भांगरभूंय | प्रतिनिधी
इंग्लंडाच्या बॉलरांनी संवसारीक टी-20 क्रिकेट सर्तींतले पयलेच मॅचींत जबरदस्त प्रदर्शन केलें. तांणी अफगाणिस्तानाचो डाव 112चेर सोंपयलो. सॅम कुरनान 10 धांवड्यो दिवन 5 विकेटी घेवन इतिहास घडयलो. अफगाणिस्तानाच्या बॉलरांनी लेगीत बरें प्रदर्शन केलें. पूण, इंग्लंडाक जैता पसून आडावपाक जमलें ना. अखेरेक इंग्लंडान 11 बॉल आनी 5 विकेटी राखून जैत जोडलें.
इंग्लंडाच्या बॉलरांनी मॅचीचेर आपलो शेक दवरलो. बेन स्टोक्स, सॅम कुरन आनी मार्क वूड हांणी एका परस चड विकेटी घेतल्यो.
इंग्लंडान टॉस जिखून पयलीं बॉलींग करपाचो निर्णय घेतलो आनी स्टोक्स आनी वूड हांणी तो योग्य थारायलो. हझरतुल्लाह झझाई (7) आनी रहमनुल्लाह गुर्बाझ (10) हे रोखडेच बाद जाले. पूण, इब्राहीम झाद्रान आनी उस्मान घानी हांणी अफगाणिस्तानाच्या डावाक आकार दिलो. सॅमान ही जोडी फोडटना झाद्रानाक 32 धांवड्यांचेर तंबूंत धाडलो. ते उपरांत अफगाणिस्तानाच्या बॅट्समनांनी हाजेरी लावपाचें काम केलें.
नजिबुल्लाह झाद्रानान 13 धांवड्यो केल्यो. पूण, सकयले सुवाते वयल्या एकाय खेळगड्याक दोट्टी आंकडो हुपपाक जमलो ना. सॅमान 18वे ओव्हरींत सेगीत दोन बॉलांचेर दोन विकेटी घेतल्यो. ताणें 20वे ओव्हरीच्या पयल्या बॉलाचेर हॅट्रीकेचो यत्न केलो. ती पुर्ण जाली ना पूण, ताणें अखेरेच ओव्हरींत दोन विकेटी घेतल्यो.
इंग्लंड ही मॅच सहज जिखतलो अशें दिशिल्लें. पूण, अफगाणिस्तानाच्या बॉलरांनी तांकां एकेक धांवडे खातीर संघर्श करपाक लायलो. मुखेली जोस बटलर (18) आनी अॅलेक्स हेल्स (19) हांणी बरी सुरवात करून दिवपाक जमली ना. फझलहक फारुकी आनी फरिद अहमद हांणी तांकां बाद केले. इंग्लंडान 10 ओव्हरींनी 2 विकेटी वगडावन 62 धांवड्यो केल्यो.
तांकां अखेरच्या 60 बॉलांनी 51 धांवड्यांची गरज आशिल्ली. मोहम्मद नबीन इंग्लंडाक व्हड धपको दितना बेन स्टोक्साक (2) बोल्ड केलो. मुजीब उर रहमानान 14वे ओव्हरींत डॅव्हीड मलानाक (18) बाद करून मॅचींत उमळशीक हाडली. लियम लिव्हिंगस्टोनान 21 बॉलांनी नाबाद 29 धांवड्यो करून इंग्लंडाचें जैत निश्चीत केलें. इंग्लंडान 18.1 ओव्हरींनी 5 बाद 113 धांवड्यो करून जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
