भांगरभूंय | प्रतिनिधी
अभिनय म्हणल्यार एक प्रकारची फटवणूक: नवाजुद्दीन सिद्दिकी
पणजी: लोक सेगीत धांवपळ करून थकतात. दुयेंत पडटात. तांकां खंयच्या ना खंयच्या वेलनेस सेंटरांत वचपाची गरज पडटा आसत, पूण म्हाका केन्ना तशें दिसलें ना. अभिनयूच म्हजे खातीर वेलनेस सेंटर, अशा उतरांनी अभिनेतो नवाजुद्दीन सिद्दिकीन आपलो अभिनया विशीं मोग उक्तो केलो.
मॅकॅनीज पॅलेसींत अभिनेतो म्हूण म्हजो प्रवास हाचेर तो उलयतालो. बोल्सांत कांयच नाशिल्ले सावन ते आतां सगले कितें आस मेरेनच्या संघर्शाच्यो यादी ताणें सांगल्यो.
ज्या काळांत हिरो म्हणटकूच एक विशिश्ट प्रकारचें व्यक्तीमत्व लोकांचे नदरे मुखार उबें रावतालें, त्या काळांत हांवें ह्या क्षेत्रांत येवपाचो निर्णय घेतलो. खूबशा जाणांनी म्हजो चेरो, कूड पळोवन फकांडां केली. कितें करता? अशें विचारतकूच हांव अभिनेतो आसा अशें म्हणले उपरांत हो आनी कितें करतलो? थशे थोमणे खूब जाणांनी मारले.
अभिनय करीत आसतना स्वताक आनी प्रेक्षकांक दोगांकूय खबर आसता, की ही एक प्रकारची फटवणूक आसा. जें सुरू आसा तें खरें न्हय. पूण तरी लेगीत तांकां तें आवडटा. म्हाकाय ही फटवणूक आवडली, म्हणून ह्या क्षेत्राची निवड केली अशें ताणें म्हणलें. एनएसडींत प्रवेश घेतलो आनी हो प्रवास सुरू जालो. एनएसडींत खूब भुमिका केल्यो. पूण जेन्ना मुंबय आयलों तेन्ना लक्षांत आयलें की हांगा प्रशिक्षीत अभिनेत्यांची कांयच गरज ना. तेन्ना लोक टीव्ही सिरियलांनीय घेनाशिल्ले. पूण काम करीत रावलों.
एका मनशान दुसरो मनीस जावपाची ही प्रक्रिया म्हणल्यारूच मेथड अॅक्टींग अशें सिद्दिकीन म्हणलें. अभिनयाच्या ह्या मळार इतल्यो गजाली आसात ज्यो करपा खातीर आयुश्य उणें पडटलें. ताका लागून वेळ खूब कमी आसा अशें म्हाका दिसता. सत्यजीत दुबे हांणी तुमी केल्लें कांयच फुकट वचचें ना हें सांगिल्लें. ते हांवें सदांच लक्षांत दवरलें. मेळिल्ली खंयचीय भुमिका बरी वा वायट अशी केली ना. ती भुमिका म्हणून उत्कृश्ट केली. भुमिका खंयचीय आसूं सगल्यांत टायमींग गरजेचें आसा हें हांव शिकलों, म्हणून हांव सगले तरेच्यो भुमिका करपाक शकलों अशें सिद्दिकीन म्हणलें.
खंयच्याय सिनेमाच्या येसा खातीर अभिनेतो आनी दिग्दर्शक हांचे मदलो संवाद खूब म्हत्वाचो आसा. तशेंच अभिनेत्याक सगले तरेच्या दिग्दर्शकांक सांबाळूंक येवंक जाय अशें ताणें सांगलें. दुर्दैवान आमचे कडेन चित्रिकरणा वेळार आशिकुशीक खूब बोवाळ आसता. अशे परिस्थितीत लेगीत अभिनेत्यान दर्जेदार अभिनय करचो अशी अपेक्षा आसता. विदेशांत अशें ना अशें सिद्दिकीन म्हणलें. तशेंच संहितेंत पात्रां विशीं बरोवपाची गरज आसा, जे आमचे कडेन जायना अशेंय ताणें म्हणलें. इरफान खान आनी पियुष मिश्रा हांचे बरोबरोचे दोन खीण ताणें ह्या वेळार सांगलें. वाणी त्रिपाठीन ताचे कडेन संवाद सादलो.
स्वताक वळखप गरजेचें
तुमी जेन्ना ह्या मळार येतात तेन्ना तुमी कोण आसात हें पयलीं वळखूंक जाय. स्वता भितर आशिल्ल्यो खाशेल्यो गजाली तुमकां समजल्यो की ल्हवूल्हवू त्याे लोकांकूय समजूंक लागतात अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
