तांणी म्हणलें. मजगतीं, अमेरिका हे खातीर यत्न करतली, अशेंय तांणी म्हणलें.
भारता पसून पुराय मध्यपूर्वेंतल्या, युरोपा कडेन कनेक्टिव्हिटी जावप म्हत्वाचें. ते खातीरूच सगल्या देशांक म्हत्वापूर्ण अर्थीक लाब तशेंच धोरणात्मक लाब मेळपाक मजत जातली. ज्यो बायडेन हे प्रधानमंत्री मोदी हांचे सयत एका अधिकृत कार्यावळींत वांटेकार जातले. ते उपरांत ते जी-20 परिशदे खातीर आयिल्ल्या फुडाऱ्यां वांगडा बसका घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
